27
27:1-10 Ye Judasi Kinie Ulu Te Wendo Orumu Temanemo* akumunge 27:3-10 Lipe Mundorumu Yema 1:16-19.
27:1-2,11-26 Romo Gapomano Ye Nomi Paillate Kote Pilipe Molopa Yesusinge Kotemo Pilipelie “Kolopili.” Nirimu Temanemo† akumunge 27:1 Mako 15:1 ekendo, LLuku 22:66-71; 27:2,11-14 Mako 15:1 ekendo-5, LLuku 23:1-5, Jono 18:28-38; 27:15-26 Mako 15:6-15, LLuku 23:13-25, Jono 18:39-19:16.
1 Ipulueli-ou kolea kokele tangorumu kinie Pulu Yemo popo tondoringi ye awilime kinie,‡ bokumunge alsena anjokondo “34. pris”. Juda yembomanga tapu yema kinie enone pali ⸤Yesusinge kotemo pilku pora sikulie⸥ ‘Yu topo kondamili.’ ningu, ningu panjeringi. 2 Aku ningu panjikulie yu liku, ka toko, mengo puku, ⸤Romo⸥ gapomano ye nomi Paillate molorumune mengo puku kote tenderingi.
3 Kanu kinie Judasi, yu Yesusi lipe yunge opa puluema sirimu ye kanumu, Yesusinge kotemo pilkulie “Kolopili, toko kondangi.” niringi kinie pilipelie yuni Yesusi eno lipe sirimu mele pilipe keri pilipelie kelepa konopu alowa tepa enonga kou sillipa wane paono tene ou yu siringime kelepa memba pupe Pulu Yemo popo tondoringi ye awilime kinie Juda yembomanga tapu yema kinie sipelie nimbendo: 4 “Nane ye eno lipu sindu kanu yemo yu ulu te tepa naa kenjeli yemo ‘Toko kondangi.’ nimbu lipu sindumu§ Giriki ungune kinie Ingillisi ungune kinie ye te toko kondongemonga bokune “mememo” toringi molemo (Ou Pulu Pulu 4:10-11). Ungu pulu te LLipai 17:11,14. Pisini ungune 27:8 mindi “mememo” toringi molemo. Ya ungu pulumu torumulu. 27:6 Giriki ungune “mememonga koume” molemo. paa ulu pulu keri te tendu.” nirimu.
Nalo enone topondoko ningendo: “Akumu olionga ungu te molo. ⸤Nu nunu mindi olio liku sinu.⸥ Akumu nunge kongonomo.” niringi.
5 Kanu kinie Judasi yuni kou sillipa kanume meli pupe ⸤Pulu Yemo popo toringi⸥ ulke tembele palana topa anjokondo mundupelie yu eno mundupe siye kolopa anjo purumu. Anjo pupelie ‘Ka nombo kolambo.’ nimbelie ka te lipe meli pupelie ka nomba kolorumu.
6 Pulu Yemo popo tondoringi ye awilimene kou kanume ⸤manie polona⸥ lierimu kanoko likulie ningendo: “I koume yembo topo kondomolondo simulume kene ulke tembele koume kinie tere lepo nosimolo kinie kapola naa temba. Akumunge ungu mane te pelemo kene naa nosiemili.” ningulie 7 ungu te ningu panjikulie ningendo: “I kou monemane mingi sosipene mane tepa mimi telemo yemonga mamo topo topo liemili. Yembo ma te naa lepa enonga kolea sulune yembo ya ongo molemelemanga yembo kolongema akune ono teangi.” ningulie aku siku topo toko lsingi. 8 ⸤Kanu kou monemane ye te toko kondonge aulkemo akisinderingi koumene⸥ aku teringimunge kanu mamo imbi leko ‘Yembo Toko Meme Ondoringi Mamo’ niringi mele kinié kepe aku sipu nilimolo.
9-10 ⸤Juda ye awilimene⸥ aku siku teringimunge Pulu Yemone ungu umbu tondorumume pilipe yemboma nimbe sirimu ye Jeremayane ulu te pe wendo ombá ou nirimu mele kamu wendo orumu. Yuni nimbendo:
“Awilimuni nando “Tei.” nirimu mele
eno aku siku tengendo
Isirele yembomane “Ye akumu kou sillipa
wane paono tenene topo toko liengi.”
niringi koume likulie,
kanu koumene mingi sosipene
mane tepa mimi terimu yemonga mamo
nirimu.
