1 Sangallaw sinyan na Allaw ng Pagpatana, yamagi si Isa aw yang mga inindowan nan sang pawa ng trigo. Pag-agi nilan yangutu yang mga inindowan nan ng trigo aw kyubkub nilan kay yamagutum silan. 2 Pagkita sinyan ng mga Parisi, yagalaong silan kang Isa, “Tanawa yang mga inindowan mo! Sopak sang Hokoman yang ininang nilan kay yagagawbuk silan sang Allaw ng Pagpatana.”

3 Tyomobag kanilan si Isa, “Wa kadi mayo akabasa yang ininang ni Soltan Daud sang wakto na yamagutum yan kipat yang mga kaupudanan nan? 4 Syomuud yan sang Baay ng Tohan aw kyan nan yang pan na pyasampay adto sang Tohan aw atagi oman yang mga kaupudanan nan. Na, sopak sang Hokoman yang ininang nilan kay yang mga imam gaid yang makakan sinyan na pan. * 12:4 Tanawa sa Kitab Tawrat, 1 Samuel 21:1-6 aw Pangibada 24:9. 5 Wa oman mayo akabasa sang Kitab Tawrat na yang mga imam na yagagawbuk adto sa suud ng Baay ng Tohan yamakasopak sang Hokoman kay yagagawbuk silan sang Allaw ng Pagpatana? Awgaid maskin maynan, wa silan pakadosa. † 12:5 Tanawa sa Kitab Tawrat, Pagbilang 28:9-10. 6 Na, ipaglaong ko kamayo na idi adon yang labaw pa sang Baay ng Tohan. 7 Aon oman yakasorat sang Kitab na yagalaong yang Tohan, ‘Way karim ko sang mga ayup na ipakorban mayo kanak, kondi yani yang karim ko na maooy kamo sang kapag-onawa mayo.’ ‡ 12:7 Yani yang yakasorat sa Kitab Tawrat, Nabi Hosiyas 6:6. Na, kong yakasabot kamo sang mana nan, wa gao kamo pagalaong na yakadosa yaning mga otaw na way dosa. 8 Kay ako na Anak ng Manosiya, aon kapatot ko paglaong daw ono yang mapakay inangun sang Allaw ng Pagpatana.”

9 Ansinyan pyomanaw si Isa ansan aw kyomadto yan sang pagsasambayangan ng mga Yahodi. 10 Adto sa suud aon sambok na otaw na yamasadi yang sangkilid na arima nan. Aon oman mga otaw ansan na karim nilan na aon ikasombong nilan kang Isa. Agaw yaga-osip silan kanan, “Sobay ba sang Hokoman yang pagpakadyaw ng mga masakitun sang Allaw ng Pagpatana?”

11 Tyomobag si Isa, “Sawpama aon karniro mayo na yamallog sang longag sang Allaw ng Pagpatana. Ono yang inangun mayo? Di ba akadtonan mayo aw atabangan mayo? 12 Na, labaw pa yang bili ng otaw kaysang karniro! Agaw di kita masopak sang Hokoman kong matabang kita sang kapag-onawa ta sang Allaw ng Pagpatana.”

13 Ansinyan yagalaong si Isa sidtong otaw na yamasadi yang sangkilid na arima nan, “Onata yang kammo arima.” Na, yonat da nan aw yamadyaw dayon yang arima nan na mag-onawa ng sangkilid na arima nan. 14 Ansinyan lyomogwa da yang mga Parisi sikun sang pagsasambayangan aw yanagbaaw-baaw silan daw monono nilan patayun si Isa.

15 Adon, sabap ng kyatigaman ni Isa idtong pyagabaawan nilan, pyomanaw yan sikun sinyan na banwa. Madaig yang mga otaw na yamagad kanan aw pyakadyaw nan yang kariko ng mga masakitun. 16 Awgaid syagda nan yang mga otaw na di silan maggogod adto sang kadaigan ng makapantag kanan. 17 Maynini yang ininang nan kay untak matoman yang pyaglaongan ng Tohan pina-agi kang Nabi Isayas na laong nan,

22 Ansinyan aon dyaa adto kang Isa na sambok na otaw na kyasaytanan na bota aw amang. Pyakadyaw yan ni Isa, aw ansinyan yakakita aw yakapaglaong da oman yan. 23 Na, yang kariko ng mga otaw na yakakita sinyan yangkatingaa aw laong nilan, “Basin yan agaw yang Almasi, yang Anak ni Daud?”

