1 Aimo umũkuru, otato exiko jomiry a tuaro jexiryke, josenetupuhtoh zae exiryke roropa. 2 Moro sã awahtao zae ehtoh poko zuaro exĩko mase, õmiry roropa tyriko imehnomo a enetupuhtohme zuaro oehtoh poko. 3 Imepỹ pyty potapihpyry, otarame anusasame mana oya, ano zeni samo, oeahmary eya otarame anusasame mana azeite samo; 4 yrome imeĩpo mã karapa sã itunu exĩko oya, etuarimãko mase. 5 Mokyro nohpo yhtõko mana aorihtyã esaka; esemary etyhpyry oorihtohme mana. 6 Mokyro nohpo isene ehtoh ae ytopyra mana; xiaxiake ytõko mana, yrome osema kurã waro pyra mana.

7 Etako pahne, aimo, wenikehpyra exiko jomiry poko! 8 Mokyro panõ nohpo ahtao, ameke rokẽ exiko eya. Itapyĩ omõtoh pũtokoxi ytopyra exiko! 9 Oytoryhtao mokyro tapyĩ taka imehnõ omyakamãko mã toto, oesahpokoxi tamuximehxo exĩko mã toto, yrome poetome ro awahtao orihnõko mase, taorihmapose ozehnotokomo a exiryke. 10 Moromeĩpo omõkomory apoĩko imehnõ mana, awaro pyra exiketomo, anapoityã oerohtamitume imehnõ mõkomoryme exĩko mana. 11 Pusuh ãko mase oorihtoh po, opũ tonahsẽme exĩko axĩ pyra. 12 Mame ynara ãko mase:

— Jamorepananõ zehno exiase! Zae ehtoh poko jurunanõ omipona pyra exiase! 13 Jamorepananõ onetara exiase, otato pyra rokẽ exiase. 14 Mõtoino rokẽ tyyryhmase ywy, ehxirõko ase jarao imoihmãkõ neneryme.

15 Naeroro kure opyty maro exiko, ynoro se rokẽ exiko. 16 Imehnõ nohpo tumũkuase oya ahtao mokaro opoenõ ãkorehmara mã toto. 17 Kure opoenõ wãtanopyry oya ãkorehmatohme, imehnõ akorehmatohme pyra. 18 Naeroro tãkye exiko opyty maro, imaro rokẽ atãkyemako opytyme toehse exiryke, 19 oryxime exiryke kure rokẽ ytoytõko mana kapau samo. Inyriry kurã poko tãkye rokẽ exiko, ah opyno aehtoh azamaro nexino! 20 Aimo, otyme kure imepỹ nohpo maro se oexiry? Otyme kure imehnõ pyxiã poko openetary nae? 21 Onyriry emero enẽko Ritonõpo mana, oytoytory enẽko roropa mana. 22 Zae pyra exiketõ nyriry onokyro apoitoh sã mana. Atapoĩko ynororo mana tarãpa ao samo, tyyrypyry ke ro. 23 Zae ehtoh omipona pyra toexiryke orihnõko mana. Iirypyry mokyro arõko mana aorihtoh pona, rowohpe exikety samo.