KAEM KO DEN PSALMS 119

119

Kaem ko den

1 Kariimet awiriya memek bo mena,

Yawe ko karo tua ko den mu diram la

karo tui lagasan, mu amilmilamonko.*

2 Kariimet awiriya nongomang motam

lilim te nu kuring karo tusan, mu amilmilamonko.

3 Nuna memek bo me betesan,

bare noko munan ningo mu te la aolak ilusan.

4 Nika kausa ningo nanga kausem,

ale diram la ninguru karo tunakko balem.

5 O ani aga angamang biya nunguningkiri mu nika den karo tuekko!

6 Ani ko sinar arik ale butata bitirik mu ani dolara bo me ta taikko.

7 Ani nika den laili mu ko sinar a se,

mu ani angamang motam diram te la ka nip patawurikko.

8 Ani nika den la karo tuekko;

buta se ni ani me aga bitarko!

9 Kulak itiwik bo awuk ko munan ko sinar tauk se ningo la anirukko?

Mu nika den karo tuata ko munan te la.

10 Ani angamang motam lilim nikate bita

lagasam; ni aga bitar se nika den bo me ta kulukekko.

11 Ani memek bo nikate me bitirikko angamang, owore te se

nika den ninguru ilukuawusam.

12 O Yawe, ani nika nip patawusam;

nika den la aga kasuruko.

13 Nika den ni kiring te aratam mu,

ani agiring te balu pagorsam.

14 Ani nika den karo tuekko amilmilasam,

o kariimet bo noko ali imi ko nam giam

suen biya se ko amilmiloso iwita.

15 Ani nika den umu ko iki gurugu se,

amotam nika kiwem mu te la bita lagasam.

16 Ani nika den ko ninguru amilmilasam;

ani den mu ko me angamili saparukko.

17 Ani nika ura kari, se nika ningo agate

bitar se, ani te terong baga se ka den karo tuekko.

18 Aninga amotam sinar awur se,

ani mel ningo ningo nika karo tua ko den ningi mu arigekko.

19 Ani kariimet iwareng bo iwita ali imi te

bagasam; buta se nika den ani ago ko me kaluwurko.

20 Aninga angamang motam ko niara

pempem la mu nika den ko nia lagoso.

21 Ni nunumi patawura ko kariimet mu

ining nungarsam, se am memek tamonko, mu awuk,

nuna nika den me karo tusan.

22 Yam nungarkiwer se bala memek se

ining singi memek angimik te me bita se lagamonko,

mu awuk, ani nika den karo tusam.

23 Kari supuling alo ilu biguwumon ale ani

memek te aga betemonko balmon ta wore, ani nika ura kari mu

nika den la ko iki gurugu lagarikko.

24 Nika den lilim la mu ko ani ninguru

amilmilasam, mu awuk, mu aninga wosagam, se aga kiti guruguso.

25 Ani dagulem ale kupkup ningi kurakor kuring nagurem ale aniwasam;

buta se ka den te aga patawur ale sokel iru aisuko.

26 Ani aga ikup suen la ka manem se ni ani agiring iluwem;

buta se nika den aga kasuruko.

27 Aga sangaru se nika den ko duap ninguru ko ikiek,

ale ani nika kiwem bibiya mu ko iki gurugu se lagarikko.

28 Ani angamang motam sokel menaram;

nika den te sokel aisuko.

29 Ni aga bitaru se kiwem kawel bo aga bagara aolak me maguwurokko;

gemang lila te nika karo tua ko den aga kasuruko.

30 Ani diram la karo tua ko lage mu angamang tuem;

ani nika den lilim la angamang tuem.

31 O Yawe, ani nika den ilukuawusam;

ni me aga bitar se dolara aisimonko.

32 Ni aninga ikia ulal awurem,

se ani nika gemang karo tuekko.

33 O Yawe, nika den te lage aga kasuru se,

ani tom pempem karo tui se lagarikko.

34 Aga ikia sinar awur se, ani nika karo tua ko den mu karo tuek,

ale angamang motam lilim te karo tuekko.

35 Nika den te aga kiti guruguko,

mu awuk, ani umu ningi amilmil arigisam.

36 Angamang motam patawur se ni la ka

den karo tui se, ali imi ko nam giam abiring tuekko.

37 Ni agarkiwer se ali ewere ko mel,

kumik ningo bo mena mu, amotam me gurugokko;

nika den te daiga bagara ningo aisuko.