24 Pagdungug sinyan ng mga Parisi, yagalaong silan, “Astaga! Makapalogwa gaid yan ng mga saytan kay yatagan yan ng kabarakat ni Bilsibol na pangoo ng mga saytan.”

25 Awgaid kyatigaman ni Isa yang dumduman nilan, agaw yagalaong yan kanilan, “Kong yang mga otaw sang sambok na pyagdatowan manag-onay magtanam, sang di amadogay amasapad inyan na pyagdatowan. Aw kong magakabain-bain yang mga otaw sang sambok na longsod atawa baay, sang orian magabuag da silan. 26 Mag-onawa sinyan, kong magabogaw si Iblis sang mga sakop nan na saytan, magakabain-bain da yang pyagdatowan nan aw sang di amadogay amasapad da yan. 27 Na, kong bunna yang pyagalaong mayo na yagapalogwa ako sang mga saytan kay si Bilsibol yang yaga-atag kanak ng kabarakat, sino kadi yang yaga-atag ng kabarakat adto sang mga inindowan mayo pagpalogwa ng mga saytan? Na, silan da yang magalaong na yamasayup kamo. 28 Awgaid sang bunna-bunna yagapalogwa ako ng mga saytan sabap sang kabarakat ng Nyawa ng Tohan. Aw yani yang tanda na dyomatung da adi kamayo yang pagdato ng Tohan.”

29 Ansinyan yaga-atag oman kanilan si Isa ng opamaan, laong nan, “Way otaw na makasuud sang baay ng makusug na otaw aw makakamang sang mga butang nan kong di nan ona gaposon idtong makusug na otaw. Awgaid kong yamagapos da nan, makakamang da yan sang mga butang sidto na baay. * 12:29 Yani na opamaan yagapatigam na yang kabarakat ni Isa labaw pa kaysang kabarakat ni Iblis.

30 “Sino-sino yang di madapig kanak, mapaglaban kanak. Aw sino-sino yang di matabang kanak pagtipon, magapakanat-kanat. 31 Agaw ipaglaong ko kamayo na yang kariko ng dosa ma-ampon aw maskin pa yang paglaong ng maat makapantag sang Tohan. Awgaid yang paglaong ng maat makapantag sang Nyawa ng Tohan, di ma-ampon. 32 Sino-sino yang magalaong ng maat makapantag kanak na Anak ng Manosiya, ma-ampon. Awgaid sino-sino yang magalaong ng maat makapantag sang Nyawa ng Tohan, di ma-ampon taman sa taman. † 12:32 Maynini yang pyaglaongan ni Isa kay maskin mapayag na yagapalogwa yan ng mga saytan sabap sang kabarakat ng Tohan aon mga otaw na yagalaong na ininang nan yani sabap sang kabarakat ni Iblis. Tanawa oman sa Kitab Injil, Markos 3:28-30.

33 “Kong madyaw yang kaoy, madyaw yang bonga nan. Awgaid kong dili ng madyaw yang kaoy, dili ng madyaw yang bonga nan. Agaw, akatigaman yang kaoy sabap sang bonga nan. 34 Mga limbongon kamo! Monono kamo makapaglaong ng madyaw sarta maat yang pangatayan mayo? Kay yang maskin ono na adto sa suud ng pangatayan ng otaw, idto oman yang ipaglaong nan. 35 Yang madyaw na otaw, madyaw yang pyaglaongan nan kay madyaw yang lasak ng pangatayan nan. Awgaid yang maat na otaw, maat yang pyaglaongan nan kay maat yang lasak ng pangatayan nan. 36 Na, ipaglaong ko kamayo na sang allaw ng paghokom amanobag yang mga otaw adto sang Tohan makapantag sang kariko ng mga pyaglaongan nilan na way siyat. 37 Kay sobay sang mga pyaglaongan mayo yang paghokom kamayo ng Tohan, daw atarimaun atawa asiksaun kamo.”

