1 Ahaba ese Elia ena kara iboudiai na Iesebel e hamaorolaia, bona peroveta taudia iboudiai dare amo e aladia mase sivaraina danu. 2 Bena Iesebel ese gwaukau tauna ta Elia dekena e siaia lao, eto, Kerukeru hora inihetomana do basine kau ai oiemu mauri na idia ta ena mauri ida basinama haheḡereḡerea, dirava ese davagu bae henigu, bona ma bae habadaia danu. 3 Bena Elia na e gari, e tore isi, e heau, maurina e tahua; bena Beresieba ai, Iuda tanona ai, e kau. Ena hesiai tauna na unuseni ai e rakatania.

4 Bena ia na sibona tano gaḡaena ai ela, dina ta laolaona heḡereḡerena; bena roteme*“Roteme” na au ta ladana, Heberu gado ai. auna ta henunai e helai diho. Bena e noinoi baine mase; eto, Vadaeni, Iehova e, egu mauri avabia oho; badina be senegu asina hereadiamu. 5 Bena e hekure diho, roteme auna henunai e mahuta; bena aneru ta ese e daua toho, e hereva henia, eto, A tore isi, avaniani. 6 Bena e itaia, ia kwarana badibadinai na dikea igabuna ta, nadi siahu amo e guraia ḡauna, bona ranu hodu ta. E aniani, ranu e inua, bena ma e hekure lou. 7 Bena Iehova ena aneru na nega iharuana ema, e daua toho, eto, A tore isi, bavaniani, hari be laolao na be bada hereamu oiemu ai na garina. 8 Bena ia na e tore isi, e aniani, bona ranu e inua; bena una aniani goadana ai dina hari-ahui boi hari-ahui e laolaova, ela bona Dirava ena ororo, ladana Horeb, ai e kau.

9 Unuseni ai ia na kohua ta ai e raka vareai, e noho. Bena Iehova ena hereva na ienai e kau, eto, Elia e, dahaka o karamu iniseni ai? 10 Elia eto, Lau na Iehova Sabaota dainai na vaḡeḡe hereamu; badina be Israel taudia ese emu taravatu vada e rakatania, emu ihaboulaina patadia vada e ḡiḡidia dobi, emu peroveta taudia na dare amo vada e aladia mase; ema bona lau mo sibogu na nohomu, bona lau danu egu maun e tahuamu, bae abia oho e tomamu. 11 Iehova eto, A raka lasi, ororo ai ba gini Iehova vairanai. Bena Iehova na e raka hanai; lai badana mai goadana ida ese ororo e hapararadia bona nadi e hamakohidia rohoroho Iehova vairanai. A Iehova na dia una lai lalonai. Lai murinai tano e laga; a Iehova na dia tano-laga lalonai. 12 Tano-laga murinai na lahi; a Iehova na dia lahi lalonai. Lahi murinai na ere maimu-maimuna ta. 13 Elia e kamonai, bena vairana na ena dabua amo e ḡovaia ahu, bena e raka lasi, kohua iduarana ai e gini.

Bena ere ta ienai e kau, eto, Elia e, oi dahaka o karamu iniseni ai? 14 Ia na eto, Lau na vaḡeḡe herea, Dirava, Iehova Sabaota dainai; badina be Israel taudia ese oiemu taravatu vada e rakatania, emu ihaboulaina patadia danu vada e ḡigidia dobi, emu peroveta taudia na dare amo vada e aladia mase; bona lau mo sibogu na nohomu. Bena lauegu mauri e tahuamu, bae abia oho e tomamu.

15 Bena Iehova ese e hamaoroa, eto, Aola, emu dala ai ba lou lao ela bona Damasko tano-ḡaḡaena. Ba kau negana ai, Hasaele ba horoa, Suria pavapavana; 16 bona lehu Nimisi ba horoa, Israel pavapavana; bona Elisaia, Safata tau Abel-mehola natuna, ba horoa, peroveta tauna ai bainela, oi ibolomu. 17 Bena Hasaele ena dare amo baine roho mauri tauna na lehu ese baine alaia mase, bona Iehu ena dare amo baine roho mauri tauna na Elisaia ese baine alaia mase. 18 Ḡau tamona, taunimanima daha hitu do baina hamauridia Israel ai, tuidia asie hadai Baal vauranai asie igo diho bona ududia amo asie harahua taudia iboudiai.

19 Unu amo e raka oho, bena ia ese Elisaia Safata e davaria; tauna na tano e ruaiava, boromakau mamaruanedia ruahui-hani na rua rua amo ia vairanai e rakava, a ia be gabe ḡaudia ruaosi badidiai. Elia na ia badina amo e raka hanai, bona ena hahedoki na ia latanai e tahoa kau. 20 Bena Elisaia ese boromakau e rakatanidia, Elia murina amo e heau, eto, Tamagu bona sinagu aina harahudia, bena oi baina ḡavamu. A Elia ese e hamaoroa, eto, A lou lao; dahaka emu ai na kara? 21 Bena ia iḡavana amo e lou lao, boromakau mamaruanedia e abidia, e aladia mase, hidiodia na maduna audia amo e nadudia, bena taunmanima e henidia, e ani. Bena ia na e tore isi, Elia murina amo ela, ia isiaina e lao heni.