38 Ani nika ura kari se ni anapeya

kariimet ni bowa ningi bagasan mu

nunga balem mu ani agotala aisuko.

39 Nika den te aga sangaru se me dolirikko,

mu awuk, nika den mu ningo se diram.

40 Ani nika kausa ningo wore ko kua

lagasam! Se ka ningo nuam mu te marak iru aisuko.

41 O Yawe, nika kua nangara yawara mu

aga kasuru ale balem butata aga sangaruko.

42 Ani nika den te ira sanamasam,

ale awiriya aga balu maguwuso mu koma balu tuekko.

43 Aninga loagara mu nika den nunguning mu te la loaga lagasam;

buta se aga sangaru se nika den nunguning balu se lagarikko.

44 Ani pempem la nika karo tua ko den mu butata karo tui se lagarikko.

45 Ani nika kausa den ningo mu karo tusam owore te se,

ani kiwem bo ko dungan iwita me ta bagarikko, mena.

46 Ani nika den mu king nongoma te am

balu pagik, ale kiwem betesam umu ko me ta dolirikko.

47 Ani nika den suen la ninguru ko amilmilasam,

mu awuk, ani nunga kuesam.

48 Ani ninguru nunga kuesam ale nunga

amilmilasam, ale aga bagara te mu ko iki gurugu se lagarikko.

49 Ni den ka ura kari ani agarak balem mu ko kamili me saparukko;

mu awuk, den borta ani te ira sanamasam ale sokel tasam.

50 Tom ani ikup yaman ningi kapasam mu

nika den sangam aisiso se ningo la bagasam.

51 Nunumi patawura ko kariimet mu ago ko nongomang bataga bo mena,

dolara den te ninguru aga maguwusan,

bare ani nika karo tua ko den mu me ta abiring tusam.

52 O Yawe, ani nika den balu beterem se

ani lagoso mu ko angamin ares maso,

se umu ani angamang motam sangam tuso.

53 Tom kari memek bitawara mu nika den

kulukursan, mu ani angamang ikuwoso.

54 Ani apareyate baga se wore,

nika den mu ani wur te ilu lagasam.

55 O Yawe, ani tirom ningi nika nip ko angamin ares maso,

se ani nika karo tua ko den mu ko iki gurugu lagasam.

56 Se marak ningo angimik te kaparam,

mu awuk, ani pempem nika den karo tui lagasam.

57 O Yawe, ni keta aninga mel suen biya;

ani nika den karo tuekko aga ikia kalem.

58 Ani angamang motam lilim la te ka

isarsam, nika den te balem uwutata gemang lila aisuko.

59 Aninga kiwem kasik la ko ikia taem,

ale angamang nika den karo tuekko betesam.

60 Ani tom me aga kiarukko,

am tairate la nika den karo tuekko.

61 Memek betera ko kariimet mayang te aga talipamon ta wore,

ani nika karo tua ko den ko me ta angamili saparukko.

62 Ani tirom mung luan barasasam ale

nika den ningo dirkiriyam mu ko amilmil kisisam.

63 Ani awiriya nika nguangasan mu nongorak suanta,

se awiriya nika kausa ningo mu karo tusan, mu nongorak suanta tala.

64 O Yawe, ali imi nika kua ana nangara ko kiwem karogo terong mam;

buta se ka den ningo aga kasuruko.

65 O Yawe, ni ka den balem butata,

ani ka ura kari agate ningo la bitarko.

66 Nika ikia sinar se tutera ningo aga kasuruko,

mu awuk, ani nika den ko angamang ningi nunguning aram.

67 Ni ani bu me aisa la mu ani memek bitakasam,

bare aitak ani nika den karo tusam.

68 Ni mu ningo, se ni anapeya betesam mu ningo la;

buta se nika den aga kasuruko.

69 Nunumi patawura alo mu ani ago ko den kawel balsan,

bare ani angamang motam lilim te nika den karo tusam.

70 Nononga nongomang motam au kaparam se nunga ikia ngualaram,

bare ani nika den ko ninguru amilmilasam.

71 Ani bu taem mu aninga ningo ko,

mu awuk, bu umu te asele ani nika den mu ari ko ikiem.

72 Den ni kiring te arataso mu aninga te mu mel aromemek,

ali imi ko manga se ko mel ningo ningo mu nunga kia saparam.

73 Ni kiting te kupkup ilu biguwurem ale aga nungem;

ni aga ikia sinar awur se, ani nika den ko ikiekko.

74 Awiriya nika nguangasan mu, ani agarkamon ale amilmilamonko,

mu awuk, ani aga loagara mu am nika den te diram bita lagasam.