38 Pagkatapos sinyan dyomood kang Isa yang mga magiindoway ng Hokoman aw yang mga Parisi aw yagalaong silan kanan, “Kay Goro, karim nami makakita ng katingaan mo silbi tanda na syogo kaw ng Tohan.”

39 Awgaid tyomobag si Isa, laong nan, “Maat yang mga otaw adon na panahon aw yagapakawat silan sang Tohan. Yamangayo silan ng katingaan, awgaid way ipakita ko kanilan yatabiya sidtong katingaan na ya-inang adto kang Nabi Yonos. 40 Toong allaw aw toong gabi adto yan sa suud ng dubdub ng dakowa na isda. ‡ 12:40 Tanawa sa Kitab Tawrat, Nabi Yonos 1:17. Mag-onawa sinyan ako na Anak ng Manosiya, magapabilin ako sa suud ng kobor sa suud ng toong allaw aw toong gabi. 41 Na, sang allaw ng paghokom magabangon yang mga taga Ninibe upud kamayo na mga otaw adon na panahon aw magalaong silan na dait kamo siksaun kay wa kamo pagatawbat. Awgaid silan, yagatawbat silan sang mga dosa nilan pagdungug nilan sang pag-osiyat ni Nabi Yonos. § 12:41 Tanawa sa Kitab Tawrat, Nabi Yonos 3:5. Na, pagalaongon ta kamo na idi adon yang labaw pa kang Nabi Yonos. 42 Sang allaw ng paghokom magabangon oman yang soltana sang bangsa ng Siba upud kamayo na mga otaw adon na panahon aw magalaong yan na dait kamo siksaun. Kay maskin mawat yang banwa nan kyomadto yan untak magpaningug sang pyaglaongan ni Soltan Solayman kay maum yang katigam nan. * 12:42 Tanawa sa Kitab Tawrat, 1 Mga Dato 10:1-10. Na, pagalaongon ta kamo na idi adon yang labaw pa kang Soltan Solayman.

43 “Kong lomogwa yang sambok na saytan sikun sang otaw na yasuudan nan, magapanaw-panaw da yan sang mga banwa na way tobig untak manganap ng akapagpatanaan nan. Aw way kinita nan, 44 magalaong yan sang ginawa nan, ‘Mabarik da gaid ako sang dadaan na pyaga-uyaan ko.’ Na, pagbarik nan makita nan na waa day yaga-uya aw kyalinisan da idtong pyaga-uyaan. 45 Ansinyan mapanaw da oman yan kay magadaa yan ng pito pa na mga saytan na labi pa na maat kay kanan aw masuud silan sidtong otaw aw apag-uyaan nilan. Na, sang orian mas maat pa yang kabutang sidtong otaw kaysang pirmiro. Mag-onawa sinyan yang amaitabo sang mga otaw adon na panahon kay bali na kaat nilan.”

46 Sarta yaga-indo pa si Isa sang mga otaw, dyomatung yang ina nan aw yang mga mangkangod nan na usug. Yagatagad silan sa logwa kay karim nilan mapagbaaw kanan. 47 Ansinyan aon sambok na otaw na yagalaong kang Isa, “Yang ina mo aw yang mga lomon mo adto sa logwa. Karim nilan mapagbaaw kammo.”

48 Awgaid tyomobag si Isa sidtong otaw aw laong nan, “Sino kadi yang ina ko aw mga lomon ko?” 49 Ansinyan tyolli nan yang mga inindowan nan aw laong nan, “Tanawa, silan yang ina ko aw mga lomon ko. 50 Kay sino-sino yang yaga-inang ng karim ng Tohan na kanak Ama adto sa sorga, silan yang ina ko aw yang mga lomon ko na usug aw bobay.”