1 Aêac aŋgôŋ acgom, go aŋô nuc tau ŋaê gebe Malta. 2 Malacm sêmoasiŋ aêac ŋanô. Êsêac sêboa ja ma sejoŋ aêac samob jaasêlu ja, gebe kom to malo gêgôm aêac. 3 Paulu gêsôb gabgab gebe naêkêŋ êpi ja, tec ja gêôc moac teŋ ôli ŋandaŋ kêsa ma kêkêŋ kêsa jagêŋac eŋ kêsêp lêma. 4 Malacm sêlic moac geŋkaleŋ ênê lêma ma sêsôm gêdêŋ tauŋ gebe “Ŋac tônê oc gêjac ŋamalac êndu. Eŋ gêjam samuc aŋga gwêc, mago gêwê ŋagêjô sa atom.” 5 Paulu kêdaiŋ moac su kêpi ja gêja, mago gêŋ teŋ gêgôm eŋ atom. 6 Êsêac sêsaê gebe eŋ lêma ênsuŋ auc ma êmac êndu elêmê. Sêôŋ seboc gêŋ teŋ êŋgôm eŋ e sêlic ŋanô masi, tec taêŋ gêjam biŋ teŋ kêtu wakuc gebe “eŋ anôtô teŋ.”

7 Nuc tau tonaŋ ŋakasêga tau nê ŋaê Pupli. Ênê gamêŋ ŋagêdô gêc tonaŋ, naŋ kêkôc aêac sa ma gêjac ja aêac bêc têlêac. 8 Ma ŋac tau tama ôli ŋawajaô kapôêŋ ma gêjam bu gêc. Tec Paulu kêsô gêdêŋ eŋ jaketeŋ mec ma kêkêŋ lêma gêsac eŋ e ŋac tau ôli ŋajam kêsa. 9 Gêgôm tonaŋ tec lau gêmac ŋagêdô aŋga nuc tonaŋŋa sêmêŋ, ma gêgôm êsêac ŋajam kêsa. 10 Lau tau tetoc aêac sa ŋanô e aêac abe alac ana ma sêkêŋ gêŋ, taŋ aêac apô lênaŋa naŋ, kêpi waŋ gêdêŋ aêac.

11 Ajôŋ têlêac gêjaŋa, go api Alesandrianêŋ waŋ teŋ alac aja. Waŋ tau kêpoac tonaŋ gêdêŋ komô. Sêsap anôtô teŋ latuagêc ôliŋbôm ŋakatu gêc waŋnêmŋa. 12 Aêac asô Suraku ma aŋgôŋ tonaŋ bêc têlêac. 13 Go asa aŋga tonaŋ ma asô Regi, ma ŋageleŋ mula kêsêlêŋ ma alac e ŋabêc kêtu luagêc ma asô Potiolo. 14 Aêac aja e atap lasitêwai ŋagêdô sa sêŋgôŋ tonaŋ. Êsêac teteŋ aêac gebe aŋgôŋ awiŋ êsêac bêc 7. Tonaŋ su, go aja Rom. 15 Lasitêwai aŋga tonaŋ sêŋô aêac ŋawae ma sêpuc aêac tôŋtôŋ sêmêŋ e dêdac aêac aŋga Apiunê malac têtulu gêŋŋa to andu ŋacleŋŋa têlêac. Paulu gêlic êsêac e gêjam daŋge Anôtô totêtac kêpa sugeŋ.

16 Aêac aô lasê Rom, go sêlôc sa gebe Paulu êmoa nê tauŋa êwiŋ siŋwaga teŋ ejop eŋ.

17 Gêmoa e bêc têlêac gêjaŋa acgom, go kêkalem Judanêŋ kasêga sa. Êsêac sêpi tageŋ su, go kêsôm gêdêŋ êsêac gebe “O lasitêwaac, aê gagôm gêŋ teŋ gaseŋ gôlôac to tameŋinêŋ mêtê laŋgwa atom, mago tec sêkôc aê tôŋ aŋga Jerusalem ma sêkêŋ aê kasêp lau Rom lemeŋ. 18 Êsêac têtu Iêsu ŋoc biŋ e sêlic gagôm sec amboac sênac aê ênduŋa atom, tec sebe sêŋgamboac aê su. 19 Judawaga sêôc biŋ aucgeŋ, tec ŋoc ŋalêlôm kêkac aê gebe aoc ênac kaisara. Êsêac sêgôm tônê, mago aê gabe jaŋgôliŋ biŋ teŋ êpi êsêac atom. 20 Kêtu biŋ tonaŋŋa tec kakalem amac gebe jalic amac to jasôm biŋ êndêŋ amac gebe gaôc kapoacwalô tonec kêtu biŋ, taŋ Israel sêkêŋ mateŋ naŋŋa.” 21 Go êsêac sêsôm gêdêŋ eŋ gebe “Papia teŋ kêpi aôm aŋga Judaia gêdêŋ aêac gêmêŋ atom, ma ŋac teŋ aŋga lasitêwainêŋ mêŋkêdôŋ to gêjac miŋ biŋ sec teŋ kêpi aôm gêdêŋ aêac aŋô atom. 22 Mago aêac abe aŋô biŋ, taŋ taêm gêjam naŋ acgom, gebe aêac aŋô ŋawae gebe lau têt m gamêŋgeŋ seseŋ mêtê, taŋ aôm kôsap tôŋ naŋ elêmê.”

23 Ma ac sêjac noc tauŋ kêpi bêc teŋ, go êsêacnêŋ taêsam dêdêŋ eŋ sêja ênê andu, jagêjam mêtê gêwa Anôtônê gamêŋ sa gêdêŋ êsêac. Eŋ gêjam neneŋ êsêac gebe sêkêŋ êwiŋ Jesu to gêwa Mosenê biŋsu ma propetenêŋ biŋ sa gêdêŋ êsêac kêtôm bêc to geleŋgeŋ. 24 Lau ŋamakeŋ sêkêŋ gêwiŋ Paulunê biŋ, ma ŋamakeŋ sêkêŋ gêwiŋ atom. 25 Êsêacnêŋ biŋ keso tau ŋapaŋ e sebe sêc sêna, tec Paulu kêsôm biŋ tecenec gebe “Ŋalau Dabuŋ gêôc propete Jesaia awa sa gêdêŋ tamemi jagêdêŋgeŋ 26 gebe

30 Paulu gêjam ôli nê gamêŋ ŋalêlôm teŋ ma gêmoa e jala samuc luagêc. Eŋ kêkôc lau, taŋ têtu ŋacleŋ dêdêŋ eŋ sêja-sêja naŋ, sa samob, 31 ma gêjam mêtê kêpi Anôtônê gamêŋ to kêdôŋ biŋ kêpi Apômtau Jesu Kilisi totêtac kêpa sugeŋ ma lau teŋ sêkô eŋ auc atom.