75 O Yawe, ani ko ikisam, nika den mu ningo dirkiriyam,

se nika diram la karo tua ko munan te ani bu aisem.

76 Ani nika ura kari agarak den kalem

uwutata, nika kua nangara kumik

menara mena mu te, angamang motam tagi patawurko.

77 Nika gemang lila ani ais se ani te bagarikko,

mu awuk, ani nika karo tua ko den ko ninguru amilmilasam.

78 Nunumi patawura ko kariimet alo den

kawel kumik duap mena ani ago ko

balsan, mu ko koma memek nungaru se dolomonko;

bare ani mu nika den mu ko iki gurugu se lagarikko.

79 Awiriya nika den ko nguanga se iki karo tusan mu aningate taimon,

se ani nika den umu nunga kausek se ikimonko.

80 Aninga angamang biya mu ni aga sangaru se nika den karo tuekko,

ale kiwem umu te mu ani ko dolara me taikko.

81 Ani nika saonga ko kimikam la lagerem ale adera angimik sokel menaram,

bare ani nika den te ira sanamasam.

82 Ani nika den wore ko nunguning ko amotam bita se maem,

“Ni amaru te aga sangaruko ya?” maem.

83 Ani mu pulut gigira tama motam te kaetma se marakawara owore iwita,

bare ani nika den mu ko angamili me saposo.

84 Tom awila nunguningkiri ani, nika ura kari, kimi bita lagarikko?

Ni amaru te kari aga bita maguwusan mu nunga maguwurko?

85 Nunumi patawura alo, ani te aga ilumonko, mutim ilu betesan,

mu nika karo tua ko den kiasan.

86 Nuna aninga bita maguwusan mu

kumik duap bo mena, buta se ni aninga sangaruko;

mu awuk, nika den mu mel biya se mel nunguning.

87 Nuna katirta ali imi te aga menawumonko,

bare ani nika den mu me ta patawu sapasam.

88 Nika kua nangara ko munan te, aga sangaru se marak baga se

nika den karo tuekko.

89 O Yawe, nika den mu kumik menara

mena; sokel karogo duruk wonong te butata aniso.

90 Nika diram la karo tua ko munan mu,

tom pempem la kuriang luan gue gue te butata aniso;

ni ali lilim la nungem burangerem se

yager nukuri ago aora biya butata aniso.

91 Nika den uwutata aniram tai aitak,

mu awuk, melmasak suen la mu nika ura dungan betesan.

92 Nika karo tua ko den mu ani amilmil aisiso.

E ani me ko amilmilasam le mu,

tom ani ikup arigem mu te ani angimik lilim ago maga namerem la le.

93 Buta se ani nika den mu me ta angamili saparukko,

mu awuk, borta te ni aninga ilukuawurem se ani bagasam.

94 Aga sangaruko, mu awuk, ani nika;

se nika den karo tui lagerem.

95 Memek motam alo mu aga momon se kuerikko kimi bitawasan,

bare ani nika den ko ikia ninguru bitirikko.

96 Melmasak ningo ningo suen la mu ko tom tukunang gotek,

bare nika den mu du biya se ulal biya, se kumik menara ko tom mena.

97 Ani nika karo tua ko den mu ninguru ko kuesam!

Ale tom pempem ko iki gurugu lagasam.

98 Nika den mu pempem ani agarak baga se ikia sinar ninguru aisiso,

se memek motam alo mu ani agarak me terong maman.

99 Aninga kitigot wiram ale aga ikia sinar

aram se aga kausa kari nunga kiarem,

mu awuk, ani nika den ko iki gurugu lagasam.

100 Aninga ikia sinar mu kariimet garuk nunga ikia sinar kiaram,

mu awuk, ani nika kausa ningo mu karo tusam.

101 Ani lage memek suen la abiring tuem,

mu awuk, ani nika den karo tuekko.

102 Ani nika den mu me ari daleluwurem,

mu awuk, ni keta aninga kausem.

103 Beras ko ningo mu yamanam,

bare nika den mu ani agiring te am yamanam nunguningkiri!

104 Ani nika den mu te ikia ningo tasam;

buta se ani tuang memek mu suen la abiring tuem.

105 Nika den mu aninga galep, lage aga

kasurso, ale aninga lage nikinang tuso.

106 Ani den bo kalem ale sokel tuem mu

iwita, ani nika den diram la karo tuekko maem.

