1 Au Paulu, ayei urata ben kapraingi ke Maro inbe aposol ke Yesu Kirisi, in la awodo rau naii pong Titi i. Ngan urata tina yo ayei nga, ngan nen; be alon di tooltool yo Maro ipootoo di panga nga, a be nen ngan titara lodi le imede panga, inbe apatomonai di ye betanga moolmool a be nen ngan lodi galanga ye a titoo dada dook mata yo Maro lono be titoo i. 2 Ngan nen le di tooltool tina yo titara lodi le imede panga inbe lodi galanga ye betanga moolmool tina nga, ngan titara lodi le atu pang Maro be ole ikaua yepongo dook mata yo taukan motingi i, in pang di. Mukot yege ye kene yo Maro itar lang le tana tiao nga, ngan ipamede betanga be ikaua yepongo dook mata pang di tooltool ki. Ngan Maro in ke be illungidi tiap. 3 Le ye lal yo itaru i, in ikaua urata pau be la awetewete bingi dook mata pang di tooltool a be nen ngan iyei di le lodi galanga ye betanga ki. Le Maro yo ipamulidi ye so dook tiap yo be igarungidi i, in la iwete a ikaua urata tani pau i.

4 Titi, awodo rau naii pong. Ong in ye lodo medana yo aru tataru pang Maro i, in le dawa ben ong in au natuk moolmool nga. Le apatarau pang Tamada Maro iye Yesu Kirisi yo ipamulidi i, in be yaru lodi pong a tiyei dada dook mata pong a be nen ngan tikaua lo silene kidi pong.

5 Titi, ye punu yo a le ayegong sila kuyepe ye motmot yo Kirit in nga, ngan be nen a kuyei porai urata naunu yo iken nga, inbe kutar di tooltool a tiyei kuto maimai pang di tooltool yo tigaua ye bareme ke Yesu nga ye malala maimai tina ngan atu atu le imot, ben tina yo awete pong muku nga. 6 Le be kutar di tooltool nga, ngan kumata tool la iyepe le taukan busunu ye di tooltool matadi i. Nen le tool yo be kutaru i, in tool la be matana pang ye garup ataleu yo iyooloo koot i, inbe tool la di natunu titara lodi medana pang Yesu i. Inbe di natunu tina ngan mala be di tooltool tiwete di be di ngan tikapsap ye dada dook tiap sa, too tilongo betanga kidi tamadi le tinadi a titoo tiap, ngan tiap. 7 Le kutar di tooltool yo nen nga, yesoo di la be matadi kala urata ke Maro nga. Le be nen ngan kumata tool la iyepe le taukan busunu ye di tooltool matadi i. Nen le tool yo be kutaru i, in ke be idada di tooltool podi tiap, inbe ya in ke be katen malmal tarai tiap, inbe ke be iyin ran medana a kuton moo ye tiap, inbe ke be irau sokorai di tooltool tiap, inbe ke be illung di tooltool a ikap sokorai pat kidi tiap lapau. 8 Bong tool tani in ke be ikamata di lowo, inbe ya in lono pang dada yo dook mata ngan leu, inbe ikaptutu dook ye yepongo ki, inbe iyei dada dook mata tarantatu pang di tooltool, inbe itoo dada le imot yo Maro lono be itoo nga, inbe ikaptutu dook ye panga ki lapau. 9 Inbe tool tani in ole matan kala betanga moolmool yo tapatomonai di tooltool ke Kirisi ye nga, a be nen ngan ipatomonai di tooltool ye a ipamede lodi ye betanga yo tarantatu nga. Inbe iparama betanga tani a be nen ngan ikarata betanga pang di tooltool yo tikapye be tirautoo betanga moolmool nga.

10 Ngan ye yo awete pong be kutar di tooltool nen nga, ngan yesoo di tooltool yo ke padon koo nga, ngan alunu la tiyepe ye motmot Kirit nga. Di ngan tipatomonai di tooltool ye betanga yo taukan punu nga, inbe tillung di tooltool ye betanga kidi. Inbe di tooltool tina yo tiyei nen nga, ngan di alunu la tiyepe ye gaongo kidi Yuda yo tiwete be di tooltool ke Kirisi nga, ngan be titoo momo kidi Yuda yo ke koranga di tamoto tinidi i. 11 Nen le kulele di a tiyepe moonoombe, yesoo tipatomonai di tooltool ye so kapala yo ke be tipatomonai di tooltool ye tiap nga a be nen ngan tikap sokorai pat le so ye di. Inbe patomonaingi yo nen nga, ngan igarung di tooltool tiye di rimadi le di natudi lodi medana yo titaru i. 12 Ngan au taleu la awete betanga nen ye di in tiap, bong mukot yege nga, ngan tool kidi atu ke lo galanga in iwete nen, “Di tooltool ke Kirit nga, ngan di tooltool ke kaplungunu leu, inbe di ngan dawa ben asara gok, inbe di ngan tooltool mallaiedi, inbe tiso pang kaningi leu.” 13 Ngan betanga tina nga, ngan moolmool. Le nga ole kuwete le koom mede a kulele di ye patomonaingi ke kaplungunu, a be nen ngan titara lodi medana ye patomonaingi moolmool ke Yesu. 14 Inbe kuwete pang di a kin titar talngadi pang bete sokoraingi inbe pang ger matana matana ke di Yuda be. Betanga yo nen nga, ngan ipa ye di tooltool yo tiwala muridi pang betanga yo moolmool i. 15 Ngan di tooltool yo lodi iken galangana ye Maro matana nga, ngan so sa ke be iyei di le lodi giri leu ye matana, ngan tiap. Bong di tooltool yo tidodo lodi a titara lodi medana pang Maro tiap nga, ngan so le imot iyei di le lodi giri leu ye matana. Di ngan kutodi le lodi dook tiap le lodi galanga ye so yo dook mata too dook tiap, ngan tiap. 16 Di tooltool ke padon koo tina, ngan tiwete be di ngan lodi galanga ye Maro, bong ye dada kidi yo tiyei nga, ngan ipapos di ben di ngan lodi galanga ye tiap. Di ngan tiyei dada dook tiap ki taunu a titoo betanga ke Maro tiap le ke be tiyeie urata sa yo dook mata, ngan tiap.