1 Tohrame jahtao jynyhtoh po, kokoro rokẽ tykohmãse ahtao tõsenehse ywy ỹpynume exikety poko;

tupise ynororo ya repe,

yrome onenepyra tokurehse ywy.

2 Mame towõse sã ywy,

ytoase sã pata poro porehme, osema tõ ae, oximõtoh kuroko.

Ỹpynume exikety zupiase;

zupiase repe, onenepyra tokurehse ywy.

3 Erase tomo a, pata enery poko toto ahtao, tonese ywy.

Ekaropoase eya xine: “Ỹpynume exikety menetou?”

4 Mokaro turumekase ahtao ya, enease.

Tapoise sã ynororo ya.

Onurumekara ropa exiase,

mokyro arotohto ya aja tapyĩ taka, jenurutopõpyry taka.

5 Nohpo tomo, Jerusarẽ põkomo, õmirykõ etapoko kapau tõ netaryme,

kapau nohpory tõ netaryme roropa,

yna onerekohmara oehtohkõme tohrame yna ahtao oximaro.

6 Onoky mokyro oehnõko nae ona tonorẽ poe?

Orexĩto sã mana, typoxine mira ke, ixtaratu ke roropa,

emero rokẽ ixtaratu tokamose exikety osepekahketõ nekamory samo?

7 Eneko ke! Saromão kahu oehnõko mana,

60me soutatu tõ maro kurehxo exiketomo Izyraeume exiketomo, tuisa konõto ewomananomo.

8 Mokaro emero emese kure mã toto osetapary poko tapema ke,

tamorepase ynaroro osetapary poko.

Typyreke roropa mã toto tõsewomatohkõme koko ahtao, zehnotokõ winoino.

9 Tuisa apõ kurã tyripose tuisa Saromão a, wewe kurã ke, tykahu ao.

10 Xikihme exiketõ moro ao tapuhse eya parata ke;

tyripose kamisa kurã ke te, uuru ke tomepore exikety samo.

Apõ moro ao kamisa risẽ mã arazumano tyrise tomeseke sã nohpo tõ Jerusarẽ põkomo a.

11 Nohpo tõ Xião põkomo, osehtoko tuisa enese!

Tuisa Saromão typarimãke zupuhpyry po, jẽ nekarohpyry eya ipytatoh po, atãkyematoh po.