1 Doḵ/e a’di ṯelki mii ’pen mo mmoṯor uni gwo e shemen ma gap̱ mo. Dhala dhana waambuhany ’kwani caaca kagahara tulki isi a’di mo. Wakan a’di seki bwaa ḵur mo dhali c̱a’bi cine/ mo e bwaman ma al mo. Dhala dhana waambuhany ’kwani uni ’koni shemen ma gap̱ ma al mo eya ’cesh mo. 2 Dhali a’di ṯorki uni gwo ka ris mo ki gwom ’bi’th/e mo, dhali e gwom piti jin ṯora a’di uni mo tani a’di ki o uni gwo mo ki: 3 Ba ciḵi gwo mo ma. Amanyeḵa ḵa’bany a’di ya’d ka pije/ mo mmoyeḵ to mo. 4 Dhali ki a’di yeḵki to mo tani aḵa’banya tiya ṯa’kkin mo e bway tur jin iinu mo. Dhali ’dii p̱u’dkin mo dhali los uni mo be. 5 Dhali aḵa’banya tiya uni ṯa’kkin mo e mo wosh mo dhali uni daran ga ’cesh e embul mo. Dhali ki jahanne/ ki uni ’kana le/ mo haali/ uni dar ga ’cesh mo tani, 6 dhali ka tente/ sulki’d ka nyor piti jin ’batha’ba’th mo dhali mmodara uni ka birman mo tani uni la shi’bil mo be. 7 Dhali aḵa’banya tiya uni ṯa’kkin mo e bwam ma ’de/ mo dhali ka ’de/ can mo tani a’di c̱okoṯki uni mo dhali a’di moli maman dho’th mo be. 8 Dhali aḵa’banya tiya uni ṯa’kkin mo eya ’cesh jin ’bora’bor mo dhali uni ki ḵala dho’th kagahara mo mmocakina uni mo dhali mmomarkina uniya mar is mo, mmogwono’dkina uniya dho’th ki iss ’de/ i’ce’dka ’kume’d eya tora ’de/ mo dhali ki iss ’kwanimpa ikwara mo dhali ki iss ’kwanimpa imudhe’d mo be. 9 Dhali a’di ki o uni gwo mo ki: A’di jin ta’d gi gu’ban’ce mo mmociḵ gwo mo tani dhalki a’di ciḵ gwo mo ma.

10 Dhali ki a’di di’d a’di ’de/ mo tani dhali uni gwansan kun tulki isi a’di kun tana ’kume’d i’ce’dka su/ mo tani uni doṯki a’di gwo mo isi gom gwom ’bi’th/e yan mo. 11 Dhali a’di ki o uni gwo mo ki: Um c̱inu gwo jin c̱inu ki kup̱ mo gom Bampa/ ma Arumgimis mo, hili gom uni gwansan kun ’kona pije/ mo tani uni a’di iminu ṯorki gwo ki gwom ’bi’th/e mo be. 12 Wakan ki uni mini mii mish ka jiŋ gana/ dhali ’koki nyiṯẖ a’di mo, dhali uni ka jiŋ gana/ mini ciḵ a’di mo tani dhali ’koki mish a’di ’ban mo be. Hili isi ciki/ ki uni mini ’taki ṯu’k mo doḵ/e dhali uni minu ’taki gwamki miinthus buni mo be. 13 Dhali a’di ki o uni gwo mo ki: A/um si’da/ ’koki mish gwom ’bi’th/e yan ’ban mo? Um mini mish a’di ’ban kata aris gwom ’bi’th/e gwansan mo? 14 Amanyeḵa ḵa’bany to mo tani a’di yeḵki gwo mo be. 15 Dhali uni gwansan uni ita uni kun ṯa’kkin mo e bway tur mo e mo jin yeḵu gwo nycine/ mo. Dhali ki uni ciḵki gwo mo tani aSeṯaan ki jahanne/ p̱u’dki’d mo dhali ḵal gwo jin yeḵu e uni mo be. 16 Dhali uni gwansan si’da/ uni ita uni gun yeḵkunu mo e embula ’cesh wosh mo. Uni, ki uni ciḵki gwo mo tani uni la bu’th a’di ki jahanne/ ki bwaŋ ’kunyu’d mo be. 17 Dhali uni tan ga birman yisa e is buni mo, hili uni ’kon jasi ari’ceenne/ mo, dhali yan’ko’d ki monṯo’c bwa walla mo gi ’koshuwa ’kosh cuki mis mo gom gway yan mo tani ki jahanne/ uni ṯa’kkin mo be. 18 Dhali aḵa’banya tiya uni gun yeḵkunu mo e bwam ma ’de/ mo tani uni ita uni gwansan kun ciḵki gwo mo be. 19 Hili uni bala to ga ’cesh is mo dhali ’penkap̱an buni jin el uni e ki el mo dhali bwam buni gun ona uni gom ton tiya mo tani cic̱kina uni nycine/ mo dhali c̱okoṯ gwo mo dhali a’di inyo/i uni mo ki uni moli dho’th mo be. 20 Hili uni gwansan kun yeḵu mo eya ’cesha ’borga/ mo tani uni ita uni gun ciḵki gwo mo dhali bu’th a’di mo dhali dho’th maman mo, eya tora ’de/ mo tani a’di dhotho’d ki iss ’de/ i’ce’dka ’kume’d mo, dhali eya tora ’de/ mo tani a’di dhotho’d ki iss ’kwanimpa ikwara mo, dhali eya tora kamu/ mo tani a’di dhotho’d ki iss ’kwanimpa imudhe’d mo be.

