1  ✡ Pal 20:1Xe angelo taꞌuvesou noxiꞌa mutaunu xoolau noxou, la eni emaisou oto vile molu teitexi no loxotolo mulapau muluꞌe no lia. Anu muluꞌe, la milosou siliko sou ukisiinu aitenga sou taxa e kaluxu uasi. 2  ✡ Tav 19:28; Mul 10:12-15; Ioe 2:2, 10Ia no mine anu mukisiinu, la navu umuxu muuatu no anu loxo itauxu saavu toxoxaꞌa. La umuxu isivoxoxu mutaasou aso ilou loxotolo. 3 La ta musiaꞌe ta taula mixali no anu navu umuxu ne, la xavineꞌi loxo ta tanga sou miluꞌe no lia ꞌo. 4  ✡ Pal 7:3La mivikalaneꞌi lexe umomomo sou iꞌoxo masuanu iaꞌeiaꞌe ilou sesesee mo ovuovu no lia ꞌo uasi, ia imaisiꞌa ta mitema ane sosovo noxou Lataua uxolu no ꞌalaieꞌi uasi la ikasiꞌasi. 5 Aneꞌi milosiꞌa xavi sou iveꞌaveꞌa isoisoli uasi, ia ilosiꞌa navunavusi soꞌio taꞌuve. Xe navunavu ane aneꞌi ixamulinu ne, anu loxo tanga uvenge la taxamulinu. 6  ✡ Iop 3:21; Iel 8:3No nano no voxo ane ne, la ta mitema ikakamuli solixaꞌa, ia isoli a loxovaa? Mo aneꞌi imasaxa lexe isoli, ia soli uꞌumeꞌa ulai.

7  ✡ Ioe 2:4Ia ta taula ne, ieꞌi loxo ta oosi sou ꞌotoꞌoto. Mo no kisikisiꞌa, la mitaataa loxo kisivalu miꞌoxo no anu xoulu, xe ieꞌi loxo ta mitema. 8  ✡ Ioe 1:6Laxusiꞌa ne loxo ta sema laxusiꞌa xe anaxaꞌa loxo laeoni anaxu. 9  ✡ Ioe 2:5Xe no anu tokolomoiꞌa, la mii sou siovesou lutuneꞌi miꞌoxonu no anu aeni xe vivisiꞌa luluxu loxo ta oosi mo karisi tavuꞌalo ipasipaa iiave sou ilai iꞌoto. 10 Xe aneꞌi xelaꞌa loxo tanga e utuvanenge no anu, la xavi no anu xelaꞌa ne umomomo sou ulosiꞌa ta mitema navunavu uxolu soꞌio taꞌuve. 11 Xe aneꞌi tilasiꞌa kalumo, tila ne anu angelo sou taxa e kaluxu uasi. Ualasou no anu Evalaio la ilemolu lexe Abadoni xe no anu vaikala noxiꞌa ta Xiliki la ilemolu lexe Apolioni.* Ualasou laaxu ne lexe itema sou umamulo mimii.

12 La tuꞌutuꞌumaxu vile a mukalu ne. Ia ta tamei la a uxali uao.

13 Xe angelo muxatele vilesou noxiꞌa mitaunu xoolau noxou, la eni elomusou ꞌava vile muxali no anu sikilinu tamiꞌa utulu no anu valovalo ia miꞌoxonu no anu xoulu no talaxu Lataua. 14 Anu muvikalanu angelo muxatele vilesou noxiꞌa e utetelisou xoolau ne aloxo ꞌo, “Nalulusiꞌa ta angelo tamiꞌa e misakisakineꞌi mixolu no lexa tila ne ualasou lexe no anu si Iuplatesi.” 15 La sou ta angelo tamiꞌa e mixolu miloo sou aso ngiou ilou voxo mo soꞌio xe tauu ie ane Lataua musosovosou sou ilulusiꞌa. Lataua ululusiꞌa sou ilai iveꞌaveꞌa xalee tatalusiꞌa ta mitema isoisoli. 16 La eni elomusou itiitisiꞌa ta mitema sou ꞌotoꞌoto mixolu no lataneꞌi ta oosi mumomomo loxo 200 milioni.

17 Xe no malemalei noxilo loxo aipiepiena, la eni emaisiꞌa ta mitema sou ꞌotoꞌoto mixolu no lataneꞌi ta oosi aloxo ꞌo. Aneꞌi tokolomoiꞌa ne, mii sou siovesou lutuneꞌi vile vilesi muxolu no lutuneꞌi. Ia mii sou siovesou lutuneꞌi ne, kaukavuxu lauolauoinu manina loxo navu mo ꞌelaꞌela manina xe kuakuala loxo taupea. Mo ta oosi ne, kisiꞌa loxo ta laeoni ia navu ilou umuxu mo taupea ialuxu ulaa no anaanaxaꞌa. 18 La aneꞌi miveꞌaveꞌa xalee tatalusiꞌa ta mitema no anu mii masumasua tatalu ane navu ilou umuxu mo taupea ialuxu ulaa no anaanaxaꞌa. 19 Ta oosi ne, xavineꞌi muxolu no anaxaꞌa ilou xelaꞌa mo xelaꞌa iaulu xe kisou a uxolu no anu. La aneꞌi iꞌoxonu masuaneꞌi ta mitema no anu.

20  ✡ Lex 115:4-7; 135:15-18; Tan 5:23; Pal 16:9, 11Ia ta mitema ane isoisoli no anu mii masumasua tatalu uasi ne, ixiunu tumaliꞌa no anu mii maꞌia ane aneꞌi miꞌoxonu no avoꞌa uasi. Aneꞌi ikalu no anu ꞌilixo sou ilolotu noxiꞌa ta ulee masumasua sou kalakalavoi iloꞌa ta mimii ane mipuineꞌi no anu xoulu ilou siliva mo barasi xe lavoꞌo ilou ovu uasi. Aneꞌi ta mimii ne, ilavusou imamalei mo ilolomu xe imuamuaꞌi uasi. 21 Mo aneꞌi ixiunu tumaliꞌa no anu ꞌilixo sou iveꞌa ta mitema isoisoli mo ꞌilixo sou saasaa iouiou mo ꞌiliꞌilixo masumasua iouiou sou voteꞌi xe ꞌilixo sou pakali uasi.