1 Kanan APU DIOS ke Moses di “Kalyom hanadah padin imbabalen Aaron hituwe: Adida nadaman maki-at di padi nah pangat hi naten iiba ta adida mibilang an adi malini. 2 Mu deket natey inana, amana, imbabalenan lalaki weno babai, tulang nan lalaki weno 3 hay ugge nalahin an tulang nan babain makiha-ad ke hiyah balena ya damanan maki-at nah pangat hi nate.* 21:3 Hanadah padi ya panioy manapah adol di nate weno humgop hi balena. 4 Mu adi maki-at hi pangat hi nate hin nakiapu nah nate te mibilang an adi malini.

5 Adinadaman mukmukan di padiy uluna weno ena puttutan di emeng na weno ena liputan di adol na. 6 Mahapul an makaphod di padi ta adina ibabain di ngadan APU DIOS te iappit nay maghob an makan ke hiya.

7 Ya adi mabalin an iinen di padiy babain mumpabayad hi adol nah linalaki weno babain inhuyop di lalaki weno nakibolhe. Man-uke ya mahapul an hanada ken padi ya makaphod da. 8 Mahapul an makaphod di pangibilang di tatagu nadah padi te hiyay mangiappit hi makan ke APU DIOS. Hi APU DIOS ya makaphod an abu, pumbalinonay tatagunan makaphod. 9 Deket pabayad nan babain imbabalen di padiy adol nah linalaki ya mahapul an gobhon dan matagu te ibabainah amana.

10 Hanan katagtag-ayan an padi ya naduyagan di ulunah lana handih numpadiyana ot miong-ong ke APU DIOS ot ibulwatinay bulwatin di padi. Hiya ya takon di u-umyungan ya hugudonay buuk na ya adina bik-iyon di bulwatina. 11-12 Hiya ya niong-ong ke APU DIOS, ta hidiye nan adi mabalin an taynana nan Tabernacle an kawad-ana ta umeh kad-an di naten tagu, takon hin kananat hi amana weno inana te gapun diye ya hibitona nan Tabernacle.

13 Mahapul nimpen hay iinen di padi ya nan babain maid di nangihuyop ke hiya 14 ya ohan puun di nahlagan da. Adi mabalin an iine nay nabalu, nibolhe, ya nan babain pabayad nay adol nah linalaki. 15 Man-uke ya mahapul an mibilang an maliniy iimbabalena. Kanan APU DIOS di ‘Ha-oy di AP-APU an namili ke hiyan miong-ong an makaphod.’ ”

16 Kanan bon APU DIOS ke Moses di 17 “Kalyom ke Aaron hituwe: Maid nadah imbabalem an waday dipekton di adol day ahi mumpadin mangiappit hi makan ke APU DIOS. Hituwen tugun ya mahapul an maunud ta nangamung. 18 Adi mabalin an mih-up ke APU DIOS nadan tatagun waday dipekton di adol da, umat hi nakulap, napilay, nadahuy, 19 naik-ik di taklena weno hukina, 20 nabakug, ittaittay di kataguna, waday dipekton di matana, waday nabablah adol na ya nadadag di batbatuna. 21 Maid nimpe nadah holag Aaron an waday dipektonay mun-appit ke APU DIOS hi makan. 22 Mu damanan kanona nadan makan an niappit ya nadan makan an mibilang an malini. 23 Muden adi mabalin an e mih-up nah nakurtinaan weno e mih-up nah altar te hibitona dadiyen ngunut, te kanan APU DIOS di ‘Ha-oy di nangiong-ong ke dadiye ot mumbalin dan makaphod.’ ”

24 Danaey kinalin Moses ke Aaron, nadan imbabalena ya am-in hanadah holag Israel.