11 Judasi aku sipe tepa molopili Yesusi Romo gapomano ye nomi ⸤Paillate⸥ molorumumunge kumbikerena angilierimu kinie kanu ye nomimuni ⸤yunge kotemo pilipelie⸥ yu walsipe pilipelie nimbendo: “Nu Juda yembomanga ye nomi kingimu molo moloye?” nirimu.
Yesusini topondopa nimbendo: “Sike nikinu. Akumu na.” nirimu.
12 Pulu Yemo popo tondoringi ye awilime kinie, ⸤Juda yembomanga⸥ tapu yema kinie, enone Yesusi kote tendeko Paillatendo ⸤kolo toko⸥ ungu awisili ningulie ningendo “Yesusi yu tepa kenjilimo.” ningu yu kote tenderingi kinie Yesusi yu ungu te naa nimbe we angilierimu.
13 ⸤Yesusini ungu te naa nirimu kanopalie⸥ Paillatene yundu nimbendo: “Nu ulu keri awisili terinu nikimili mele nu naa pilkinuye?” nirimu kinie
14 Yesusi ⸤yu tepa kenjerimu niringi mele⸥ pundu topa ungu telu kepe naa nimbe ⸤karaye naa tepa we angilierimu kinie kanopalie Romo⸥ gapomano ye nomi kanumuni paa mini-wale mundupe konopu awisili lipe mundorumu.
15-16 ⸤Yesusi kote tendeko molangi,⸥ ye te, yunge imbi Barapasi, yu mongo lsimu mele yemboma pali pilku moloringi kanu yemo yu ka ulkena perimu. ⸤Ponie tenga tenga, Juda yembomane kolea awili Jerusalleme ongo akune suku⸥ Pulu Yemone enonga anda-kolepalime Naa Topa We Omba Purumu mele pilingendo† bokumunge alsena anjokondo “30. Pasova”. langi noringi walema wendo orumu kinie enone ka ulkena perimu ye te imbi leko “Wendo liku mundou.” ningu mawa teringi kinie ⸤Romo⸥ gapomano ye nomimuni kanu yemo wendo lipe yemboma sirimu. 17 ⸤Aku siku te-pou-pou teringi walema kamu wendo omba pepili Yesusi kote tenderingi pilipelie nirimumuni,⸥ Juda yemboma liku maku toko moloringi kinie Paillatene eno walsipelie nimbendo: “Ye nawe ka ulkena wendo lipu eno siembo konopu lekemeleye? Ye Barapasi wendo lipu siembo, molo enone “Pulu Yemone “Eno nokopa kondomba ye te lipu mundumbo.” ou nimbe mako torumu ye nomi Kirasimu.”‡ bokumunge alsena anjokondo “23. Krais”. nilimele ye Yesusi wendo lipu siemboye?” nirimu. 18 ⸤We yemboma Juda yembomanga ye awilime munduku siye kolko enonga ungume liku su siku Yesusinge ungumu pilku yu lombili andoringimunge Juda yembomanga ye awilime⸥ Yesusi-kinie konopu keri panjikulie§ Yesusi konopu keri panjeringimunge ungu mare Jono 7:45-49, 11:45-49, 12:12-15,17-19. kote tenderingi-ne pilipelie Paillatene aku sipe nirimu.
19 Paillate kote pilieli polona ⸤molopa ‘Juda ye awilimene topondoko ungu te ningenje.’ nimbe nokopa⸥ molorumu kinie yunge menuni ungu te yu molorumune nimbe mundupelie nimbendo: “Nuni andi ye sumbi nilimu ulu te naa tei. Kinié yu kumbu tepo kanondumunge nanga konopune umbune awisili wendo omu kene yu ulu te paa naa tei.” nirimu.
