1 Morarame tõsenepose Ritonõpo Aparão a wewe kurã zopino, pata Mãre po. Moroto xixi jetũ ahtao Aparão typorohse tytapyĩ pota tao. 2 Mame tõsenuhmase ynororo. Oseruao orutua kõ tonese eya xikihme osema tao. Toto eneryhtao tururume toytose ynororo toto ẽpatakãmase. Tosekumuru po typorohse ynororo, tõmyty po nono pona toto ẽpataka. 3 Ynara tykase ynororo:

— Moehtou? Ajohpãme sã ehmaropa ytapyĩ taka oseremase pitiko. 4 Tuna enehpõko ase opupurukõ kurikatohme. Moromeĩpo oseremãko matose taro wewe zopino. 5 Tonahsẽ pixo enehnõko ase. Mame ẽtaikaxĩpo, jamihmehxo ytõko ropa matose. Jãkyemãko matose tooehse tarona oexirykõke. Anapyrykõ pixo enehtã aporo, tykase.

— Kure, tykase toto, — ẽtaikãko ynanase amaro, tykase toto.

6 Axĩ toytose Aparão tapyi taka Sara zuruse:

— Axĩ ke tiriiku apoiko kurano wyi ritohme axitunety.

7 Moromeĩpo tururume toytose ynororo pui tõ esaka, pui mũkuru kurã menekase. Mokyro tokarose eya typoetory a etapatohme te, ipurutohme, tõsẽme. 8 Mame pui suhsuru akyhsemy tapoise Aparão a pui suhsuru roropa te tõsẽ maro. Morohne typorohkase eya toto napyryme. Moroto, wewe zopino moro tonahsẽ tokarose eya toto otuhtohme, toto enẽko kynexine. 9 Mame tõturupose ynaroro:

— Otoko na Sara, opyty?

— Tapyi tao, tykase Aparão.

10 Toiro orutua ynara tykase:

— Taroino toiro jeimamyry taropose ahtao oenese oehnõko ropa ase. Morara ahtao opyty Sara emũkuãko mana, tykase.

Sara tapyi tao kynexine toto mykae, tapyi pota tao, toto omiry etãko. 11 Aparão tamuhpõme kynexine, Sara kunumuxime roropa, pake tumũkehse ynororo. 12 Naeroro toto omiry etaryhtao tyya toexianase tukurohtao, tounohse toto eya:

— Nary! Emũkuapỹme toehse ase ipunaka. Ypoko pyra roropa ynio toehse mana tamuhpõme toexiryke, tykase.

13 Mame ynara tykase Ritonõpo Aparão a:

— Oty katohme jomiry eunohnõko opyty nahe? “Emũkuapỹme ase ipunaka, kunumuxime,” ãko oty katohme? 14 Oty tupime nae Ritonõpo a? Arypyra, emero tupime pyra ya. Naeroro morara ykano: “Taroino jeimamyry taropose ahtao oehnõko ropa ase. Mame morara ahtao Sara emũkuãko mana.”

15 Moro etaryke tyya, ihxipỹke toehse ynororo, ynara tykase:

— Õmiry oneunohpyra akene, exianara akene.

Yrome ynara tykase Ritonõpo:

— Arypyra, ajohpe pyra jomiry meunohno; mexianano.

16 Morarame toytose toto orutua komo Sotoma osenetoh pona. Toto maro toytose Aparão toto esemary ae toto aropotohme. 17 Mame ynara tykase Ritonõpo tyya rokene: “Josenetupuhtoh ononẽpyra ase Aparão wino. Ynyriry poko zurũko ase. 18 Ipakomotyã mã imoihme exĩko mã toto, ahno imehxo exĩko mã toto. Mose pokoino kure rokẽ imehnõ ahno rĩko ase, emero. 19 Mose tymenekase ya jomiry omipona typoenõ ripotohme, typakomotyã roropa jomipona ripotohme, zae toto ehtohme. Morara toto ahtao, zae rokẽ ehtoh riryhtao eya xine, jomihpyry ae ro kure rokẽ mose rĩko ase.”

20 Mame ynara tykase Ritonõpo Aparão a:

— Iirypyryme xihpyryme Sotoma põkõ toehse, Komora põkõ roropa, ãko mã imehnomo toto poko. 21 Naeroro morotona ytõko ase toto enese, ajohpe pyra toto ekãtotoh waro jehtohme.

22 Mame asakoro mokaro toytose Sotoma pata esemary ae. Yrome Ritonõpo maro ro Aparão kynexine. 23 Ameke pyra toehse Aparão eya tõturupotohme.

— Yrome ahno kurãkõ nae ahtao Sotoma po, mokaro wãnohnõko mah popyra exiketõ mahro? 24 Otarame 50me ahno kurã nae moro pata po ahtao, morara ahtao pata enahkapõko mah? Pata onypynanohpyra hma mokaro kurãkõ 50mãkõ moroto ahtao? 25 Ahno kurã onetapasaromepyra mase pohnõ maro, iirypyryme pyra toto ahtao. Morara onyripyra exiko. Omoro rokẽ zae sero nono põkõ apiakaneme mase. Zae rokẽ ahno apiakãko mase.

26 Ynara tykase Ritonõpo eya:

— 50me ahno kurã eneryhtao ya Sotoma po, moro pata pynanohnõko ase tytororo mokaro pokoino, tykase.

27 Mame Aparão ynara tykase ropa:

— Ajohpãme sã yzehno pyra exiko jomiry poko. Omoro mase Ritonõpo, ywy ase ahnome rokene. 28 Otarame 45me rokẽ kurãkõ nae ahtao, pata enahkãko ma 5me pyra ahtao 50me ehtohme?

Tozuhse ropa Ritonõpo a:

— 45me kurãkõ eneryhtao ya pata onenahkara ase.

29 Mame Aparão tõturupose ropa mya roropa eya:

— 40me rokẽ kurãkõ nae ahtao, otara exĩko? tykase.

— Mokaro 40mãkõ, kurãkõ pyno jexiryke morotõkõ onenahkara ase, tykase Ritonõpo.

30 Mame ynara tykase Aparão:

— Yzehno pyra exiko, Ritonõpo, ajohpãme samo ynara karyhtao, 30me kurãkõ nae ahtao, otara exĩko? toto enahkapõko mah?

Ynara tykase Ritonõpo eya:

— 30me nae ahtao pata põkõ pynanohnõko ase. Iirypyrykõ korokãko ase, tykase.

31 Ynara tykase Aparão:

— Ehxirõko ase, yrome zae pyra jahtao yyrypyry ikorokako: 20me rokẽ kurãkõ ahtao otara ãko mah moro põkõ enahkãko ro mahno?

— Mokaro 20mãkõ pyno jexiryke pata põkõ onenahkara ase, tykase Ritonõpo.

32 Etyhpyryme ynara tykase Aparão:

— Ajohpãme sã yzehno pyra exiko ynara ekaroporyhtao etyhpyryme rahkene. Otarame 10me rokẽ kurãkõ enẽko mase moroto, tykase.

— Mokaro 10mãkõ pokoino moro pata põkõ onenahkara ase, tykase Ritonõpo.

33 Mame tõturukehse Ritonõpo ahtao Aparão maro toytose ynororo. Aparão toytose ropa tytapyĩ taka.