23
Tawi omihpyry etyhpyry
1 Ynara Tawi, Jese mũkuru omihpyry etyhpyrymano; Ritonõpo nymenekahpyryme nexiase tuisame aehtohme Izyraeu tõ esẽme. Eya eremiatoh tyrise kurã ke Izyraeu tõ eremiatohme. Ynara tykase ynororo:
2 Ritonõpo Zuzenu oturũko mana jomiry ae, inekarohpyry ỹtary ae.
3 Ritonõpo, Izyraeu tõ esẽ tõturuse,
Izyraeu ewomane juruase:
Zae ehtoh ke typoetory tõ akorehmaryhtao tuisa a,
ise Ritonõpo ehtoh riry poko typoetory tõ akorehmaryhtao eya,
4 ẽmepyry sã mana akurume pyra ahtao,
xixi saereme potu ehtoh samo
konopo oehkehxĩpo xirikozuru ehtoh samo.
5 Moro saaro kure rokẽ ypoenõ, ypakõ roropa rĩko Ritonõpo mana, tõmihpyry totapose ya exiryke, jũme onytyorõmara ehtohme.
Moro poko rokẽ penetãko ase;
moro ke rokẽ orẽpyra exĩko ase,
moro rĩko Ritonõpo mana, anamonohpyra, zuaro ase.
6 Yrome iirypyrymãkõ, omoxino sã typahse mã toto:
oma ke anapoisaromepyra ahno mana;
7 Toto poko ahtao ipoko ehtoh se rokẽ mana, kurimene risemy te, wewe risẽ otarame;
mokaro mã tyahsẽme exĩko ipunaka apoto ke.
Tawi soutatu tõ orẽpyra exiketomo
(1 Koronika 11.10-47)
8 Ynara mã soutatu tomo, Tawi maro orẽpyra exiketomo: Josepe-Pasepete, Takemoni pono “Oseruaõkõ” tuisary; tywaratã ke tõsetapase ynororo 800mãkõ maro, totapase toto eya emero porehme toiro etonatoh tao.
9 Zakorony Ereaza, Toto mũkuru, Aoi pary “Oseruaõkõ” maro nexiase. Osetapatoh po Tawi maro nexiase pirixteu tõ maro osetapãko. Izyraeu tõ toepase, 10 yrome ahno etapary poko penekehpyra nexiase ynororo. Mame pirixteu tõ totapakehse ahtao tytapemã onurumekasaromepyra emary nexiase, tomahxinaitase toexiryke. Takorehmase ynororo Ritonõpo a pirixteu tõ poremãkapory poko. Moromeĩpo, tõsetapakehse tahtao xine Izyraeu tõ soutatu tõ toytose ropa Ereaza a aorihtyã ekepyry mõkomohpyry apoitohme.
11 Mokyro mykapo Sama nexiase, Aje mũkuru, Harara pono. Pata Rei po pirixteu tõ tõximõse tupito po, erewija tõ esao. Moro poe Izyraeu tõ toepase pirixteu tõ kurũke. 12 Yrome Sama epara toehse tupito po, tupito ewomatohme, morararo pirixteu tõ totapase eya. Ritonõpo a takorehmase ynororo pirixteu tõ poremãkapory poko.
13 Mame eina toehse ahtao, tonahsẽ anỹtoh zano exisasaka ahtao oseruao soutatu tõ “30mãkõ” wino, tyhtose toto Tawi enese, eutary Aturã pona. Moroto Tawi nexiase, pirixteu tõ roropa tõsesarise jakanahmã Ahno konõto po. 14 Morara ahtao Tawi nexiase tynyrihpyry jamihme exikety tao, pirixteu tõ imoihmãkõ pata Perẽ po nexiase. 15 Mame typenetase Tawi tuna poko tõkurume, ynara tykase ynororo:
— Tuna sehxo hano, jokurume pixo pẽkamã poe, Perẽ omõtoh myhto. Yrome enehne pyra, myhene, tykase.
