Amos
Ya meippanggep ni libluh nan Amos
Hi Amos ey hakey ni prophet nan Apu Dios idan iJudah di south, nema-ma-maddan iIsrael di north. Yan nunman ni kapantuttudduin Amos idan iIsrael ey et-eteng hu kabaelan idan sindalu dad man niya kekeddangyan ida tutu-u, anin ida etan ni kamengipappangngulun hi-gada. Nem inhelan Amos ida et peamta tu e mebahbah idalli, tep inwalleng da hu nekitbalan Apu Dios ni hi-gada niya eleg da pinhed ni mambangngad ni menaydayaw ni hi-gatu.
Ya hakey mewan ni nambahulan da ey dadda kapanliligat hu nangkewetwet (2:7, 4:1, 5:11-12 et ya 8:4-6), beken ni limpiyuh daka pehding, lawah daka pehpehding, ida kamambuttebutteng niya daka ngenghaya hu inhel Apu Dios e mantuttuyyuddan liwat da. Ya nemahhig ni liwat da ey daka daydayawa hu beken ni makulug ni dios. Huyyaddan iIsrael ey lawah ida e heniddan tutu-un nampambebley di nanlinikweh di bebley da. Et humman hu, nanna-ud ni kastiguen Apu Dios ida tutu-u tu tep ya liwat da, henin pehding tuddan tutu-ud edum ni bebley. Entanni tu-wangu et nelabah hu telumpulun toon meippalpun nanghelan Amos ni nunya ey inlaw idan iAssyria di bebley da e nambalin daddan balud diman. (722-721 B.C.)
Ya neitudek eyad libluh:
1. Ya pengastiguan alin Apu Dios idan tutu-un nampambebley di nanlinikweh di Israel niyad Judah. (chapters 1:1–2:3)
2. Ya pengastiguan alin Apu Dios idan tutu-ud Judah, nema-ma-madda tutu-ud Israel. (chapter 2:4-16)
3. Ya nengibungetan Amos idan tutu-ud Israel niyad Judah tep ya liwat dan Apu Dios et ehelen tun hi-gada e mantuttuyyuddan liwat da tep kamangkedettengi law pengastiguan idan Apu Dios. (chapters 3–6)
4. Ya nengipei-innepan Apu Dios nan Amos ni meippanggep ni kebahbahan alin Judah niya Israel. (chapters 7:1–9:10)
5. Ya nanghelan Apu Dios ni pengibbangngadan tuddan helag Israel di bebley da et bendisyonan tudda. (chapter 9:11-15)
1
1 Yahhuy ida hu inhel Amos ni impeamtan Apu Dios ni hi-gatu meippanggep ni Israel eman ni nelabah dewwan toon et han wada etan yegyeg. Hi Ussiah hu patul di Judah ni nunman, ey hi Jeroboam e u-ungngan Jehoas hu patul di Israel. Hi Amos ey iTekoa ni kamampattul ni kalneroh.
2 Kantuy: Inlet Apu Dios hu ehel tud Tempol tud Duntug e Zion di Jerusalem. Ey pinhakkey ey nema-ganan hu helek di kudal di Karmel.
3 Kan Apu Dios ey “Nanliwaliwat hu tutu-ud Damascus et mukun nanna-ud ni kastiguek ida tep nemahhig bunget kun hi-gada. Nemahhig hu impahding daddan tutu-uk ni iGilead e heni dadda impadelan di illikkan ni gumek ngipen tu. 4 Et humman hu, peellik ali apuy ma-lat malgab hu baley ni binehwat nan patul e hi Hasael. Niya ma-lat magiheb et mebahbah hu nehammad ni luhud ni kinapyan Benhadad. 5 Bahbahen kudda eheb di Damascus niya pe-kal kudda nampambebley di Nandeklan e Aben, anin etan Ap-apud Bet Eden. Ey pellaw kudda tutu-ud Syria di Kir et mambalin idan balud diman.” Hi-gak e Ap-Apu hu nanghel nunya.
6 Immehel mewan hi Apu Dios ey kantuy “Nanna-ud ni kastiguen kudda dama iGaza tep nanliwaliwat ida. Inlaw dadda tuuk di Edom et panhimbut daddadman. 7-8 Peellik hu apuy di Gaza et magiheb etan nehammad ni luhud da. Niya bahbahek ida hu ap-apud Asdod niyad Askelon, anin idan iEkron et matey idan emin iPilistia et endi an metdaan ni hi-gada, anin hakey.” Hi-gak e Ap-Apu e Eta-gey ni peteg hu nanghel nunya.
9 Immehel mewan hi Apu Dios ey kantuy “Nanliwaliwat ida dama tutu-ud Tyre et mukun nanna-ud ni kastiguek ida. Eleg da u-unnuden hu nekitbalan dan Israel e mambibinaddang ida. Et pambalin da kumedek ida iIsrael ni himbut di Edom. 10 Et humman hu, peellik hu apuy ma-lat magiheb etan nehammad ni luhud di Tyre.”
11 Immehel mewan hi Apu Dios ey kantuy “Nanliwaliwat ida dama tutu-ud Edom et mukun nanna-ud ni kastiguen kudda. Heni da dindinweng hu edum dan iIsrael et nemahhig hu impahding dan hi-gada e endi hemek da. 12 Et humman hu, peellik ali apuy di et-eteng ni bebley dad Teman et magiheb etan nehammad ni luhud di Bosrah.”
13 Immehel mewan hi Apu Dios ey kantuy “Nanliwaliwat ida dama iAmmon et mukun nanna-ud ni kastiguen kudda. Tep yan nengubatan dan Gilead ma-lat ideldel da pappeg ni bebley da ey lawah ni peteg hu impahding dan tutu-udman e nambeghi da egeh idan bibi-in nampambutsug e inusal da ispadah da. 14 Et humman hu, peellik hu apuy di Rabbah et magiheb ni emin hu nehammad ni luhud da, anin idan etata-gey ni baley ni kapanha-adin guwalya. Mantetekkuk idalli buhul dan mengubbat ni hi-gada. Niya nemahhig ali pehding dan hi-gada e henin kapehding ni na-let ni pewek. 15 Niya ellan alin buhul da patul da niyadda opisyal tu et ilaw daddad bebley da. Hi-gak e Ap-Apu hu nanghel nunya.”