23
1 Mame ynara tykase Paraão Parake a:
— Apoto apõ 7me tyriko taro, pui mũkuru tõ enehko 7me, 7me kaneru tõ maro.
2 Moro tyrise Parake a, Paraão omiry omipona. Mame toiro pui mũkuru tyahkase eya xine toiro kaneru maro apoto apõ po emero. 3 Ynara tykase Paraão, Parake a:
— Taro exiko onyahkahpyry pũto, morotona ytõko ase. Otarame Ritonõpo oehnõko ya oturuse. Mame inyripohpyry emero ekarõko ase oya.
Naeroro Paraão tõnuhse toiroro somokyhmã emory pona. 4 Moroto Ritonõpo tõseporyse imaro. Ynara tykase Paraão:
— Apoto apõ 7me yrino. Pui mũkuru tõ 7me tyahkase ya 7me kaneru tõ maro moro apoto apõ tõ po.
5 Mame omi tokarose Ritonõpo a Paraão a ekarotohme Parake a. Mame tonyohse ropa ynororo eya Parake zurutohme. 6 Naeroro toytose ynororo Parake a. Tynyahkatopõpyry pũto ro nexiase Moape tamuximãkõ maro.
7 Mame ynara tykase Paraão Ritonõpo poe:
“Parake, Moape tõ tuisary,
jenepyase xiaro, Xiria poe,
ypy tõ poe xixi tũtatoh wino.
‘Osehko, — tykase ynororo ya,
— ajohpãme sã popyra Izyraeu tõ tyripoko!
Popyra ehtoh enehpoko Izyraeu tõ pona!’
8 Mokaro popyra onyriposaromepyra ase,
popyra toto onyripyra Ritonõpo ahtao.
Toto onuãnohposaromepyra ase,
toto wãnopyry se pyra Ritonõpo ahtao.
9 Topuimo emory poe,
ypy emory poe Izyraeu tõ enẽko ase.
Oxiekyryme mã toto toiroro samo.
Imehnõ ahno motye kure ehtoh tokarose Ritonõpo a, eya xine.
Moro waro mã toto.
10 Jako pakomotyã putoh katoh sã mã toto;
tuhke mã toto, ikuhpỹme.
Jorikyry se ase mokaro Ritonõpo poetory tõ samo.
Jorikyry se ase torẽtyke pyra,
ajohpe pyra exiketõ samo.”
11 Mame ynara tykase Parake Paraão a:
— Otara kyrino? Kuenehpoase xiaro popyra jepetõkara tyripotohme repe. Yrome kure rokẽ toto ripõko mase.
12 Ynara tykase Paraão:
— Ritonõpo nurutopõpyry rokẽ poko oturũko ase.
Paraão oturutoh asakoro ehtopo
13 Mame ynara tykase Parake Paraão a:
— Eropa imepỹ pona, moro poe Izyraeu tõ enẽko mase zokonaka rokene, emero pyra. Ajohpame sã popyra mokaro tyripoko moro poe.
14 Tarose ynororo Parake a ona Zofim pona, ypy Pixika emory pona. Moroto apoto apõ tõ tyrise eya 7me. Epona xine tynekarory tyahkase eya toiro pui mũkuru toiro kaneru maro emero apoto apõ po.
15 Mame ynara tykase Paraão Parake a:
— Taro exiko onekarohpyry pũto. Morotona ytõko ase oseporyse Ritonõpo, Jesẽ maro.
16 Mame Ritonõpo tõseporyse Paraão maro. Omi tokarose eya Parake zurutohme. Mame tonyohse ropa ynororo Parake a omi ekarotohme eya. 17 Naeroro tooehse ropa Paraão, tõseporyse Parake maro tynyahkahpyry pũto, Moape tõ tamuximãkõ maro. Parake a tõturupose eya Ritonõpo nekarohpyry poko. 18 Sero omi tokarose Paraão a Parake netaryme:
“Osehko Parake, Zipoa mũkuru,
etako ke ynekarory oya.
19 Ahno sã pyra Ritonõpo mana,
ajohpe exiketõ sã pyra;
tõsenetupuhtoh onytyoromara mana.
Tõmiry totapose ahtao Ritonõpo a,
moro rĩko mana;
‘Tyrĩko ase,’ tykase ahtao Ritonõpo a tyrĩko mã rahkene.
20 Tyripose ywy eya kure rokẽ tyripotohme;
kure rokẽ tyripose ahtao eya,
moro onytyoromasaromepyra ase.
21 Enẽko ase imeĩpo Izyraeu tõ ehtopo,
toto onyporemãkara exĩko imehnõ mana,
toto onutuarimapopyra exĩko roropa mã toto.
Ritonõpo, Izyraeu tõ Esẽ, toto maro mana,
kohtãko mã toto Ritonõpo,
Tutuisarykõme exiry poko.
22 Tonehse toh nexiase Ritonõpo a Ejitu poe.
Jamihmehxo mã ynororo pui orutua itu htaõ samo.
23 Pyaxi tomo a, popyra toto ripory kukuruhtao
toiparo rokẽ moro kuhnõko mã toto,
Izyraeu tõ onyryhmara mã toto.
Seromaroro ynara ãko mã toto emero Izyraeu tõ poko:
‘Enetoko ke Ritonõpo nyrihpyry!’
24 Izyraeu owõnõko mana reão nohpory samo,
reão sã roropa oseremara mana
tykarimory onõpyra ro tahtao,
imunuru onẽpyra ahtao roropa.”
25 Mame ynara tykase Parake Paraão a:
— Mokaro Izyraeu tõ popyra onyriposaromepyra awahtao, kure toto onyripopyra exiko roropa.
26 Ynara tykase Paraão eya:
— Morara exiryke moro sã tykase ywy oya, Ritonõpo nekarory rokẽ ekarõko ase oya, tykase ywy.
Omi oseruaõ aehtopo
27 Mame ynara tykase Parake Paraão a:
— Ajohpame sã ymaro eropa imepỹ pona. Otarame moro poe Ritonõpo zamaro exĩko mana popyra mokaro tyripory oya.
28 Naeroro Paraão tarose Parake a ypy Peoa emory pona ona enetohme mya. 29 Ynara tykase Paraão eya:
— Apoto apõ 7me tyriko, 7me pui mũkuru tõ zahkatohme 7me kaneru tõ maro.
30 Moro tyrise Parake a Paraão omipona. 7me pui mũkuru tõ tyahkase eya 7me kaneru tõ maro moro apoto apõ tõ po.