47
Ritonõpo, nono Esẽme porehme
Kora tõ eremiatopo.
1 Tahtah kaxitoko atãkyemaryme, ahno tõ emero!
Opore eremiatoko Ritonõpo eahmaryme!
2 Kuesẽkõ imehxo mana, kure ehtoh
se rokẽ mana kyya xine;
Tuisa imehxo mana, sero nono Esẽme porehme.
3 Ritonõpo a imehnõ ahno typoremãkapose yna a;
imeimehnõ nonory põkõ tuisaryme yna tyrise eya.
4 Sero nono tymenekase eya kuesarykõme ehtohme,
sero nono poko tãkye toehse ipoetory tomo,
mokaro pyno mã ynororo.
5 Onuhnõko Ritonõpo mana tapõ pona,
tuisa konõto apõ pona.
Morara ahtao tãkye exiketõ kohtãko,
rue tõ etõko mã toto.
6 Eremiatoko, Ritonõpo eahmaryme;
eremiatoko Kutuisarykõ eahmaryme!
7 Eremiatoh ke Ritonõpo eahmatoko!
Tuisame mana sero nono Esẽme porehme.
8 Tapõ po typorohse Ritonõpo mana,
tuisa konõto apõ kurã po;
sero nono põkõ Esẽme mana porehme.
9 Sero nono põkõ tuisary tõ oximõnõko mã toto
Ritonõpo poetory tõ maro,
Aparão Esẽ poetory tõ maro.
Sero nono põkõ jamitunuru emero motye tuisamehxo mana;
imehnõ emero Esẽme Ritonõpo mana.