Ⅰ Ke liti a, nsɛntsɛlɛni kpale adi nɛ́ nɛ odetɔ́ kamɛ. Otsole odi kɔa suwa esua akũ ndɛ atadiɛ aye. Odetɔ deĩ nɛ ye abɔa kayɔ, ade ɛtsa lɛgãbɔɛ kĩ bɛkɔa fusibii ewua-nviã bɛkɛna de nɛ ye lɔlɔ a. Ⅱ Ɛtsɛ̃mɔ kɔma. Ade kĩ sɛmɛ pi ye sũ a, ɛkatsimtsim akũ mɔ fɔwɔla kɔɔba nɛ foe kawo sũ. Ⅲ Nsɛntsɛlɛni bɛbã nɛ́ nɛ odetɔ́ kamɛ. Dã, fɔnyɛ kɔɛ kpale ngbã, kĩ kudeĩ fɔlɔ evũkɔnɔ, mɔ tɛlɛ ewua, ade kɔtsa fɔgãbɔɛ evũkɔnɔ nɛ fɔlɔ a akũ a. Ⅳ Kɔkɔa koe ɔkã kɔlɔ fusibii kasɛ̃ kamɛ katsu kalalɛde a kutomɛna odetɔ́ kamɛ kɔta kuwula nɛ tite akũ. Finyaa kɔɛ kpale a yidza kɔdza nɛ ɔmatsɔ̃ a kĩ sɛmɛ pi ye a anɛ kamɛ, kĩ ntɛ esila ɛma pɛ kɔ́abɔɛ obisɛ̃ a kɔmɛna. Ⅴ Otsole a má obinyole kĩ yaakɔa sɔbɔtsaɛ otse ɛnya fude fude bati flee akũ. Lɛmɛ bɛbɔɛ kabisɛ̃ɛ̃ a lɛtalɛta bɛnamɛna Baguma mɔ ye lɛgãkpo a sɛkɛ̃. Ⅵ Otsole a lo ɛnaa kɔsa kamɛ, awã kĩ Baguma manɛ eyi ɛkpa ye kĩ bɛdã ye akũ fuwi apim mɔa, ɔha nviã mɔ aduesia.

Ⅶ Ke liti a, kawũ nɛ́ nɛ ode. Mikael mɔ ye ode fɔtɔ banyanɛ nɔ kawũ mɔ kɔɛ kpale a, ade kɔɛ a mɔ koe fɔtɔ banyanɛ a nɔ bɛtsɛlamɔ be a. Ⅷ Lɛmɛ bɛnya kɔɛ kpale a akũ, ade bɛtákpa koe mɔ koe basumunɛ a osi kĩ bibuki bidzi nɛ ode a. Ⅸ Bɛta kɔɛ kpale a bimuni nɛ tite akũ. Ade koe nyɛ anɛ kɔkɔɛ kɔɛ a kĩ bavɛ kĩ Abonsam ĩye Satana, kĩ kɔkɛ katinya kamɛ bati flee a. Koe mɔ koe fɔtɔ banyanɛ a flee bɛta bimuni nɛ tite akũ.

Ⅹ Ke liti a, nnu odo kpaa odi nɛ ode ɛlɛ kĩ, “Finyaakɔ̃ Baguma oti katɛ ya! Baguma nyɛ ye kɔbɛ̃ ɛtsa ndɛ Lɛgã aye! Finyaa ye Kristo a nyɛ ye otumi kanya! Kitonɛkĩ ɛta oti a kĩ ɛdza nɛ Baguma anɛ ɛkatsua boe bawaɛ̃ onukpɛ̃ kakpa Baguma lɛnyɛ mɔ suwa a emuni. Ⅺ Ade be lɛtsã Kavelibi a babɔanɛ, mɔ ɔnɔkɔali fɔlɛtsa a kĩ bidi adansiɛ nɛ ye akũ a bɛnya ye akũ. Bɛwɛ kĩ bakɔa be nkpã bɛkpa faa ntɛ fɔ́anya wuda malo. Ⅻ Nɛ foesũ ni, kawɔlɛ kide mi ode, mɔ mi a kĩ mideĩ nɛ awã a flee! Lɛmɛ tite mɔ mpo, bɔbɔɛ makpa mi, kitonɛkĩ Abonsam duma ɛya nɛ mi kamɛ mɔ kalɔkpa, ade enyina kĩ fuwi sukuloo lite ye.”

ⅩⅢ Kĩ kɔɛ kpale a mɔ́ kĩ biɛta koe bimuni nɛ tite akũ a, kutomɔ otsole a kĩ ɛma obinyole a liti. ⅩⅣ Lɛmɛ bɛkpa otsole a ɔkɔliɛ kpale fupoki nviã a eyidza ɛnaa awã kĩ Baguma manɛ eyi ɛkpa ye nɛ kɔsa kamɛ a. Baadãmɛna ye akũ nɛ awã futeli ɛlalɛ mɔ sɛkɛ, lɔkɔa ɛwɛya nɛ kɔɛ kpale a awɛ kamɛ. ⅩⅤ Ade kɔɛ kpale a vũma mui kĩ bitini ndɛ ɔwɔ kutomɛna koe onukpɛ̃, bitomɔ otsole a kĩ bɛbɔɛ ye bɛnamɛna. ⅩⅥ Lɛmɛ tite bumɔ otsole a. Tite binya onukpɛ̃ tɛmɔa mui a kĩ kɔɛ kpale a vũma etomɛna otsole a flee. ⅩⅦ Kɔɛ kpale a na kalɔkpa mɔ ɔsĩ nɛ otsole a akũ, ade kɔdzakũ kĩ kɔnaanɔ kawũ mɔ ye babi mɔ bawa nkaɛ a. Ade be nyɛ bati a kĩ bakɛna nɛ Baguma mbla a akũ, kĩ bipini ɔnɔkɔali fɔlɛtsa a kĩ Yesu nyɛ ɛtsa lɛmɛ a. ⅩⅧ Ade kɔɛ kpale a nɛ́ kɔnadza nɛ mpo abuĩ a.