6 Jesua mo hora vohogi na tangaloi tau Israel. Gagategalegi vin vano vin lei na vanue ngehi vin vuragi na nona hagogineu. 7 Me a tangaloi ram galohagi na Huqe lolo taro tavohe i Jesua u mwaso. Lo tagui taro noi Jesua, ram galohagi Huqe tau duruhi na taro nora sesea ngerehi rau lehi na tabana lawua doluegi ngehi Huqe uvei beno lawera Israel. 8 Jesua netui Nun, tangaloi tabana noi Huqe, u mate lo higaona vudolue avigi hangavulu. 9 Siu ram tulegi nie lolo vanue hi a nona lo Timnat Heres, lolo vusi tanoi Evrem, gangarani lo Vusi Gaas.

10 Siu lo babagi leheno mei Jesua rau mate beno, me ngerehi rau vora lo tagugi hateve rau ilo Huqe mena tabana lawua ngehi u veiana beno lawera Israel.

11 Siu tangaloi tau Israel ram vai na gineu esi lolo matai nora Huqe me ram tabana noi tagaro vurogi saosao. 12 Ram siregi na Huqe a Huqe noi retubure, ngehi u lei vohogi nire dena vanue Ijib. Ngerehi ru vora atagu ram huri na huqe wagineu nora tangaloi doluegi ngehi dalire, me ram huduhudu lawera. Ram vai na Huqe mo mero‪‬, 13 huri ram siregi Huqe me ram tabana noi Tagaro me ngere huqe vavinegi. 14 Tavohe Huqe mo merogi nire Israel mo betera sulo limara tangaloi vuro sao ramo wehire me ramo balu na nora vai gineu. Huqe mo siregi nire sulo limara nora tavalui vuro ngerehi ram toga dalire. Lo taro hi ngere Israel rahe vai lai tea vena rain labe lo nagoi nora tavalui vuro. 15 Lo taro hi ram vano lolo vuro, limei Huqe mo eno vovohire mo vai asisigi nire mwere hi nge u veve me u haharigi. U gagarasi lawuagi lawera tau Israel.

16 Siu me Huqe mo ragasire na tangaloi vagamwasoi me ramo vagamwasoire Israel dena limara tangaloi vuro. 17 Me tangaloi tau Israel hateve rau rongo na leo nora tangaloi vagamwasoi, me ram dori mwere na vavine huri turegi lo tagure huqe wagineu me ram huduhudu lawera. Ram begi siseri dena turegi ngehi retubure rau dige lune me rai ronghuri leo hora noi Huqe tea. 18 Lo taro hi Huqe mo ragasi na nora tangaloi vagamwasoi, Huqe mo toga meire tangaloi vagamwasoi. Ngeie mo vagamwasoire dena limei nora tavalui vuro lolo taro nora tangaloi vagamwasoi, huri Huqe mo hagavire lo taroi nora raveana huri ngerehi ram vai asisigi nire me ram vai gagarasigi nire. 19 Me lo taro hi tangaloi vagamwasoi u mate, me ram tudori ramo vai gineu rau esi liu retubure. Ram dige mo hurire huqe wagineu vena rain tabana nora, me vena rain huduhudu lawera. Ram rao siregi na nora doridori esi mena turegi na qatusiaga.

20 Mo vai i Huqe mo mero lawuagi meire Israel me mo veve vena, “Huri a sinobu lehe he huri na nogu waratau siaga tea hi nau veve lawe tubure me hateve rau ronghuri na dilogu, 21 siu neu nain he livusi na buri sinobu lehe tea ngerehi ram toga mwaso mosigei tavohe Jesua u mate beno. 22 Neu nain veire huri siu rain vailehire Israel vena ngere Israel rain huri na nogu turegi me rain dige lune mwerei retubure sige hatie.”

23 Me Huqe mo siregi na buri sinobu hi ram toga. Nge he livusire tea vena siseri, me hateve u betera sulo limei Jesua.