96
Ritonõpo eahmary, tuisame aexiryke
(1 Koronika 16.23-33)
1 Oeremiatoko eremiatoh kasenato ke
Ritonõpo eahmatohme.
Oeremiatoko Ritonõpo netaryme,
sero nono põkomo emero!
2 Oeremiatoko Ritonõpo netaryme, eahmatoko.
Kokoro rokẽ imehnõ zurutoko,
typynanohse eya kuexirykõ poko.
3 “Ritonõpo kurã poko,” ekãtotoko imehnõ nonory
põkomo a,
emero ahno zurutoko inyrihpyry poko tyjamitunuru ke.
4 Tuisamehxo Ritonõpo ehtoh eahmatohme kyya xine mana; imehnõ ritõ tõ motye emero, tuisamehxo mana.
5 Imehnõ nonory põkõ ritõ kõ,
ineponãmarykõme rokẽ mã toto,
yrome kapu rihpõme Ritonõpo mana.
6 Ritonõpo zomye saereh ãko mana, xixi motye,
tuisamehxo aehtoh osenẽko mana;
ijamitunuru ikuranory roropa Itapyĩ pehkãko mana.
7 Ritonõpo eahmatoko sero nono põkõ emero!
Saeremehxo aexiry poko eahmatoko,
ijamitunuru poko roropa.
8 Kuesẽkõ kure exiketyme aexiryke eahmatoko;
onekarorykõ enehtoko õmõtohkõme Itapyĩ zarã taka.
9 Sepuitone, kuesekumurukõ po syporohtone
Ritonõpo kurã ẽpataka, aoseneporyhtao;
tykytyky kahtoko ẽpataka, nono põkõ emero.
10 Imehnõ nonory põkõ emero zurutoko Ritonõpo tuisame ehtoh poko! Sero nono esaka tyrise, esyryhmasaromepyra mana;
zae rokẽ sero nono põkõ apiakãko mana.
11 Tãkye exiko, nono, kapu roropa!
Panaikatome exiko, tuna konõto, onokyro tõ roropa emero tunakuaõkomo.
12 Atãkyematoko, ona tõkehko moro põkõ roropa.
Wewe tomo itu htaõ komo kohtãko mã toto
tõseahmarykõme Ritonõpo ẽpataka,
13 aepyry ropa ahtao emero Esẽme ehtohme.
Zae rokẽ sero nono põkõ rohmanohpõko mana.