Pita Uqa Jaqec Je Osoldoc
Anutna Dana Cajaca Jaqiaden
Aqunec Je
Pita uqa Kristen dana cajaca age hatu filfil ilagna bilein eu jaqec je i jaqiaden. Kristen eu age culumen me qee gahidoin eunu Pita uqa agena wawaga meleec gagadic mudecnu jaqec je i jaqiaden. Uqa Kristen age Jisas Kraisnu me je haun cisdoqagan ec madena. Jisas uqa cal mimei ceseli cajen. Odimei uqa ija ceseli hugen ec maden. Pita uqa age Jisasna je hahun eunu cisdumeig uqa ceseli hocnu susumudi biluqagan ec madena.
Eu mele, Kristen age culumen gahidoin. Euqa ceteh me qee eu agena wawaga meleec temdocnu calen. Eunu age wawaga gagadic meleeen lili Krais ceseli hugian. Odocob saen euna age ameg me bahic oqagan. Pita eu odi madena.
Je Dunuhnu Dado Mec
1. Feele adec je (1.1-2)
2. Anut uqa egenu waug ben qumei cahahagen eunu Anut binan suluqale (1.3-12)
3. Ege gun biluqale (1.13-5.11)
A. Anut uqa gun eunu ege gun bileqan (1.13-2.3)
B. Ege wawige meleec dana cajaca egena bilec eu adi (2.4-12)
1. Ege Anutna jo Anut uqa cehena (2.4-8)
2. Anut uqa ege wawige meleec dana cajaca eu wele nesili cedigen (2.9-10)
3. Ege cele dana jobon filnadec cinigwe odi ege jag maha ina biluquna (2.11-12)
C. Ege dana agena iloilo cunug bisalu biluqale (2.13-3.7)
1. Ege kingca, gabmanca bisalu bileqan (2.13-17)
2. Ege egena cofgec dana bisalu bileqan (2.18-20)
3. Krais uqa culumen dain doc sogoecca gahidon eunu egeha odi odeqan (2.21-25)
4. Aidagail age gemugail bisalu biluqagan (3.1-6)
5. Gemugail age aidagail me cofaadi gami me biluqagan (3.7)
D. Age wawaga meleec cotogail cunugnu nalunuga meigale (3.8-17)
E. Krais uqa dana caja silailca eunu cal men (3.18-4.6)
F. Ceteteh cunug qee mec saen eu cemenug nijia eunu ege kobol me odoqale (4.7-11)
G. Ege Krais dain sogoecca gahidonwe odi dain sogoecca gahidoqale (4.12-19)
H. Tamanec cofadec age Anutna dana cajaca cofadi cuhadoigale (5.1-4)
I. Dana haun age tamanec cofadec matu bisalu bileigale (5.5-11)
4. Jaqec je i uqana gug (5.12)
5. Cit qoc je (5.13-14)
1
1 Ija Pita, ija Jisas Kraisna aposel. Ija jaqec je i Anutna dana cajaca jaqiadigina. Age agena gug jobon culimeig Pontasca, Galesiaca, Kapadosiaca, Esiaca, Bitiniaca hatu ilagna bilegina. 2 Wele bahic Anut ege Memige uqa agenu wele don. Odimei uqa uqana cisdocna age uqana dana cajaca biluqagannu nesili cedaden. Odimei age Jisas Krais jejeg toodu odoqagannu nesili ehaden. Odimei Jisas Krais uqa golac eu bilisadu aqeceb age Anut amegna soidoc tawoqagannu nesili ehaden. Eunu Anutna Kis uqa age qaguadeceb gun calein. Anut uqana eelgec uum igecca malol bilecca adeceb ageca am bec nijiale.
