1 “Oty katohme ẽmepyry onymenekara Ritonõpo Jamihmehxo Exikety nae ahno apiakatohme, zae ehtoh ekarotohme typoetory tomo a?

2 Ahno nae tosary ehpio menuru syryhmãko zumohxo tynonory ritohme.

Kaneru tõ ematonanohnõko toky tõ maro toto ritohme.

3 Jumẽtu tõ arõko mã toto poetõpo tõ eky tomo,

pui mũkuru apoĩko mã toto pytỹpo eky, tineru, inapoihpyry axĩtao rokẽ epehmapotohme ropa.

4 Tymõkomokãkara onewomara mã toto,

toto anakorehmara mã toto zae ehtoh apoitohme eya xine.

Tytineruke pyra exiketõ erehnõko mã toto, tururume toto ytotohme, otonẽtohme.

5 “Tytineruke pyra exiketõ, jumẽtu tõ tosẽke pyra exiketõ sã,

ytoytõko mã toto ona poro tonahsẽ zupiry poko typoenõ napyryme.

6 Tytineruke pyra exiketõ toerokurukõ se mã toto popyra exiketõ poetoryme, uwa tõ epery apoiry poko.

7 Tãtyke pyra mã toto oxiõtotohme koko,

tupoke pyra roropa mã toto osewomatohme kuenime toehse ahtao.

8 Ypy tõ po tohxikasẽme exĩko mã toto, konopome ahtao,

eutary zupĩko mã toto moro taka omõtohme osesaritohme.

9 Poetõpo tõ pitiko apoĩko popyra exiketõ mana, tynamotome toto ritohme.

Tymõkomokãkara poenõ apoĩko roropa mã toto jũkõ nepehmary epehpyryme.

10 Tupoke pyra exisasaka ytoytõko mã toto tupoke pyra toexirykõke,

omise exĩko mã toto aerokurukohtao tiriiku anymyry poko.

11 Azeitona tõ akurihmõko mã toto azeite ritohme,

uwa tõ purihmãko roropa mã toto uwa eukuru ritohme, popyra exiketõ poetoryme.

Yrome orihnõko mã toto tutuna zehnarykõke aerokurukohtao.

12 Tapurose aexityã, orihsasaka exiketõ roropa kohtãko mã toto tãtakorehmapotohkõme repe.

Yrome onetara Ritonõpo mana.

13 “Popyra exiketõ saereme ehtoh se pyra mã toto.

Toto esemary ao emero, inyriry poko emero rokẽ poko ahtao saereme ehtoh se pyra mã toto.

14 Ahno etapane owõnõko mana tõmehse ahtao tytineruke pyra exiketõ etapatohme.

Mame tykohmãse ahtao omatome exĩko mana.

15 Imeimehnõ nohpo poko exikety kokonie pukuro eraximãko

tõmyty zõtõko mana onenepyra imehnõ ehtohme.

16 Koko, imehnõ tapyĩ taka omõnõko omato kõ mana.

Ytoytopyra mã toto saereme ahtao, saereme ehtoh se pyra toexirykõke.

17 Saereme ehtoh zuno mã toto.

Yrome ikohmamyryhtao enaromyra mã toto.”

18 “Popyra exiketõ tarosẽme exĩko mana tuna zueme exikety a.

Popyra inonorykõ ripõko Ritonõpo mana,

oehpyra ropa mã toto tutupikõ pona erohse uwa tõ poko.

19 Newe tuname exiry sã xixime ahtao, axitũ toehse ahtao, moro sã iirypyryme exiketõ tonahkasẽme exĩko isene exiketõ nonory po.

20 Mokaro poko wenikehnõko jẽkõ roropa mana.

Tyhmokasẽme exĩko toto moromoro tomo a,

tonahkasẽme exĩko mã toto wewe aepukahpyry samo.

21 Morohne exĩko mana pytỹpo tõ anakorehmara toto exiryke, nohpo tõ emũkuahno pyno pyra roropa aexirykõke.

22 Tyjamitunuru ke popyra exiketõ enahkapõko Ritonõpo mana;

tyripõko mana,

mame tyyrypyhpyke exiketõ orihnõko mana.

23 Imehnõ ewomãko Ritonõpo mana isene ro,

yrome toto onenekehpyra mana.

24 Axĩtao rokẽ orẽpyra exĩko popyra exiketõ mana.

Mame axĩ sã aremãnõko mã toto onahpoty samo, tiriiku sã roropa tysahkase ahtao.

25 Onoky sero jomiry zae pyra ekarõko nae?

Onoky ajohpe jekarõko nae?

Moro joturutopõpyry zae mã ipunaka.”