21 Dhali a’di ki o uni gwo mo ki: Alamba/ ki a’di ḵalkunu bway gu’b mo tani a’di kumkunu ’kup̱ ki toŋ’kul bwa mo ’taa? walla karkunu mo e bwaŋ’kwariny ma aŋgar mowa? dhali a’di dinuki kara p̱o/ ṯirkina/ mo ’taa? 22 Haali/ toŋ kamu/ yisa di’da jin minu bag mo isi ciki/ a’di minu mish eya tente/ mo. Walla toŋ kamu/ yisa di’da jin minu mii ka ’di/ mo, hili isi ciki/ uni minu mish ki moŋkush mo be. 23 Waḵki/ wathin ’deŋ kamu/ ta’d gi gu’ban’ce mo tani dhalki a’di ciḵ gwo mo ma. 24 Dhali a’di ki o uni gwo mo ki: Hili ki ’bore/ a’di jin ciḵa um mo. A’di jin barkina um mo tani a’di minu barki um mo dhali to ki nyanye/ mo tani a’di minu c̱i ki um mo be. 25 Haali/ a’di jin ta’d gi to mo tani minu c̱iku/ ki nyanye/ mo. Dhali ’peni a’di jin dara’d mo tani, me’d jin tana a’di gi a’di mo tani a’di minu bu’th ’peni a’di mo be.

26 Dhali a’di ki o gwo mo ki: Bampa/ ma Arumgimis a’di wana e ki wathi/ jin midi ’taki pepera ḵa’bany bwa ap̱o/ mony’cesh mo 27 dhali ’taki ish e mo dhali cu mis mon’thiny mo dhali montee mo, dhali aḵa’bany midi ’taki ’ka ale/ mo dhali ca mo ki a’di molo’d mo be. 28 A’cesh a’di dho’thki to ki is piti mo, ale/ a’di i’ka’di ṯwa/a/ mo dhali yan’ko’d akulp̱e/ mo dhali yan’ko’d maman gana/ mo. 29 Hili ki maman iski’d mo tani a’di ki kar mo ma nyerṯẖa/ eya tente/ ki jahanne/ mo haali/ mo gi minu ’ciṯẖ to mo p̱u’dki’d mo be.

30 Dhali a’di ki o gwo mo ki: Mina ana kar Bampa/ ma Arumgimis ka p̱ar ’ban kata moye? walla gwom ’bi’th/e gi wakata imina ana i/o mo gom a’di mo? 31 A’di wana e ki emena ḵa’bany to jin miinuwa ’tash mo, a’di jin yeḵkunu ap̱owa ’cesh mo. A’di ta ara ḵa’bany to jin c̱a’ba e ki p̱iri’th p̱iri’th ap̱owa ’cesh mo. 32 Hili ki a’di yeḵkunu mo tani a’di caki’d mo dhali a’di warki’d ki dhan wurup̱ mo dhali a’di ki pepera adhana bi mo. Wakan ’dii kun p̱en e mis mo tani uni nyaŋki gu’b buni eya lam piti mo be.

33 Ka ris gwom ’bi’th/e gi wakan mo tani a’di ki ṯor uni gwo mo me’d jin mina uni ’taki mish a’di mo be. 34 A’di diki ṯor uni gwo ki dar gi gwom ’bi’th/e mo. Hili e imanciḵ gwom pitiŋ gana/ mo uni ’cena mo tani a’di ki be’d uni gwo ’baar mo be.

35 Ka tee c̱aan ki mo ta mom’pimpili/ mo tani a’di ki o uni gwo mo ki: Dhalki ana iina mo mmo’ciṯẖa/ gap̱ gi ’bana kamu/ mo. 36 Dhali mmodhalkina uni awaambuhany ’kwani ’pen mo tani uni suski a’di nyaḵki uni mo me’d jin c̱a’bkina a’di e bwam ma ḵur mo. Dhali aḵura tiya nyaḵki ’ko ki a’di mo be. 37 Dhali adhana p̱unthar ’tham poshki’d mo dhali yi’de/ birki bakal mo mmodora ḵur mo. Wakan aḵur a’di ’tu’dkina yi’de/ hila/ mo be. 38 Hili a’di diki’d mo e bum ’pen ma ḵur mo mmo/ish e ap̱o/ burrinye/ jin ishu ’ba/ mo. Dhali uni merki a’di e mo dhali o a’di gwo mo ki: Manṯor gwo, ki /e bunya/ dina is ki mer mo ki ana mina ’ce’d sho’k mo? 39 Dhali a’di ki mer e mo dhali ḵucur ’tham ki gwo mo dhali o yi’de/ gwo mo ki: Roci sho’k mo dhali doshi muŋgun mo. Dhali ’tham doshki’d mo dhali adhan mo dosh ki biyuu mo be. 40 Dhali a’di ki o uni gwo mo ki: Katinta ḵo/ka uma ḵo/ ise? Um dar gi moŋgam gwo is mo ’taa? 41 Dhali uni ’kokunu mo mmo’tu’d ki mondee is mo dhali o gwo ka rem ’kup̱ mo ki: Ki wathi/ jana a’dan sa/? ki ’tham dhali yi’de/ haki a’di gwo e mo?