Ege cebac bilec me bahic sao jobon bilia eu ocnu sumudi biluquna
3 Anut uqa egena Tibud Jisas Krais Memeg. Eunu ege Anut binan suluqale. Uqa egenu waug ben qon. Odimei uqa Jisas Krais cal mecnadec tulidocob haun cajen. Uqa jic euna ege cebac bilec haun igen. Odocob cebac bilec haun eu ege gagadic migeceb ege cebac bilec catanec Anut hibna igigiannu sumudi biluquna. 4 Cebac bilec catanec ocnu sumudi biluquna eu Anut uqa mugumige mec eu wele saciadon agenu cofdona, eu sao jobon bilia. Eu qee fadaleiaun, eu Anut amegna cataniec bahic bilia, eu qee qee meiaun. 5 Age Kraisnu wawaga meleena, eunu Anut uqa uqana gagadic odocna uqa age cahahaadigiannu cofadi cuhadona. Odocob agena cahahaadec eu saciadon bilia eu deel cit qocna camasac mudigian.
6 Age ceteh i cunug Anut odon eunu cisdumeig ceeleigale. Euqa qila age saen nag odi dih Anut gale docobfi temadec filfil ageca caleceb sogooqagan. 7 Temadec ina Anut uqa agena wawaga meleec eu melefo, qeefo temdona. Age dogina, gold eu ceteh fajecnu qaig ben bahic, euqa age gold eu melefo, qeefo temdocnu jana manegina. Gold eu ceteh fadaligian. Eunu agena wawaga meleec eu gold wooldona. Odocob temadec filfil ageca caligian saen euna agena wawaga meleec eu gagadicfo, qee, mele qeefo eu odi dugian. Odocob hibna Jisas Krais camasac cali hugian deel euna uqa agenu ceelimei age binanaga fulacdoc benca adigian. 8-9 Age Jisas Krais qee felein qa age uqanu nalug megina. Age uqa qila qee fegina qa uqanu wawaga meleena. Agena wawaga meleec eu aig qona. Aig eu Anut uqa age dolonoga cahahadona. Odocob age uqanu celebo bahic egina. Agena celeboec eu ben bahic, eu celeboec cunug maha inadec wooldona, eu odi ege conigena qasali madecnu ihoc qee.
10 Je hahun madec dana wele bilein age Anut uqa age qila bilegina cahahaadigian eunu je hahun madein. Odimeig age je i Anut uqa eeladec me bahic uum adigian ec eu gug doqagannu cabi gagadic oloig. 11 Kraisna Kis uqa je hahun madec dana eu age dunuh bilen. Kis eu uqa conogana Krais culumen dain doc sogoecca filfil gahidumei hibna binan ben fulacdocca ugian ec saaden. Kis saaden saen euna je hahun madec dana age wawali sisilec cabi oin, “Cel dana uqa ege cahahagigian?” ein, odocob “Aadeb dana eu cahahagigiannu hugian?” ein. 12 Euqa Anut uqa je hahun madec dana eu age je hahun inu agenel cesuladecnu qee nijel ec maadeceb doin. Je hahun i agena saenna qee camasac meiaun ec maadeceb doin. Euqa agena je hahun eu Anut uqa age qila hatu ilag bilegina eundec cahahaadigiannu maden. Anut uqa Kis Gun sao jobondec suldocob nen. Odocob dana sos age Kis Gunna gagadic odocna Jisas Kraisnu me je qasali maadecebil doin. Ensel ageha Anut uqa adi uqana dana cajaca cahahaadigian ec foqagannu gale adena.
Anut uqa ege gun bilecnu utagen
13 Eunu age agena cisdoc tutuc mudimeig dumanaga cofdu cuhadu bileigale. Age agena cisdoc cunug gabandumeig Jisas Krais camasac cali hugiannu sumudeigale. Odocob age Anut uqa eeladec me bahic saen euna uum adigiannu gaid cisdoigale. 14 Age mel sim je toodu odoginawe odi odoigale. Wele age docca qee, odocob age wawaga cajecna kobol toodu odoloig. Qila age kobol eundec haun toodu odocnu cain cisdowain. 15-16 Anut age wele utaaden uqa gun, uqana kobol cunug eu tutuc bahic. Anutna jaqec je odi madena:
“Ija gun biligina eunu ageha gun bileiga,” ena. (Wok Pris 11.44-45; 19.2; 20.7)
Eunu age Anut himec toodoiga, age Anutwe agena coboc cunugna gun bileiga.
