1 Aents pegkegchau aidau

chichainamun antujus umiju wekaechauk

shiig aneas pujustinai.

Tudau aidau takatan

wakejus taka wekaechauk,

tuja Apajuín pegkegchau chichajuidaujai ijunag,

ditajai betek chichá wekaechauk

shiig aneas pujustinai.

2 Wagki niig nuna wekaetutsuk,

Apajuí chichame umikta

timauwa nuna umiak,

kashish, tsawaish tuke nuwig

anentaimas pujau asa.

3 Nuadui nunú aentsuk makichik numi

yuminum ijusa ajaamu,

pegkeg, senchi nejen,

dukesh kaketsama imanai.

¡Iman asa ashí nii takamuji aidauk

shiig pegkeg ainawai!

4 Untsu aents pegkegchau aina duka

nunú aentsjaig betekchau ainawai,

nuadui ditak ajusa wampujin dase umpui ajapama numamtin ainawai.

5 Aents pegkegchau aidaunak

Apajuí dita takasbaujin

diijus suwimkan susatnai.

Tuja aents pegkejan takau aidau

Apajuí pujutain ijunjagtina

nuwig ditak wayachagtinai.

6 Tuke Pujuuk aents

pegkeg aidaun kuitamui.

Untsu aents pegkegchau aidauk

dita pegkegchaujinig waittsagtinai.