1 Herod atyetyart anenh-antey arrwekelan Jesus atnyenek apmer Bethlehem-itwek, ahern Judea-ampeny-itwek. Artwa rernem ayerrer-they apetyek apmer Jerusalem-warl. Antyarrantarl artwel-rnem iterl-arenh apmer nthek-angkwarr ra born-irrek. Antyarr aremirrek ikwer-rnem-warl. Antyarrel ikwer-rnem-warl iylparrernek, antyarr-angkwarrant rernem iterl-arek, antyarr renh apentetyek, rarl ikwer-rnem iylparrerneman, rarl ikwerel born-irrekan. 2 Rernem ayernek, “Nthenh ampa akely ra, Jew-rnem-kenh atyetyart ilkwa? Anwantherr antyarr ikwerenh arenhey-alpenh, renharl antyarrel iylparrernek. Anwantherr antyarr renh aremel apentek. Anwantherr apetyek, ikwer inkwerelhemel.”

3 Atyetyart Herod ra angka awek, rap arlkarirrek atyetyart ingwer Jew-rnem-kenh-kety. Jerusalem-areny ingwer-rnem arlkarirrek arrpemarl. Rernem aterirrenh atyetyart Herod-kety, ahelengkw-rnem ilanthekerr, renh-rnem atwetyek. 4 Herod-el-anem tyaty-areny atyetyart ilkwernem-then akarrilek, artwa Moses-kenh angka akalty-anthey-angker-rnem-then, renh-rnem ayernek, “Nthenharlap ran, artwa itethiley-angker nheng aynteyel. Nthenh-itwek ra aremirreyenhan, pip arrwekeleny Akngey-kenhel aynteyel-angkwarr-antey?”

5 Rernem renh ilek, “Bethlehem-itwek, ahern Judea-ampeny-itwek, angkakert arrwekelenyel angkarl arrwekel ingkwernek-angkwarr-antey, ra irrkngarl ayntek. 6 Akngey-kenh pip arrwekeleny alakenh aynteyel: ‘Judea-ampenyel Bethlehem-areny-rnem rernem atyetyart ilkwakert-anem aneyenh. Bethlehem-areny anyent ra atyetyart Israel-kenh-rnem arntarnt-areyenh.’ ”

7 Herod artwa tyak-rnemek anyelkel yangkelhek, renh-rnem ayernek, “Ilenger arrantherr antyarr arek?” 8 Ra renh-rnem ilanthek, “Bethlehem-warl alhenherr-arey, ampa ikwer nthwetyek. Arrantherr arenty-penh, arrantherr atyeng-warl apey-alpenherr-arey, ayenh-anem iletyek. Ayengan ikwer-warl alhetyek arrpemarl, ikwer inkwerelhetyek arrpemarl.”

9-10 Artwa tyak-rnem Herod ikwer awelhek. Rernem antyarr wethey areynenh arrpemarl, awankarl rernem arek ayerrer. Rernem antyarr renh arek-penh, rernem ikwer artewentyel inkwerelhek innga. Ra ikwer-rnem iylparrernek. Antyarr ra ampa akely ayntenh-itwek-anem arlanirrek.

11 Artwernem warl kwen-warl aylpenhek, amenheng-atherr arey-alhek. Rernem kwenirrey-alhek ampwethel alernelhemel. Rernem ikwer anthek ilek-ilek, apwert gold-then apernelhey-angker mwerr-angker inteyel-rnem-then.

12 Ikwer-penhan rernem altyerr arek. Rernem angkarl awek-penh, rernem ilek, “Arrantherr iwerr ingwer-angkwarr alpenherr-arey atyetyart Herod-kety.” Rernem iwerr ingwerel-anem ikwerety alpek.

13 Artwa tyak rernem alpek-penh, Ingkart-kenh angel Joseph ikwer aremirrek, Ra renh ilek, “Akemirra, ampa akely-then amikw-then akngeyna Egypt-warl. Herod-arl ikwer nthweyel-kety, renh atwetyek. Arrantherr ikwer-itwel anem, atha arrenhantherr iletyek-atwety.”

14 Ingwa ikwerel-antey Joseph-el anew ikwerenh-then ampa akely-then Egypt-warl akngeynek. 15 Rernem-anem aney-alpek. Herod ra ilwekarl-kety, Akngeyel renh-rnem ilanthek, rernem angkep alpetyek, Israel-warl. Akngey-kenh angka alakenh ayntek, angkakert arrwekelenyel ingkwernek-angkwarr-antey, “Atha alerey atyenh renh atwenhek, Egypt-they.” Angka arrwekeleny innganem ayntek.

16 Herod ra iterl-arek-anem, artwa tyak arleng-areny rernemarl renh irrtywerl-ampernek, ra ahelirrek-anem. Ra ahelengkw-rnem thwenek, awey akely-rnem atwetyek. Awey aherrety atherrek-atwety anenh-rnem, ra ingkerrenh atwetyek, artwa tyak-rnem awek-penh, arlta ilengerarl Mary-el Jesus renh atnyenek, rernemarl antyarr arek-penh-angkwarr.

17 Angka innganem ayntek. Angkakert arrwekeleny Jeremiah ra arrwekel ilenh-angkwarr-antey, 18 “Apmer Ramah-itwek rernem artewentyel artnalhelirreyenh. Israel-kenh-rnem artneyenh ampa ikwerenh-rnemek, arternpirrey-angenh, rernemarl ingkerrenh ilwem.”

19 Atyetyart Herod ra ilwek-penh, Ingkart-kenh angel ra altyerr-angkwarr aremirrek, Joseph ra Egypt-itwek anenharl-warl. 20 Angel angkek, “Akemirra, ampa akely-then amikw-then akngeyna apmer Israel-warl. Ahelengkw ingkerrenh kel ilwekarl-kety.”

21 Joseph ranem akemirrek, amenheng-atherr akngeynek apmer Israel-warl. 22 Herod-kenh alerikw Archelaus ranem atyetyart ahern Judea-ampeny-itwek anenh. Joseph ranem awek-penh, ranem aterirrek. Ra altyerr arek, Ingkartelarl renh ilanthek, ra Galilee-warl alpetyek. 23 Rernem Nazareth tawen-itwek aney-alpek. Akngey-kenh angkakert arrwekeleny-rnemel ingkwernek, “Renh-anem itneweyn ‘Nazareth-areny,’ ” Angka arraty innganem ayntek.