20 ⸤Paillatene “Ka ye nawe wendo lipu siemboye?” nirimu kinie pilkulie⸥ Pulu Yemo popo tondoringi ye awilime kinie, ⸤Juda yembomanga⸥ tapu yema kinie, enone we yemboma kondi toko ungu umbu tondokolie “ ‘‘Yesusi topa kondopili. Barapasi wendo lipe sipili.” niee.” niringi.
21 ⸤Aku niringi kinie pilipelie Romo⸥ gapomano ye nomimuni enondo “Yeselonga ‘nawe wendo lipu siembo.’ konopu lekemeleye?” nimbe walserimu kinie
enone topondoko ningendo: “Ye Barapasi ⸤wendo liku yando si⸥..” niringi.
22 Aku niringi kinie pilipelie Paillatene enondo nimbendo: “Aku liemo, enone “Pulu Yemone “Eno nokopa kondomba ye te lipu mundumbo.” ou nimbe mako torumu ye nomi Kirasimu.” nilimele ye Yesusi, nambe-eamboye?” nimbe walserimu kinie
enone pali “Yu unjo perana kolopili uku toko panjei!” niringi.
23 Aku niringi pilipelie yuni enondo nimbendo: “Aku nambemuneye? Yu mongo nambolka mongore limuye?” nirimu.
Nalo enone ⸤altoko⸥ paa tondolo munduku ningendo: “Molo! Yu kolopili, unjo perana uku toko panjei!” niringi.
24 Yunge ungumu naa pilku, opa tenge teringi kanopalie Paillatene no mare kolopa lipe, yembo liku maku toko angilieringime kanoko molangi ki kulumiye topalie nimbendo: “I yemo toko kondonge kolomba kinie* ungu pulu te inie yakondo 27:4*. eno-kinie ungu pemba; nanga ungu te naa pemba.”† Paillatene terimumunge pulumu Ungu Mane 21:1,6-9. nirimu.
25 ⸤Aku sipe nirimu kinie pilkulie⸥ yembomane topondoko ningendo: “Yu tonge kolombamonga umbune pembamo olio kinie olionga ambolangoma kinie pepili.” niringi.
26 Kanu kinie ye Barapasi ka ulkena wendo lipe eno sirimu. ⸤Aku tepalie⸥ Yesusi lipe ⸤yunge ami yema⸥ sipelie nimbendo: “Yu ka-pulsene tokolie pe ‘Unjo perana kolopili.’ ningu mengo puku unjo perana uku toko panji-pee.” nirimu.
27:27-31 Romo Ami Yemane Yesusi Ungu Taka Tondokolie “Kolopili.” Ningu Mengo Puringi Temanemo‡ Mako 15:16-20, LLuku 23:26-33, Jono 19:16-17.
27 Kanu kinie ⸤Romo⸥ gapomano ye nomimunge ami yemane Yesusi liku kanu ye nomimu perimu ulke awili§ Aku ulkemo imbi leko ‘Peretorie’ niringi aku imbimu mindi ya Giriki ungune niringi. akune suku ⸤yemboma liku maku toko moloringi koleana⸥ pukulie, enonga ami talape yema pali “⸤Yesusi ya molemona⸥ sukundu sukundu waa.” niringi. 28 Kanu kinie yunge mulumbalema kulku wendo lindiku, ‘Yu ye nomi kingi te none tepili.’ ningu mulumbale kondoli peanga te pakondoko, 29 unjo ka koko molorumu te mulkupiye teko ‘Ye nomi kingimunge waniemo.’ ningu pengena mere mundunduku, kingimene unjo kope te we ambolemele mele koló te liku yunge ki umbukundu amondokolie niringimuni, yu angilierimune koporongo langoko ungu taka tondoko imbi we kólo toko liku ola mundundungendo “Juda yembomanga ye nomi kingimu, nu angilinoye?” ningu 30 yunge kumbikerena olkambe toko kandoko, koló kope ambolorumumu liku yunge pengena kope to-pou-pou teringi.
27:31-66 Yesusi Toringi Kolorumu Kinie Ono Teringi Temanemo
27:31-44 Yesusi Unjo Perana Ola Uku Toko Panjeringi. Unjo Perana Pepili Juda Yembomane Yu Ungu Taka Tondoringi Temanemo* Mako 15:20-32, LLuku 23:26-43, Jono 19:16-27.