107 O Yawe, ani ikup yaman giem terong mam;

nika den ningo mu te marak sokel iru aisuko.

108 O Yawe, angamang motam lilim la te ka nip patawusam mu to ale,

nika den aga kasuruko.

109 Tom suen la lage memek mu aga maguwurokko taiso,

bare ani nika karo tua ko den mu me ta angamili saposo.

110 Kariimet memek motam alo mu ani ago ko bawang bo beteman,

bare ani nika den mu me abiring tuem.

111 Nika den suen la mu aninga mel ningo, pempem agarak anirukko;

den mu aninga angamang motam amilmil tuso.

112 Aninga angamang motam mu anapeya aratuk ta wore,

nika den karo tui se lagarikko aniso.

113 Ani kariimet ikia ilagala te bagasan mu ani me nunga kuesam,

bare ani nika karo tua ko den ko kuesam.

114 Ni aninga manga gek am se aga karem,

se aninga loagara mu nika den ningi la bita lagasam.

115 Nina memek betera ko kariimet, tagi talko,

se ani aga Kaem ko den karo tuekko.

116 Nika den kalem umu te aga ilukuawur se, ani marak bagarikko;

ani nikate la loaga lagasam, umu te aga

sangaru se ani me ipi loaga laga dolirikko.

117 Aga sinar to se ani memek bo me arigekko;

ani nika den mu la ko ikia to se lagarikko.

118 Ni awiriya nika den me karo tusan mu nunga biriruwusam;

mu awuk, nuna ikia kawel mu te nongota nunumi kuluruwasan.

119 Ni ali imi ko kariimet memek mu mel

memek iwita nungarkasam ale nunga gi warsam;

buta se ani nika den ko kuesam.

120 Ani nika ko nguangasam ale angimik lilim barowara maso;

ani abugura kulukursam ale nika den ko ikia to lagasam.

121 Ani kiwem ningo diram se yawarakala mu beterem,

buta se ni aga bitaru se memek betera alo mu me aga bita maguwumonko.

122 Ani nika ura kari, aga ningo ko sinar toko;

aga bita to se nunumi patawura alo mu me agarak kapamonko.

123 Ni den ningo dirkiriyam kalem owore te ani loaga lagasam,

ale ni aga sangaru toko loaga laga, amotam dagulam.

124 Buta se nika kua nangara kumik

menara mena wore ko munan te aga

sangaru ale nika den aga kasuruko.

125 Ani nika ura kari; aga ikia sinar awur se, ka den ko sinar arikko.

126 O Yawe, ni kiwem bo bitarko,

mu awuk, nika den kulukurman.

127 Nunguningta, nika den mu mel ningo ningo kia saparam,

mel yawara nunguningkiri ta wore am kia saparam tala,

se ani ninguru ko kuesam.

128 Nunguningta, nika den mu aninga kiti guruguso,

se kiwem kawel suen la mu ani me ta ko kuesam.

129 Nika den suen la mu yawarakala;

buta se ani karo tusam.

130 Nika den apusan mu nikim nangarso,

ale kariimet den umu me ko ikia ta wore ikia sinar nungarso.

131 Ani nika den ninguru ko iki kutuwurekko angamang nia lagoso.

132 Kema gurugu ale gemang lila aisuko;

kariimet awiriya nika kuesan mu ni uwutata nongote betesam.

133 Nika den te aninga aolak diram la kiti

gurugu se kiwem memek bo ta ani me aga kiarukko.

134 Kariimet memek alo nuguting te aga

sangaru to se ani nika den karo tuekko.

135 Kema gurugu ale gemang motam ani

ka ura kari aisu ale nika den aga kasuruko.

136 Aninga amononge mu yu ko kapawoso,

mu awuk, kariimet nika karo tua ko den me karo tusan.

137 O Yawe, ni mu ningo dirkiriyam nunguningkiri,

se nika den mu diram la.

138 Nika den suen la nangarem mu am

ningo diram, se anananga ningo ko mel biya nunguningkiri,

kari bo ko suwik saparukko mel bo mena.

139 Angamang magara mu tama ko kaniwoso,

mu awuk, kager kari memek nika den mu mel yam ko betesan.

140 Ni ka den mu me gurugusam patawusam

se ani arigem mu am ningo, se yawara nunguningkiri;

se ani nika ura kari ninguru ko kuesam.

141 Ani mu kituwura se agarki maguwusan,

bare ani nika den mu me ta ko angamili saposo.

