146
Ritonõpo eahmary, jũme Tuisame exikety
1 “Kure mase, Ritonõpo,” sykatone!
“Kure mase, Ritonõpo,” ãko ase,
opyno jexiryke yronymyryme.
2 Isene ro jahtao Ritonõpo oneahmakehpyra ase,
eremiãko ase eahmaryme joorikyry ponãmero.
3 Ahno onyripyra ehtoko opynanohnekõme,
tuisame toto ahtao ro;
opynanohsaromepyra mã toto
orihketõme rokẽ toexirykõke.
4 Toorihse toto ahtao, nonome exĩko ropa mã toto,
morara ahtao tyriry se aexihpyry tonahse
exĩko toh mana.
5 Tãkye mã mokyro takorehmaneke Ritonõpo ke,
Jako esemy;
tosẽme Ritonõpo enetupuhnõko mana typynanohneme.
6 Kapu Rihpõme mã ynororo te, sero nono te,
tuna konõto maro, nakuaõkõ maro emero porehme!
Tõmihpyry omipona exikehpyra Kuesẽkõ mana;
7 tyrohmanohpose exiketõ ewomãko mana,
omise exiketomo a tonahsẽ ekarõko mana.
Ãpuruhpyry taõkõ tũtanohpõko ropa
Ritonõpo Kuesẽkõ mana,
8 tonurãkara tonure tyrĩko ropa mana.
Aepukatyã anỹnõko ropa mana,
tõmiry omipona exiketõ pyno mana.
9 Katonõ imehnõ nonory poe aehtyã
kynonorykõ pona ewomãko mana, pytỹpo tomo te,
poetõpo tõ roropa akorehmãko mana,
yrome popyra ehtoh poko exiketõ anakorehmara mana.
10 Tuisame exikehpyra Kuesẽkõ mana.
Jerusarẽ põkomo, jũme Oesẽkõ tuisame
exikehpyra mana.
Kure mase, Ritonõpo!