31 Yu aku siku ungu taka tondoko pora sikulie mulumbale kondolimu kulunduku, yunge ou panjerimu mulumbalema altoko panjindikulie “Yu unjo perana kolopili, panji-pemolo.” ningu yu liku meli puringi.
32 ⸤Romo ami yemane Yesusi Jerusalleme palana⸥ ulsu mengo punge pukulie niringimuni,† ungu pulu te inie yakondo 21:39*. Yu Jerusalleme omb orumu, Mako 15:21. kolea Sairini‡ Sairini akumu kolea awili Apirika sukundu kolea LLipia lierimu aku koleamonga taono awilimu lierimu. ye te, yunge imbi Saimono, ambolko liku ka mele siku Yesusi kolomba unjo peramo “Kolo wangoko mendei.” ningu siringi. 33 ⸤Pukulie⸥ kolea Golkota puku akune moloringi. (Golkotanga ungu pulumu ‘penge ombele lieli koleamo’.) 34 ⸤Yesusi akune mengo pukulie niringimuni, ‘Yemboma mindili naa nangi.’ ningu⸥ no waenena suku marasini kombili teli te munduku noseringi aku no waenemo§ Aku sipe wendo omb mele ou niringi ungumu Konana 69:21. ‘Yu nopili.’ ningu, siringi nalo aku no waenemo nomba pilipelie “Molo.” nimbe naa norumu.* ‘Mindili we nambo.’ nimbelie “Molo.” nirimunje.
35 Kanu kinie ⸤ami yemane⸥ yu unjo perana ola panjikulie unjomo liku ola anjeringi. ⸤Aku tekolie, ou unjona ola uku toko naa panjikulie⸥ yunge mulumbale ⸤kulunduku noseringime⸥ ‘Moke teamili.’ ningu eno yu mele mele linge mele pilingendo kou kate teko pe mulumbalema lsingi.† Aku tenge mele koronga-ou niringi (Konana 22:18). 36 Pe yu unjo perana ola angiliepili tapu teko kanoko moloringi. 37 ‘Yu mongo lsimu mele yemboma kanangi.’ ningu
IYE YESUSI JUDA YEMBOMANGA YE NOMI KINGIMU
ningu imbi toko yunge pengena olakondo unjona mondoringi.
38 Opa tekolo melema wa lsingili ye talo pea unjo pera talonga uku toko panjeringila. Te Yesusi yunge ki-umbukundu uku toko, te ki-tarokondo uku toko panjeringi.‡ ungu pulu te LLuku 22:37, Aisaya 53:12.
39 Akune ongo puringi yembomane Yesusi ⸤kanoko keri kanokolie yu⸥ ungu taka tondoko iri mele tokolie 40 ningendo: “Aa! “Ulke tembelemo tekisipulie altopo wale yepoko omba pupili takopo limbo.” nirinu yemo,§ Yesusini ulke tembelemondo sike nirimu ungu te Jono 2:19. Ungu te inie yakondo 26:61. ‘Naa kolambo.’ ningu nu nunu liku tapondou. Nu sike Pulu Yemonga Malo liemo unjo perana manie ou.” niringi.
41 Aku sikula Pulu Yemo popo tondoringi ye awilime kinie, Pulu Yemonga ungu manemanga pulume pilku mane siringi yema kinie,* bokumunge alsena anjokondo “34. pris”, “41. saveman”. ⸤Juda yembomanga⸥ tapu yema kinie, enone kepe yu ungu taka tondokolie ningendo: 42 “Yu yembo wema ‘Naa kolangi.’ nimbe lipe tapondorumu nalo yu yuyu ‘Naa kolambo.’ nimbe manda naa lipe tapondokomo. Yu ‘Isirele yembomanga ye nomi kingimu ⸤molio.’ nilimo mele sike aku sipe⸥ molemo liemo yu yuyu unjona manie opili. Yu yuyu unjona manie ombá kinie kanopolie ‘Yu sike olionga ye nomi kingimu.’ nimbu tondolo mundupu pilimolo.† bokumunge alsena anjokondo “8. bilip”. 43 Yuni ‘Pulu Yemone na lipe tapondomba.’ nimbe tondolo mundupe pilipe molemo kanumu; yu “Pulu Yemonga Malo molio.” nilimo‡ bokumunge alsena anjokondo “32.2. Pikinini Bilong God”. kene Pulu Yemone yu kanopa peanga kanopa, ‘Yu manie we olkanje papu.’ konopu liemu liemo kapola, yu omba yu lipe tapondopa ⸤unjona wendo lipili⸥.. ⸤Aku sipe temu liemo ‘Yu sike Pulu Yemonga Malo.’ nimbu tondolo mundupu pilimolo⸥..” niringi.