16 Morara kary etaryke tyya xine, oseruao soutatu tõ, orẽpyra exiketõ toytose pirixteu tõ esary rãnakuroko, tuna anỹse pẽkamae enehtohme Tawi a. Yrome moro tuna onẽpyra Tawi nexiase, tukuãse rokẽ eya nono pona, tynekaroryme Ritonõpo a. 17 Ynara tykase ynororo:
— Ritonõpo Jesemy, sero tuna onẽsaromepyra ase! Moxiã munuru enyry sã mana ya moro tuna tõse ya ahtao, otapatõkõ kuroko toytose toto exiryke enehtohme ya, tykase.
Morara karyke moro tuna onẽpyra tokurehse Tawi.
Morohne tyrise mokaro a “Oseruaõkõ” orẽpyra exiketomo a.
18 Morarame Apisai, Joape akorony, Zeruia mũkuru, “30mãkõ” tuisaryme nexiase. 300me topetõkara totapase eya, warata ke, naeroro orẽpyrahxo exiketyme tokãtose ynororo “30mãkõ” maro. 19 Mokaro “30mãkõ” orẽpyrahxo exiketõ maro Apisai nexiase, toto esẽme, imehxo toexiryke. Yrome, mokaro “Oseruaõkõ” mokyro motye toh nexiase.
20 Penaia, Jeoiata mũkuru, Kapazeu põ roropa orẽpyra exiketyme nexiase, soutatume. Moapita tõ soutatu konõto tomo asakoro totapase eya. Mame kuenime konõto tõmehse ahtao, neweme ahtao tyhtose ynororo oramãka, moro tao reão totapase eya. 21 Ejitu põ konõto roropa totapase eya, tywaratake exikety. Tõsetapase Penaia mokyro Ejitu põ maro, tymyxiry ke. Mame warata tapoise eya mokyro emary poe, ike totapase ynororo eya. 22 Morohne tyrise Penaia a. Naeroro tuisame toehse “30mãkõ” orẽpyra exiketõ maro. 23 Imehnõ tymarõkõ motye orẽpyra nexiase. Yrome mokaro “oseruaõkomo” imotye toh nexiase. Morara exiryke mokyro tymenekase ynororo Tawi a towomananõ tuisaryme ehtohme.
24 Mokaro “30mãkõ” orẽpyra exiketõ maro Asaeu, Joape akorõ nexiase te; Eranã, Toto mũkuru, Perẽ pono te; 25 Sama te, Erika roropa pata Harote põkomo te; 26 Here, Perete pono te; Ira, Ike mũkuru, Tekoa pono te; 27 Apieze, Anatote pono; Mepunai, Husa pono; 28 Saumõ, Aoi pono; Maarai te, 29 Herepe, Paana mũkuru maro, Netopa põkomo; Itai, Ripai mũkuru, Kipea pono, Pẽjamĩ nonory po; 30 Penaia, Piratõ pono; Hitai, jakanahmã Kaaxi pono; 31 Api-Arapõ, Arapa pono; Azamawete, Paurĩ pono. 32 Eriapa, Saaupõ pono; Jasẽ mũkuru tomo te; Jonata te; 33 hararita tomo: Sama te, Aião, Saraa mũkuru maro te; 34 Eriperete, Akasapai mũkuru, Maaka pono; Eriã, Aitopeu mũkuru, Kiro pono te; 35 Hezero, Karameru pono te; Paarai, Arape pono te; 36 Ikau, Natã mũkuru, Zopa pono; Pani, Kate nonory pono; 37 Zereke, Amõ pono te; Naarai, Peerote pono, Joape pyre aroneme, Zeruia mũkuru te; 38 Ira te, Karepe roropa, Jatia põkomo; 39 Uria, heteume exikety.
Mokaro 37me atapona, soutatu tõ, orẽpyra exiketomo.