111
Ritonõpo eahmatopo
1 Kure Ritonõpo mana, kahtoko! Ipoetory tõ
oximõmãkõ maro Ritonõpo Kuesẽkõ eahmãko ase
yjamitunuru ke porehme.
2 Emese kure Ritonõpo mana inyrityã poko,
osenuruhkãko ase! Morohne poko tãkye exiketõ enetuputyry sehxo mã toto.
3 Inyrihpyry emero emese kure aexiry
enetupuhpõko mana, tuisamehxo aexiry roropa.
Zae aexiry jũme anamonohpyra mana.
4 Inyrityã kurã poko onuenikehkamexipopyra
Ritonõpo mana kyya xine;
kypyno xine mana, kuãnohpyra xine roropa mana.
5 Tonahsẽ ekarõko mana tõmiry
omipona exiketomo a,
wenikehpyra roropa mana jũme
tynetapohpyry poko kyya xine.
6 Ritonõpo a tyjamitunuru tonepose typoetory Izyraeu
tomo a imehnõ nonory tokarose ahtao eya xine.
7 Anamonohpyra mana, zae roropa mana tynyriry
poko emero porehme;
inyripohpyry emero onytyoromara mana,
naeroro torẽtyke pyra sehtone.
8 Jũme exikehpyra mana ajohpe pyra Ritonõpo
exiryke, zae rokẽ ynororo exiryke.
9 Typoetory tõ tymyhpokase Ritonõpo a,
tõmiry totapose roropa eya xine
jũme onytyoromara ehtohme.
Kure mana jamihme roropa!
10 Tuaro oexiry se awahtao,
apitoryme Ritonõpo enetupuhko Oesẽme.
Aomiry omipona exiketõ tuaro tyripõko mana.
“Kure mase, Ritonõpo,” sykatone jũme!