44 Wa noli ye talo yu-kinie unjoselonga uku toko panjeringi yeselone yu aku siku ungu taka tondoringilila.
27:45-56 Yesusi Kolorumu. Kolorumu Kinie Ulu Mare Wendo Orumu Temanemo§ Mako 15:33-41, LLuku 23:44-45a,46,45b,47-49, 27:45-50 Jono 19:28-30.
45 ⸤Yesusi unjona ola we angiliepili⸥ awi tangoli ena tuwellepo killoko terimu kinie kolea pali sumbulu topalie, pe ipupene ena tere killoko terimu kinie kelierimu. 46 Ipupene ena tere killoko mele terimu kinie Yesusini ru nimbelie nimbendo:
“Elloi, Elloi, llama sapakatani.”
nirimu. Akumu Juda yembomanga ungu te. Akumunge pulumu isipe:
“Nanga Pulu Yemo, nanga Pulu Yemo,
na nambemune munduku siye kolonuye?”* Konana 22:1.
nirimu.
47 Akune nondoko angilieringimenga marene yuni aku nirimu kinie pilku ⸤sundukulie⸥ ningendo: “Pilieme. Yu Illainja walsikimu.” niringi.† Ye Illainja yu koronga ou molopa, Pulu Yemone ungu umbu tondorumume pilipe yemboma nimbe sirimu ye kanumu. Yunge temane mare Ou Kingime 17, 18, 19, Pe Kingime 2.
48 Aku nirimu kinie pilieringimenga ye te tamburumbu lkisipe pupe ulú-pinje mele te lipe no waene kombili teli mare akune panjipelie, ‘Yesusi no waene kombili teli pinjena pelemomo nopili.’‡ Aku no-waene kombili telimunge ungu pulu te inie yakondo 27:34. Yesusini “Na no waka lekemo.” nirimu ungumu Jono 19:28. nimbe memba omba unjo pepena tenga ka topa olando sirimu. 49 ⸤Nalo yu no waenemo sirimu mele kanokolie⸥ we yembomane ningendo: “Molo. Kinié unjona we angiliepili. Illainjane sike yu ‘Naa kolopili.’ nimbe lipe tapondopa manie limbendo okomonje, kanopo kanamili.” niringi.
50 Yesusini ungu te tondolo ru nimbelie,§ Yuni nirimu mele LLuku 23:46, Jono 19:30. pe yunge minimundu ‘Pu.’ nimbe yu kolorumu.
51 Yu aku sipe kolorumu kinie ⸤ulu awili mare⸥ walsikele ⸤wendo orumu.⸥ Pulu Yemo popo toko kaloringi ulke tembele ⸤Jerusalleme suku angilierimu akune sukundu Pulu Yemo molorumu⸥ suluminia paa kake telimunge kerepulune ⸤‘Yemboma sukundu naa pangi.’ ningu ou alieli⸥ mulumbale awili tene pipi siku panjeringi angilierimu. ⸤Yesusi kolopa pora sirimu kinie⸥ kanu mulumbalemo awi-suku-singine olakondo maniendo sipe olá torumu.* Olakondo maniendo sipe ol torumu akumunge mana yembo tene naa terimu, Pulu Yemo yuni yuyu terimu lemo. Mulumbale panjeringi ungu pulumu Wendo Oringi 26:31-35, LLipai 16:1-17,34, nalo Yesusi kolopalie yunge mememo suluminia paa kake teline sukundu memba purumumunge kinié olio pali ‘Pulu Yemo kinie ungu niemili.’ nimbu akune manda pulimolomonga ungu pulu tondolomo Ipuru 8:1-2, 9:1,6-8,11-15, 10:1-4,10,19-22. ⸤Aku tepa,⸥ ma jimi-jimi te tepa, kou awilime topa ungu-mengu topa, 52 yembo ou ono teringi koleama anjo yando pupe, Pulu Yemonga yembo kake teli ou koloringime† Giriki ungune “uru peringime” molemo, akumunge pulumu inie yakondo 9:24*. ⸤Pulu Yemone⸥ topa makinjinderimu. 53 Lomboroko ola molko ono kolea peringine wendo ongolie, Yesusi pe lomboropa ola molorumu kinie Pulu Yemonga kolea awili kake teline‡ Jerusalleme kanumu. suku pukulie yembo awisili ‘Kanangi.’ ningu puringi.
