Pↄl e lɛl ekʼawŋ Kolↄs eyŋ
Ów ekʼit eke wɛl kʼuw any
Kolↄs el Azi Minɛr ecʼɛb nyam. Yɛfɛnyna ɛm a, Azi Minɛr anŋ Turki ɛm. Kolↄs lel Efɛs ab a, ow ↄwl es kilo ekŋ lɛw. Lɛgŋ ab ɛm eke Pↄl anŋ Efɛs a, Kolↄs eci ŋgbafrɛli nyam eke wɛl bʼɛsŋ Epafras, oc in ecʼↄmn a ɛlu Jesu ɛm, ɛtŋ Pↄl yɛgmʼn low. Eke lʼɛwl mɛny nʼim Kolↄs a, li sigm Nyamel es yogŋ. Pↄl nↄn lɛl na Kolↄs e Nyamel a eci, lɛgŋ a eke Epafras ow ɛŋnʼn sobel ɛm eke li kʼↄm ow ów a.
Kolↄs eyŋ bi kok ɛl obi e sinyam a e nuŋ igŋ e low ari at ɛm. Ɛl eci sinyam nuŋ igŋ ebr ab ɛm, wɛl bi yɛgm ɛl eke abŋ a fɛŋ eke bʼↄŋ agŋ am iririr Nyam ab a, es -lʼↄsŋ ɛtŋ ow it eke wɛl kʼigŋ ɛl nuŋ. Low yɛgm ikŋ na am wuwlm Amani Mamn ecʼa eke wɛl am yɛgm Nyam ecʼagŋ eke anŋ Kolↄs ab ab. Ow sosiɛm a, agŋ bɛb am yɛgm agŋ low dad eke Jesu in el abŋ ɛjecʼab ɛm e nyam ekʼin ↄny abusu. Pↄl am yɛgm ɛl eke Krist agb akm low fɛŋ, ɛtŋ in sↄny cɛ nʼↄny es ɛw wus na ecʼabŋ fɛŋ af. Agŋ a, ɛl e low yɛgm ab ɛm, am dad yɛjʼeke Nyam e nuŋ igŋ sɛnyn a, in anŋ ów bɛb eci ɛlum ɛm, ɛsɛ: likr es ubr af, sɛgŋ bɛb ecʼↄsu af, ob ij bɛb ecʼɛnŋ lele mar bɛb ecʼɛgŋm ɛm ab. Pↄl am ɛlu ↄkm eke owʼn elm ɛgŋ ecʼów eke in bi kok ab ɛm ow e sel ɛŋn a in ánm, ɛtŋ ɛmɛny nʼam dad agŋ a fɛŋ eke kʼɛwl mɛny lɛr Jesu cɛ eke in ɛm wɛl bʼↄny ↄmn ke wɛl bʼɛŋn sel a.
Lɛl a ecʼuwr ɛm a, Pↄl am ↄm agŋ ów dad kretiɛn ecʼes an mamn eke kʼↄny Nyamel ɛm, agŋ ɛm ecʼɛb ir ɛm lel in ecʼakŋ ɛm ab.
1
Ɛsŋn
1 Pↄl, eke Nyam ecʼerur ɛm, el Jesu Krist ecʼɛrm ɛs lel ɛy lisijim Timote ab, am awŋ 2 Nyam ecʼagŋ ekʼir Kolↄs baŋn, ke el nɛny nyam ɛm ecʼɛy lisijimɛl eke okr af Krist ɛm a lɛl. Ke Nyam ɛy Ɛs ɛ́dŋ ↄny ↄwrↄ ke ↄ́ŋ ↄny ɛrm es ɛy.