Anut uqa fajec ameg ben bahicna ege ceseli fajigen
17 Age Anut utadudu madogina, “Memige,” dogina. Memige eu uqa ege ijanigecafo, ijanigeca qeefo ec qee cisdona. Uqa ege dana osolosol cunug egena odoc himec ihocihoc gesiligina. Eunu age saen maha ina bilegina euna age gaid Anutnu cumunii coboigale. Age dogina, maha i agena jobon gug qee. 18 Age dogina, wele age kobol caunca qee age jajanagailnadec oin eu toodoloig. Euqa Anut uqa age ceseli fajadimei kobol eunadec cagasaden. Odocob Anut uqa mahanadec ceteh qee mena eu silwa goldca cinigwe euna qee ceseli fajadel. 19 Uqa Krais golacna ceseli fajaden. Golac eu ihanec meca bahic, meen qaigna fajecnu ihoc qee. Krais uqa sipsip haun oso uqa hulufan osoca qee cinigwe age Anutnu ihanegina.* Isrel age sipsipfo, dool osofo Anutnu ihanecnu ehadi leinna agena loo je maden, “Age sipsip me bahic hulufan osoca qee eu himec ihanecnu ehi leiga,” en. Age Wok Pris 22.17-25 feiga. Pita uqa loo je eunu cisdumei maden, “Krais uqa sipsip haun oso uqa hulufan osoca qee cinigwe age Anutnu ihanegina,” en. 20 Anut maha qee ifanec ninijen uqa Krais cabi i ugiannu nesili ehuden. Odocob qila cit qoc saen ina Anut uqa odudeceb Krais uqa age cesuladigiannu camasac men. 21 Anut uqa Krais cal mecnadec tulidocob cajen. Odimei binan fulacdocca uten. Krais uqa age cesuladeceb age Anutnu wawaga meleen. Eunu age Anutnu wawaga meleena, odocob age Anut cahahaadigiannu sumudi bilegina.
Age wawaga meleec cotogailnu nalunuga meigale
22 Age mele je i toodu odogina, odocob age kobol euna agedodoc wawaga wasacudecebil Anut amegna cataniec bilegina. Odocob age wawaga meleec cotogailnu nalunuga megina. Age cotogail osonu nalug mecebmecebecnu gagadic odoigale. 23 Ge, age haun wasein, eu odiwe sab cabina haun wasadena. Euqa sab aig qee mena eu age eunadec qee waselein. Sab aig gaid bilina eunadec dih age wasein. Sab aig eu Anutna je. Eu uqa cebac bilecca, eu gaid bilina. 24 Ge, Anutna jaqec je eu odi madena:
“Gigi eu galalimei qee mena, uqana bobog eu cagasi tonena.
Dana cajaca cunug age gigi cinigwe mahuc qee megina.
Age binanaga eu bobog cinigwe cagasi tonena.
25 Euqa Tibudna je eu bileceb catanena,” ena. (Aisaia 40.6-8)
Tibudna je eu me je dana age qasali maadein.
*1:19: Isrel age sipsipfo, dool osofo Anutnu ihanecnu ehadi leinna agena loo je maden, “Age sipsip me bahic hulufan osoca qee eu himec ihanecnu ehi leiga,” en. Age Wok Pris 22.17-25 feiga. Pita uqa loo je eunu cisdumei maden, “Krais uqa sipsip haun oso uqa hulufan osoca qee cinigwe age Anutnu ihanegina,” en.