54 ⸤Romo⸥ ami ye wane anderete nokorumu yemo kinie, yu pea Yesusi terimu mele tapu teko kanoko moloringi ami yema kinie, enone ma jimi-jimi tepa ulu lupe lupema wendo orumu kinie kanokolie eno paa mini-wale mundukulie ningendo: “I yemo yu paa sike Pulu Yemonga Malo lepamo.” niringi.
55 Ambo awisili mele, ⸤Yesusi unjo perana kolorumu⸥ akune sulu teko kanoko angilieringi. Ou kanu amboma ⸤enonga pulu⸥ kolea Gallilli disiriki munduku siye kolko Yesusi lombili andoko liku tapondoko nokoko ⸤Jerusalleme pea⸥ oringi amboma. 56 Enonga ambo te Makatalla taono ambo Maria, te Jemisi kinie Josese kinie elonga anumu Maria, te ye Seperinge maloselonga anumu.
27:57-61 Yesusi Ono Teringi Temanemo§ Mako 15:42-47, LLuku 23:50-56, Jono 19:31-42.
57 Ipupene, kolea kala tomba terimu kinie Arimatia taono ye kamako te, yunge imbi Josepo, yu kepe Yesusi lombili andorumu ye te, yu omba 58 ⸤Romo gapomano ye nomi⸥ Paillate molorumune pupe, “Yesusinge onomo na si.” nimbe mawa terimu kinie Paillatene yu “Onomo lipili.” nimbe ⸤ami yemando nimbe mundorumu⸥..
59 ⸤Paillatene “Kapola.” nirimu kinie⸥ Josepo pupe onomo manie lipe, mulu konde tene lipe kulupi torumu. Kulupi topalie 60 kou kande konde te, Josepo yu ‘Kolombo kinie akune na ono teangi.’ nimbe kou kande te akupe noserimu kou kandemonga suku memba pupe noserimu. Nosipelie kou kande kerepulune kou awili te perele-marele memba omba pipi sipelie yu kelepa purumu. 61 Makatalla taono ambo Maria kinie Maria te kinie* Aku Mariaselonga ungu te inie yakondo 27:56. Te inie anjokondo 28:1. elo kou kandemo lierimu kerepulune nondoko ⸤yu onomo kou kandena noserimu mele kanoko⸥† Pala ⸤ ⸥ akune molemo ungu akumu Pisini ungune molemola, akumu Mateyuni naa torumu nalo Makone sike torumu, Mako 15:47 molemo. ‘Umbu yembomane sumbi siku piliengi kene ya molopili.’ nimbu ya torumulu molemo. moloringili.