Pↄl am ↄŋ Nyam bia
3 Sɛgŋ fɛŋ si bʼɛlu Nyam ɛy Ɛs Kↄtↄkↄ Jesu Krist ecʼƐs bia eke si bi ŋↄŋnʼn ↄny ecʼa, 4 aŋke wɛl dad ɛy sʼiri ↄny ecʼↄmn ekʼↄnyn Jesu Krist ɛm lel ↄny ecʼerur ekʼↄnyn agŋ fɛŋ ekʼel Nyam ecʼagŋ a ecʼab ab e low. 5 Eke low nɛnyɛmbri nyam ecʼamani ekʼel Amani Mamn, ↄg es ow ↄny ogŋ a, ↄny, irir low yecʼa eke Nyam bɛbm ɛw ↄny es afr a; ɛtŋ ↄny ecʼↄmn lel ↄny ecʼerur ab ucu low eku ikŋ na ↄny es. 6 Amani Mamn a am eb es ɛtŋ am ↄsu ey wus nimum af, ɛsʼelel eke nʼam kokr ↄny ecʼaraŋn lɛgŋ a ɛtŋ eke ↄgr es irir Nyam ecʼↄwrↄ a e low, ke uwr ob tasi eke lʼel ab any a. 7 Epafras ekʼel ɛy e juma kok ɛm e lawl eke sʼerur sɛnyn sɛnyn a anake yɛgm ↄny low ikŋ na a; nʼam usr ɛy usu li kok juma ɛsɛ Krist e juma kok ɛs nimamn tasi af; 8 nʼↄŋ ɛy ↄny ecʼAbŋ Lala ecʼerur ekʼↄŋ ↄny a ecʼamani.
9 Na sosiɛm anake ɛy yɛji, lɛgŋ a ɛtŋ eke sʼiri wɛl dad ɛy ↄny e lís e low a, sɛgŋ fɛŋ sʼam ŋↄŋn Nyam sʼↄŋ ↄny a. Sʼam ibrm Nyam eke li kʼↄŋ ↄny uwr in ecʼerur tasi ab any, nuŋ ɛm ↄny fɛŋ lel sɛwr fɛŋ ekʼin ecʼAbŋ a bʼↄŋ ↄny ab ɛm. 10 Ow bʼow ↄŋ ɛtŋ bʼow ↄnyn es an eke bʼusr Ɛs Kↄtↄkↄ sos ɛtŋ bʼow kokr sɛgŋ fɛŋ yecʼeke bʼakplʼl sos ɛm a. Bʼow kokr ów amamn fɛŋ ɛtŋ bʼow iman anym eci, ↄny eci Nyam ecʼany uw ab ɛm. 11 Sʼam ibrm Nyam eke kʼucu ↄny ↄny es low low fɛŋ ɛm in ecʼanygbɛl ecʼabusu ab ɛm, yecʼɛtŋ kʼↄ́tur inymn es kikri, ke ↄ́nyn ɛrm susu low eku ɛm. 12 Ɛ̀lul Ɛs Nyam bia sos ɛm iŋn ɛm: in eke nʼↄŋ ↄny abusu eke kʼɛŋan ów a fɛŋ eke li bɛbm lʼɛw es afr ecʼusuayl ab ɛm, agŋ a ekʼel in ecʼa ecʼa. 13 Nʼↄny lʼoc ɛy es ncebn ecʼabusu ab ɛm ɛtŋ lʼoc lʼɛlu ɛy in ecʼIy e lʼerur a ecʼes ɛw ab ɛm. 14 Jim ɛm anake li sↄg ɛy low ŋuŋ ɛm, ke lʼoc ɛy e sikpl a yɛji lʼap ɛy a.
Krist ecʼɛj eke wɛl ↄcu
15 Krist el Nyam eke wɛl ɛ́knm a e mɛny ɛwr.
Lʼel Liy krɛkrɛ ekʼanŋ mob mob fɛŋ eke Nyam kok a e ŋuŋ af, † Bɛ̀bmn Nyandrɛ 8.22-31; Jan 1.1-3.
16 aŋke in ɛm Nyam ɛcr kok ob fɛŋ ekʼanŋ afr lele wus af aŋa ab a:
mob e wɛl bʼɛkn lele yecʼeke wɛl ɛ́knm ab,
lɛc fɛŋ, es akm fɛŋ, es ɛw fɛŋ lele abusu fɛŋ ab. † Akr lɛw nↄhↄn am lulm jebr e sabusu eke wɛl ɛ́knm, ke agŋ bɛb bi tutr eke sabusu amua idr wus ecʼów lele agŋ ɛm e mob ab, ke ɛl -li bʼigŋ nuŋ a. Bɛ̀bmn Kolↄs 2.8, Galat 4.3 lele ow ecʼakr otar ab ab.
Nyam ɛcr in ɛm kok fɛŋ in eci.
