9
Nabi Amosi a fe to dɔnxɛna alo xiyena: Halagina
1 N yi fe toona nde ti.
Marigin yi a saraxa ganden dɛxɔn.
A yi yamarin fi, a naxa,
“Sɛnbɛtɛnne konden din,
han bɔxɔn yi xuruxurun.
Banxin birin xa bira muxune fari.
N na e diine halagima nɛn silanfanna ra.
Hali muxu keden mi kisima.
Muxu keden mi a xunbama.
2 Hali e sa e luxun laxira yi,
n na e suxuma nɛn.
Xa e te kore xɔnna ma,
n na e ragodoma nɛn.
3 Xa e e luxun Karemele geyaan fari,
n na e sagatanma nɛn,
n na e suxu.
Xa e e luxun baan xɔnna ma,
n saɲin yamarima nɛn,
a xa e xin.
4 Xa e yaxune e xali konyiyani,
n yamarin fima nɛn,
e xa faxa silanfanna ra.
N na n yɛɛn tima e ra nɛn,
koni e munanfanna mi a ra,
n na e ɲaxankatama nɛn.”
5 Marigina Alatala Sɛnbɛn Birin Kanna,
a tan nan a yiin din bɔxɔn na, a xuya ayi.
Muxun birin yi sunu.
Bɔxɔn xuruxurunma nɛn,
a te, a mɔn yi godo
alo Nila Misiran xudena.
6 A bata a dɔxɔden ti kore xɔnna ma.
A bata kore walaxan sa bɔxɔn xun ma.
A igen nakelima baani,
a na ragodo bɔxɔni tulen na.
A xili nɛn “Alatala.”
7 Alatalaa falan ni ito ra:
“Isirayila kaane,
ɛ nun Kusi kaane keden mi a ra n tan xa ba?
N mi ɛ ramini Misiran bɔxɔn ma,
alo n Filisitine ramini Kafatoro kii naxan yi?
N mi ɛ ramini Misiran bɔxɔn ma,
alo n Arami kaane ramini Kiri kii naxan yi?
8 A mato:
Marigina Alatala bata yulubi kanne mangayaan to,
n fama na raxɔrideni nɛn bɔxɔni ito ma.
Koni n mi Yaxuba yamaan birin halagima.”
Alatalaa falan nan na ra.
9 A naxa, “N yamarin fima nɛn
alogo Isirayila yamaan xa yimaxa.
N na a yifema nɛn
alo maali fema kii naxan yi,
alogo xɔri faɲin keden nama bira.
10 Koni yulubi kanna naxanye n ma yamaan tagi,
n na e faxama nɛn silanfanna ra,
e tan naxanye a falama,
‘A mi fama nxu ɲaxankatadeni,
na mi nɔɛ nxu liyɛ.’ ”
Isirayilaa kisi fena
11 “Na lɔxɔni,
n Dawudaa mangaya kalaxini tɔnma nɛn.
N na rafalama nɛn,
n na nɛnɛni tɔnma nɛn
alo a yi kiinde,
12 alogo e mɔn xa Edɔn bɔxɔn sɔtɔ,
e nun siyane birin
naxanye n xinla batuma.”
Alatalaa falan nan na ra,
a fama na birin nakamalideni nɛn.
13 Alatalaa falan ni ito ra, a naxa:
“A mato:
Lɔxɔne fama,
xɛɛ biine nun se xabane
walima waxati kedenna nin.
Manpa rafalane nun xɛɛ biine,
ne fan walima nɛn waxati kedenni.
Manpaan gboma ayi nɛn geyane fari,
a yi lu alo geyane birin yikunxi.
14 N na n ma yamaan naxɛtɛma nɛn a konni
keli konyiyani, Isirayila kaane.
E fama nɛn taa kalaxine tideni,
e dɔxɔma dɛnaxanye yi.
E manpa bili nakɔne sima nɛn,
e na minseen min.
E nakɔɔn sama nɛn,
e na bogin don.
15 N na Isirayila rasabatima nɛn e gbee bɔxɔni.
E mi kelɛ na sɔnɔn,
n dɛnaxan fixi e ma.”
Alatala naxa na kiini, ɛ Ala.