27:62-66, 28:11-15 Ami Ye Marene Yesusi Ono Teringi Koleamo Nokoringi Temanemo
62 ⸤Kanu kinie,⸥ ‘Opali ⸤koro molomolo wale⸥ Sambatemo.’‡ bokumunge alsena anjokondo “37.Sabat”. ningu pilkulie, kinié mele, melema undu-undu siringi kanu walemo pora nirimu kinie opalikundu Pulu Yemo popo tondoringi ye awilime kinie, Parisi yema kinie,§ bokumunge alsena anjokondo “34. pris”, “11. Farisi”. eno ⸤Romo gapomano ye nomi⸥ Paillate molorumune puku liku maku toko angilkulie 63 ningendo: “Ye Awilimu, ye kanumu ou naa kolopa we molopalie yembomane ‘Sike.’ ningu pilinge ungume kolo topa nirimu kanu yemo yu “Kolopolie wale yepoko omba pumbe kinie lomboropo ola molombo.” nirimu* Yesusini paa sike nirimu ungumu inie yakondo 16:21. olio pilierimulu kene 64 ⸤nuni ami yemando⸥ “Kanu yemo ⸤oleanga⸥ ono tengi kou kandemo wale yepoko paa mimi siku nokaa!” nieni. Naa nokonge kinie yunge lombili andoli yemane onomo ongo wa liku mengo pukulie “Yu lomboropa ola molopa omba pumu.” ninge. Aku siku kolo toko ninge kinie yu ou “Sike nikimu.’ niengi.’ nimbe kolo torumu ungumu maniendopa, enone ‘Yembomane ‘Yuni sike aku sipe temu.’ niengi.’ ningu kolo tonge ungumu paa olandopa pemba.” niringi.† Ou Yesusini nimbendo: “Na Pulu Yemonga Malo. Pulu Yemo nanga Tata. Pulu Yemone “Ye tene ‘Eno nokangi.’ nimbu lipu mundumbo.” nimbe, nimbe panjerimu ye nomi Kirasimu, ye nomi Mesaya, na aku yemo orundu molio.” nirimu ungu mare inie yakondo 21:1-9, LLuku 22:66-71, Jono 18:33-38, 19:14,19-22, ‘Yesusi lomboropa ola molomba mele pilkulie yembomane ‘Yuni “Molio.” nirimu mele ‘Paa sike aku sipe molorumu molemo.’ ningu kamu-kumu tondolo munduku pilinge. Akumu paa kamu keri lemba.’ ningendo aku siku niringi lemo.
65 Paillatene ⸤Juda ye awilimendo⸥ topondopa nimbendo: “⸤Aku liemo,⸥ ami ye mare liku mengo puku, “Yemo ono tengi koleamo nokoko kondangi.” ningu mondoko, ‘Yembomane ono koleamo ulu te naa teangi.’ ningu ‘Aulkemo tondolo pipi siemili.’ konopu lenge mele teangi.” nirimu. 66 ⸤Aku nirimu kinie⸥ pilkulie ami ye mare liku meli puku, yembo ono kou kandemo pipi siringi koumu pala teko pele leko enonga imbimu akune toko mondokolie, “Ami yema akune nokoko molangi.” ningu mondokolie ⸤eno puringi⸥..
*^ akumunge 27:3-10 Lipe Mundorumu Yema 1:16-19.
†^ akumunge 27:1 Mako 15:1 ekendo, LLuku 22:66-71; 27:2,11-14 Mako 15:1 ekendo-5, LLuku 23:1-5, Jono 18:28-38; 27:15-26 Mako 15:6-15, LLuku 23:13-25, Jono 18:39-19:16.
‡27:1: bokumunge alsena anjokondo “34. pris”.
§27:4: Giriki ungune kinie Ingillisi ungune kinie ye te toko kondongemonga bokune “mememo” toringi molemo (Ou Pulu Pulu 4:10-11). Ungu pulu te LLipai 17:11,14. Pisini ungune 27:8 mindi “mememo” toringi molemo. Ya ungu pulumu torumulu. 27:6 Giriki ungune “mememonga koume” molemo.
*27:9-10: Aku ungumu boku Jeremayana sumbi sipe naa molemo. Bokumunge alsena anjokondo “35. profet” kananila. Sekaraya 11:12-13, Jeremaya 19:1-13, 32:6-9 lipe tere lepa mele.
†27:15-16: bokumunge alsena anjokondo “30. Pasova”.
‡27:17: bokumunge alsena anjokondo “23. Krais”.
§27:18: Yesusi konopu keri panjeringimunge ungu mare Jono 7:45-49, 11:45-49, 12:12-15,17-19.
*27:24: ungu pulu te inie yakondo 27:4*.
†27:24: Paillatene terimumunge pulumu Ungu Mane 21:1,6-9.
‡27:26: Mako 15:16-20, LLuku 23:26-33, Jono 19:16-17.
§27:27: Aku ulkemo imbi leko ‘Peretorie’ niringi aku imbimu mindi ya Giriki ungune niringi.
