1 Nen le natuk, kukodo le kumede ye Yesu Kirisi yo lono paidi a iyei dada dook mata paidi i. 2 Inbe ye betanga tina yo akodo dama kidi tooltool alunu matadi inbe awete pong nga, ngan kop pang di tooltool yo lom tar di be di ngan tooltool moolmool nga, a be nen ngan tipatomonai di tooltool kapala ye. 3 Le Timoti, kukodo le kumede a kuwau am ye solanga urata moonoo ben tool ke patokongo ke Yesu Kirisi nga. 4 Kumata, tool sa be iyei urata ben tool ke patokongo inbe la iyei urata matana matana kapala mulu tiap. Bong tool tani in lono be tool kuto mai ki ke patokongo in lon ponana ye nga, ngan ole iyei urata ataleu ben tool ke patokongo nga le iken leu. 5 Ngan gaongo leu, kumata le be tool atu sa itoo noonoongoo ke parsukungu tiap inbe lono be idada ye ni ke parsukungu nga, ngan o ke be ikap touo balingi siap. Bong kumata le be itoo noonoongoo dook mata nga, ngan la be ikaua balingi ye urata kootoonoo ki nga. 6 Kumata, tool ke kapkingi yo ikaua urata le gurana mata i, in ya la be imuku ye kaningi so matana ye so tina yo ikapki ye kumu ki nga. 7 Le Timoti, lom kaua urata ye betanga tina yo akatte betanga ye nga le ikenen leu. Yesoo, kumata le be kuyei nen nga, ngan ole Tool Mai ilonong a ipagalanga lom ye betanga tina ngan le imot.

8 Kin lom tutu Yesu Kirisi yo sasa ke Dawiti i, in le ikenen leu. Ya in Maro ipamaditi ye ni ke matenge, le i bingi dook mata tani yo araii pang di tooltool in naii. 9 Ngan ye bingi dook mata tani yo araii pang di tooltool i, in la asolo urata moonoo ye a tipau au ye ooroo medana a titarau se ayepe rumu dook tiap kidi talnga dikidiki lono ben au tool ke talnga dikidiki nga. Bong bingi dook mata ke Maro, in ke be tipauu ye ooroo medana tiap. 10 Ngan la lok be asolo urata moonoo ye so nen le imot a be nen ngan di tooltool yo Maro ipootoo di panga nga, ngan di lapau titara lodi medana pang Yesu Kirisi. Kumata le be tiyei nen ngan la be ipamulu di ye so dook tiap yo be igarung di i, inbe ikap di a lo iye di tiyepe ye yepongo dook mata yo taukan motingi i, in ye malala yo di tooltool tikamata ene ngan mai san ke be tipayiti ye i.

11 Nen le betanga yo tiweta i, in moolmool.

14 Timoti, kin kupamadit di tooltool yo titara lodi medana ngan ye betanga tina yo awete ngan le ikenen leu. Inbe kuwete a kulele di ye Maro ene nen, kin koodi parkap ye betebetanga be. Ngan betanga tina yo nen nga, ngan dook mata ke be ilon di pitiap yege, bong ole igarungu di tooltool yo titar talngadi a tilongo betanga kidi ngan lodi. 15 Inbe kuyei urata le guram ye Maro matana a be ikamatong ngan lono dook mata pong. Le kuyei urata nen le dawa ben tool yo iyei urata dook mata ngan le ke be moomoonoo ye tiap i. Inbe kuyei urata nen le dawa ben tool yo ipatomonai di tooltool tarantatu ye betanga moolmool ke Maro i. 16 Bong kuyepe manga mooloo ye di tooltool yo tiwete sokorai a betanga kidi ngan itoosap dada dook mata yo Maro lono be tatoo nga. Yesoo, betanga yo tiwete nga, ngan ole iyei di tooltool le titoo dada dook tiap ki taunu yo Maro lono be tatoo tiap nga. 17 Ngan patomonaingi kidi tooltool tina ngan ole ingaua ni mai le imot dawa ben botoboto dook tiap yo ikan di tooltool tinidi, ngan le ikan tootoo pang gigini i. Ngan di tooltool tina yo tiwetewete betanga dook tiap nen nga, ngan di diedi ru la Aimenias ye Piletus nga. 18 Di suru tina ngan tiyege betanga moolmool ke Maro, inbe tipatomonai di tooltool nen be Maro ipamadit di tooltool yo timmata nga, ngan ye ni ke matenge oo. Nen le tigarungu lo medana kidi tooltool kapala yo titaru pang Kirisi i. 19 Bong betanga moolmool yo ke Maro i, in ikodo le imede dawa ben saua yo Maro ipe le imede a ire rumu ki ye i. Ngan saua tani in tiwodo betanga ru la ilo ye nga. Atu in nen, “Tool Mai in lon galanga ye di tooltool yo ya ki nga, ngan oo.”✡ Kinkatingi 16:5 Inbe betanga tina ngan san mulu in nen, “Di tooltool yo tiwete be di ngan ke Tool Mai nga, ngan ole tiwala muridi pang dada yo dook tiap nga.”

20 Ngan ye rumu somai ke tool ballingana atu, in bor le tawiri la iken lono nga. Ngan so tina ngan tikarata ye pat medana dook mata yo tiwete edi ye gol le silba ngan leu tiap, bong kapala ngan tikarata ye kai le tana lapau. Ngan bor le tawiri yo tikarata ye gol le silba nga, ngan be pang urata dook mata yo be lodi ponana ye nga. Inbe so tina ngan kapala yo tikarata ye kai le tana nga, ngan be pang urata kapala. 21 Ngan nanga, kumata be tool sa iwala murini pang urata yo dook tiap nga, inbe iyepe le tinin galanga ye Maro matana nga, ngan ya in dawa ben bor le tawiri yo tikarata ye gol le silba pang urata dook mata yo be lodi ponana ye nga. Nen le tool tani in ole dawa ben bor le tawiri yo rumu taunu ipootoo panga be iyei urata ki le imot yo dook mata ngan ye nga.

22 Bong Timoti, kuyepe manga mooloo ye dada dook tiap yo di kakase paunu ngan lodi be tiyei nga. Inbe kutoo dada dook mata noonoonoo ke Maro, inbe kutara lom medana panga, inbe lom pang di tooltool kapala mai san, inbe lom iken silene. Ngan kutoo dada yo nga, ngan kuye di tooltool yo tisung pang Tool Mai ye lodi yo titaru moolmool panga i. 23 Inbe kuyepe manga mooloo ye di tooltool yo lodi galanga ye dada moolmool ke Maro tiap inbe taukadi lo galanga a tiye di diedi tiparsu ye betebetanga nga. Yesoo, lom galanga nen be tiparsu nga, ngan ole tipamaditi malmal. 24 Ngan tool yo iyei urata pang Tool Mai ben kapraingi ki i, in ke be iye di tooltool tiparsu ye betebetanga tiap. Bong ya in ke be iyei dada dook mata pang di tooltool nga le imot a ipatomonai di ye betanga moolmool. Inbe ya in ke be ikap malmal tarai pang di tiap. 25 Bong tool tani in ole iwete betanga mos leu pang di tooltool yo tipili betanga ki nga. Ngan ole iyei nen, yesoo ya lono be nen ngan Maro imalum pang di tooltool tina a tiportak lodi, inbe ilon di a lodi galanga ye betanga moolmool. 26 Inbe tool tani in ole iwete a ikarata betanga pang di a be nen ngan lodi galanga a tikoo ye dowo ke tool dook tiap Satan yo ikap di a iparama di be tiyei urata yo lono be tiyei nga.