1 Ytoase utupi pona, kuku, ypytyme exikety.

Mira apoĩko ase imehnõ otyro typoxine exiketõ maro;

ano zeni ẽnõko ase, jokuru, uwa eukuru jehnahpyry roropa, suhsu maro.

Otuhtokose osepyno exiketomo.

Eukuru ẽtokose, oetỹtoh pona osepyno ehtoh ke.

2 Nyhnõko exiase, yrome ukurohtao typakase exiase.

Mame ypyno exikety omiry etase ykohmãko omõtoh po.

Omõxi, kuku, ypytyme exikety, opyno ase utuku pitiko, atapuropyra exikety.

Jupuhpyry tahxikure nase konopo ke,

jũsety roropa tahxikure mana konopo ke.

3 Yrome tupoke pyra ase, touse ya.

Upo amururu se ropa hma ya?

Upupuru tõ roropa tukurikase ya.

Oty katohme ixikuromãko ropa ywy?

4 Tomary tyrise omõtoh pokona ypyno exikety a,

atãkyemãko exiase moe pyra toehse ynororo exiryke.

5 Towõse ywy etapuruhmakatohme, ypyno exikety omõtohme.

Jemary tahpase mira ke, jemahxikyry roropa,

omõtoh epuru apoiase etapuruhmakatohme.

6 Mame omõtoh etapuruhmakase ypyno exikety omõtohme repe,

yrome pake toytose ropa ynororo.

Aomiry etary se exiase yronymyryme!

Upiase repe, onenepyra exiase;

ykohmase, yrome jezuhpyra nexiase.

7 Pata erase tõ jenease;

typipohse ywy eya xine,

totatotapase roropa ywy eya xine;

jupõ tupuxihkase apuru erase tomo a.

8 Ynara ãko ase oya xine, nohpo tomo, Jerusarẽ põkomo:

mokyro pyno jexiryke eneryhtao oya xine kaxitoko eya:

apotũkehnõko ase ipyno jehtoh ke ipunaka.

9 Omoro, oryximehxo exikety, imehnõ nohpo tõ motye, yna zuruko:

opyno exikety imehnõ motye kure nae?

Oty nae ynororo imehnõ nohpo pyno exiketõ motye kurehxo aehtohme?

Oty pokoino yna omiry etapõko mah moro samo oya?

10-11 Orutua kõ 10 miumãkõ ahtao, mokyro, ypyno exikety enekurehxo mana,

jamihmehxo exiketyme roropa mana.

Ẽmyty enekure mana ipunaka, nuaseme potu.

Zũsety mosa mana,

mirimirime potu mana, xinukutume roropa titiko arokyry samo.

12 Enuru utukuimo enuru sã mana iporiry ehpio exikety samo,

utukuimo karimutume suhsu samo,

epỹko ynororo opotunety ehpio.

13 Ẽmyty enekure mana, tupito po otyro typoxine exiketõ arykahpyry samo.

Ipotapihpyry ririo sã mana,

aomiry kure mana ixtaratu samo.

14 Emary tõ kure rokẽ mã tyrise,

omahtao emeporyme uuru risẽ joia tõ samo.

Zoko kure mana maafim tykorokase exikety samo,

sapira tõ risẽ emeporyme.

15 Jaxiry maamore risẽ sã mana xikihme, tapõ po uuru risẽ kurã po.

Ypyno exikety ypy tõ sã mana Ripano po, enekure apupari mosahxo aexityã samo.

16 Anusasame mana ĩtapihpyry potyry ya,

emero ipoko yzamaro mana.

Moro sã ypyno exikety mana, moro sã yniome exikety, nohpo tõ Jerusarẽ põkomo.