142 Nika ningo dirkiriyam la bagara ko munan mu kumik menara mena,

se nika karo tua ko den mu den nunguning.

143 Ikup aga iram se angamang daung daung maso,

bare nika den mu ani amilmil aisiso.

144 Nika den mu ningo dirkiriyam la pempem aniso;

aninga ikia sinar awur se ani te bagarikko.

145 O Yawe, angamang motam lilim te ka arusam;

agiring ilup se nika den karo tuekko.

146 Ani nikate aisam, aga sangaru to se ani nika den karo tuekko.

147 Ani worem me bausa la barasasam ale nika saonga ko aisam;

aninga amotam mu nika den te la loaga lagasam.

148 Ani tirom mu amotam anira mena, am marak laga se

nika den ko iki gurugu lagasam.

149 O Yawe, nika kua nangara mu ko munan yawara mu te agiring ilupko;

nika den te daiga bagara ningo aisuko.

150 Kariimet kiwem memek te aga bita

maguwumonko mu tai angimik aman,

nuna nika karo tua ko den mu me karo tusan.

151 Bare Yawe, ni ani agarak pingi baga se aga sangorsam,

se nika den suen la mu nunguning la.

152 Ani ulengkala la nika den mu ari ko

ikiem, mu ni girakala la beterem se nukuri ago butata anirukko.

153 Ani ikup yaman ningi bagasam ewere arik ale aga sangaru toko,

mu awuk, ani nika karo tua ko den mu me ko angamili saposo.

154 Kari memek nuguting te aga sangaru

to ale ka den te balem uwutata aga bitaruko.

155 Memek bitawara alo mu nika den me karo tusan,

buta se ni me nunga sangaru toko.

156 O Yawe, nika gemang lila mu mel aromemek;

ka den te balem uwutata aga bitaruko.

157 Aninga bita maguwura ko kariimet alo

mu suen biya, se aga bita maguwusan,

bare ani nika den me ta abiring tusam.

158 Nika kariimet saki nika den nubiring

tusan mu ko ninguru angamang magoso,

mu awuk, nuna nika den me karo tusan.

159 O Yawe, ani nika den ko kuesam mu ni ko ikisam,

buta se ago ko kuar ale aga bitaruko.

160 Nika den suen la mu am nunguning la;

nika munan den ningo dirkiriyam la mu kumik menara mena.

161 Kari supuling memek alo aga bita maguwusan mu kumik duap bo mena,

bare ani nika den ko suanta nguangasam.

162 Ani nika den ko aisam amilmilasam,

o kari bo mel bo ningo arigiso ale iruso ko amilmiloso iwita.

163 Ani kawel ko munan mu me ko kuesam ale biriruwusam,

bare ani nika karo tua ko den mu ko kuesam.

164 Ani nika den ningo dirkiriyam mu ko, woremkalal suanta mu,

tom suen biya ko amilmil kisisam.

165 Kariimet nika karo tua ko den ko

ninguru kuesan mu nongomang lila te bagasan,

se tareng memek bo te me ta dagulamonko, mena.

166 O Yawe, ani ni aga sangaru toko kimikam la loaga se,

nika den karo tui se baga lagasam.

167 Nika den mu yawara se ani karo tusam,

mu awuk, ani tawun biya ko kuesam.

168 Ani nika den karo tusam,

mu awuk, ni aninga kiwem mu ari ko iki sapasam.

169 O Yawe, aninga niara ikiko;

nika den te aninga ikia sinar awurko.

170 Ni aninga guranek ikiko;

nika den te kalem uwuta, aga sangaru toko.

171 Ani wur te nika nip patawurikko,

mu awuk, ni ka den aga kasursam.

172 Ani nika den ko wur iluwekko,

mu awuk, nika den suen la mu ningo dirkiriyam nunguningkiri.

173 Nika kiting mu aninga sangukko pingi la anirukko,

mu awuk, ani nika den karo tuekko angamang beterem.

174 O Yawe, ani ni aga sangaru toko angamang aniso,

se nika karo tua ko den mu ani amilmil aisiso.

175 Ni aga bitaru se ani marak baga se nika nip patawurikko,

se nika den mu sangam sokel aisuokko.

176 Ani sipsip bo nguala sipa yumu namerem wore iwita.

Ani nika ura kari, aga kupu ale agarkiko,

mu awuk, ani nika den mu ko me angamili saposo.

*119:1: Verse suan suan psalm imi ko paoga paoga ningi mu Hebrew den ko letter te aniso: Aleph, Beth, Gimel, Daleth se saki ago.