17 Krist ikŋ anym anŋ gbuŋ ɛtŋ ob fɛŋ anŋ,
ɛtŋ in ɛm ob fɛŋ ↄtu inym es ɛl e susu a.
18 Krist eci sos megl el Nyamel
ɛtŋ in obi lʼel ow e nuŋ.
Krist el nuŋ ↄb, lʼel Liy krɛkrɛ eke wɛl ew,
ɛtŋ lʼel krɛkrɛ ecʼɛgŋ ekʼigb agŋ ekʼuw ab ɛm,
yecʼɛtŋ ke lʼél krɛkrɛ nʼanŋ mob fɛŋ e nuŋ af,
19 aŋke Nyam erur eke kʼir Jim ɛm nimum,
20 ɛtŋ lʼerur yɛjʼeke li kʼɛcr Jim ɛm
lʼokr wus nimum ecʼagŋ ɛm Jim eci.
Jim eci mebl a ekʼok es olikŋ af ab ɛm,
Nyam ɛw ɛrm es ɛy es wus af aŋa lel afr ab.
21 Ɔny Kolↄs eyŋ, ↄny yɛji lɛgŋ eke ɛc ab ɛm a, kpabr es Nyam e lís, eel in ecʼefnu ów eŋuŋ a eke bʼↄnyn ow e tutr ke bi kokr a sosiɛm eci. 22 Gbɛkↄ lɛgŋ na ɛm, Nyam ↄny okr ↄny ɛm in ab, Jim e sos megl ɛm e luw a ekʼuw olikŋ af ab ɛm, yecʼɛtŋ ke ówr in ecʼany af ɛsɛ agŋ lala, agŋ ekʼↄnym low ↄbr, ke abr ɛnym anm lís af. 23 Gbɛkↄ ow it eke kʼinymn es kikri ke íjr lɛc ↄmn ɛm. Ke kí kpabmn es Amani Mamn a e lís, aŋke lʼel low eke sʼam ↄmn. Ɔny, irir in e low, aŋke wɛl ↄb amani a ok agŋ a fɛŋ ekʼanŋ wus af aŋa a, ɛtŋ ɛm Pↄl, mʼel ow e juma kok ɛs.
Pↄl e juma ekʼit e ki kok Nyamel eci
24 Sica sos ɛm am iŋnʼm eke mʼam mʼij ↄny e gbre. Tasi ɛm a, ɛm obi ɛm a, ɛbɛn mʼanŋ ɛm mʼam mʼij Krist e gbre ekʼij in e sos megl a ekʼel Nyamel ecʼa. 25 Mʼel Nyamel e juma kok ɛs, aŋke ow el juma eke Nyam abulʼm eke mi ki kok ↄny eci: lʼabulʼm eke mi kʼↄb in ecʼamani a ɛsɛ elel ekʼow it ab af. 26 Odad a eke el low eke lↄl es godʼɛtŋ sↄwↄrŋ ecʼany af, ke lɛgŋ na ɛm, Nyam ɛlu ↄkm kpata yɛgm agŋ a eke el in ecʼa. 27 Nyam erur eke ki yɛgm ɛl -lʼuw low na eke lↄl es ab any, ke el ob ↄny lele low sↄbↄ ab, eke li bɛbm lʼɛw es agŋ fɛŋ ecʼa. Ɛtŋ kin low a eke lↄl es a: Krist anŋ ↄny ɛm ɛtŋ nʼↄŋ ↄny ↄnyn ↄmn eke ↄny yɛji bʼow ɛŋan Nyam ecʼanygbɛl a. 28 Ow sosiɛm, sʼam ↄb Krist ecʼamani sʼok ɛgŋ fɛŋ. Sʼam ɛwar ɛtŋ sʼam yɛgm ɛgŋ ɛgŋ low sɛwr fɛŋ ɛm, yecʼɛtŋ ke ɛgŋ fɛŋ ɛ́y ↄkm Nyam ecʼany af ɛsɛ ɛgŋ eke uw low fɛŋ any Krist ab ecʼaf okr ab ɛm. 29 Na sosiɛm mʼam kok juma, ɛtŋ mʼam dogŋn low Krist e lɛc a ecʼabusu a ekʼanŋʼm ɛm ab ɛm.