*27:30: Mako 15:20-32, LLuku 23:26-43, Jono 19:16-27.
†27:32: ungu pulu te inie yakondo 21:39*. Yu Jerusalleme omb orumu, Mako 15:21.
‡27:32: Sairini akumu kolea awili Apirika sukundu kolea LLipia lierimu aku koleamonga taono awilimu lierimu.
§27:34: Aku sipe wendo omb mele ou niringi ungumu Konana 69:21.
*27:34: ‘Mindili we nambo.’ nimbelie “Molo.” nirimunje.
†27:35: Aku tenge mele koronga-ou niringi (Konana 22:18).
‡27:38: ungu pulu te LLuku 22:37, Aisaya 53:12.
§27:40: Yesusini ulke tembelemondo sike nirimu ungu te Jono 2:19. Ungu te inie yakondo 26:61.
*27:41: bokumunge alsena anjokondo “34. pris”, “41. saveman”.
†27:42: bokumunge alsena anjokondo “8. bilip”.
‡27:43: bokumunge alsena anjokondo “32.2. Pikinini Bilong God”.
§27:44: Mako 15:33-41, LLuku 23:44-45a,46,45b,47-49, 27:45-50 Jono 19:28-30.
*27:46: Konana 22:1.
†27:47: Ye Illainja yu koronga ou molopa, Pulu Yemone ungu umbu tondorumume pilipe yemboma nimbe sirimu ye kanumu. Yunge temane mare Ou Kingime 17, 18, 19, Pe Kingime 2.
‡27:48: Aku no-waene kombili telimunge ungu pulu te inie yakondo 27:34. Yesusini “Na no waka lekemo.” nirimu ungumu Jono 19:28.
§27:50: Yuni nirimu mele LLuku 23:46, Jono 19:30.
*27:51: Olakondo maniendo sipe ol torumu akumunge mana yembo tene naa terimu, Pulu Yemo yuni yuyu terimu lemo. Mulumbale panjeringi ungu pulumu Wendo Oringi 26:31-35, LLipai 16:1-17,34, nalo Yesusi kolopalie yunge mememo suluminia paa kake teline sukundu memba purumumunge kinié olio pali ‘Pulu Yemo kinie ungu niemili.’ nimbu akune manda pulimolomonga ungu pulu tondolomo Ipuru 8:1-2, 9:1,6-8,11-15, 10:1-4,10,19-22.
†27:52: Giriki ungune “uru peringime” molemo, akumunge pulumu inie yakondo 9:24*.
‡27:53: Jerusalleme kanumu.
§27:56: Mako 15:42-47, LLuku 23:50-56, Jono 19:31-42.
*27:61: Aku Mariaselonga ungu te inie yakondo 27:56. Te inie anjokondo 28:1.
†27:61: Pala ⸤ ⸥ akune molemo ungu akumu Pisini ungune molemola, akumu Mateyuni naa torumu nalo Makone sike torumu, Mako 15:47 molemo. ‘Umbu yembomane sumbi siku piliengi kene ya molopili.’ nimbu ya torumulu molemo.
‡27:62: bokumunge alsena anjokondo “37.Sabat”.
§27:62: bokumunge alsena anjokondo “34. pris”, “11. Farisi”.
*27:63: Yesusini paa sike nirimu ungumu inie yakondo 16:21.
†27:64: Ou Yesusini nimbendo: “Na Pulu Yemonga Malo. Pulu Yemo nanga Tata. Pulu Yemone “Ye tene ‘Eno nokangi.’ nimbu lipu mundumbo.” nimbe, nimbe panjerimu ye nomi Kirasimu, ye nomi Mesaya, na aku yemo orundu molio.” nirimu ungu mare inie yakondo 21:1-9, LLuku 22:66-71, Jono 18:33-38, 19:14,19-22, ‘Yesusi lomboropa ola molomba mele pilkulie yembomane ‘Yuni “Molio.” nirimu mele ‘Paa sike aku sipe molorumu molemo.’ ningu kamu-kumu tondolo munduku pilinge. Akumu paa kamu keri lemba.’ ningendo aku siku niringi lemo.