1 “Da tuꞌad nidib antuꞌa, ka Winaꞌam me ku tuꞌa ya antuꞌaa. 2 Bozugo antuꞌa kan ka ya tuꞌas n tis nidib la, ala men ka Winaꞌam na tuꞌa ya antuꞌa. Ka ne makir kan ka ya mak n tis nidib la, ala men ka ya me na ti diꞌe.

3 “Bo ka fu nyet sauk n be fu baꞌabiig nifin, ka lee pu nyet datitaꞌar kane be fu meŋ nifine? 4 Fu na niŋ wala n yel fu baꞌabiig ye, o ke ka fu yiis sauk o nifin, ka daug be fun nifine? 5 Zam soba, deŋim yiis daug kane be fu meŋ nifin la yiiga, ka yuꞌun na tunꞌe nye nyain, ka yiis sauk kane be fu baꞌabiig nifin la.

6 “Mit ka fu zaŋ Winaꞌam bunsuma n tis baas, ka me da zaŋ kuga line venl ka ba buon ye peel la n lob kukurnam tuone. Ka ba na no ne noba, ka fendig n dol uf ye ba dum.

7 “Sosimi, ka ya na diꞌe. Iemi, ka ya na nye. Kabirimi, ka ba na siak ka yoꞌog n tisi ya. 8 Bozugo on mekama n sosid la na diꞌe. Ka on mekama ied la na nye. Ka one kabirid la, ba na yoꞌog n tis o.

9 “Anoꞌone be ya saꞌan, ka o biig na sos o maꞌasir, ka o tis o kugire? 10 Bee o yaꞌa sos ziŋ, ka o tis o waafo? 11 Ka yanam bane a tuumbeꞌed dim la, yaꞌa miꞌ ye ya tis ya biis bunsuma, ya Baꞌ one be arazana ni la ku tisi ya bunsuma gaad alaa?

12 “Dinzugo yanam n bood ye nidib niŋ siꞌem n tisi ya la, yanam me niŋimi ala n tisi ba. Bozugo nwa ane Winaꞌam wada ne o nodiꞌesidib da sob siꞌem la.

13 “Kpenꞌemi zaꞌanoor siank, bozugo zaꞌanoor yaliŋ ne sueyaliŋ la ken ne saꞌuŋ zinꞌigin. Ka nidib bedego dol n kpenꞌed anina. 14 Amaa zaꞌanoor siank la ne suebaanlig kenne nyovur zinꞌigin. Ka bane nyeti li la ane biꞌela nwa.

15 “Miti ziri nodiꞌesidib bane kene ya saꞌan na la. Ba sunya ni, ba ane ziri dim wuu kunduna naan lusi ba meŋ ne peꞌes gbana n kpenꞌ peꞌesin. 16 Ba wela ni ka ya na baŋi ba. Naꞌaziir ku tunꞌe wel doonde. Gunꞌa ku tunꞌe wel kekamaa. 17 Tisuŋ wusa welne welsuma. Ka tibeꞌed me welne welbeꞌednam. 18 Tisuŋ ku tunꞌe wel welbeꞌednama. Ka tibeꞌed me ku tunꞌe wel welsumaa. 19 Tikan wusa n pu wel welsumaa, ba na nwae n bas bugum poogin. 20 Dinzugo ba wela la ni ka ya na baŋi ba.

21 “Kaꞌa nidib wusa bane buol man ye, ‘M Zugsoba, m Zugsoba’ la na kpenꞌ arazana soꞌolim nii. Amaa li ane bane tum m Baꞌ one be arazana ni boodim la. 22 Ka daakan la nidib bedego na ti buꞌos man ye, ‘Zugsoba, Zugsoba, ti da pu zaŋ fu yuꞌur pianꞌa Winaꞌam pianꞌad n tis nidibaa? Ka zaŋ fu yuꞌur kad kikiris, ka tum tuumtitada ne fu yuꞌuree?’ 23 Ka man na peligim poog yeli ba ye, ‘M ziꞌ ya kpan kpane. Gaadimi ka ke m, yanam tuumbeꞌed dim nwa.’

24 “Ban wusa n wum m pianꞌad nwa, ka diꞌedi li, bane wenne yaꞌam sob kane mee o yir kugir zugin. 25 Ka saa ni. Ka kuꞌom zot. Ka pebisim daꞌae n nweꞌ yir la. Ka li pu luu, bozugo li eenbir bene kugir zugin. 26 Ka bane me wum m pianꞌad nwa, ka pu diꞌe lii, ba wenne dau kane kaꞌ yaꞌam, ka me o yir titanbiꞌisug zug. 27 Ka saa ni. Ka kuꞌom zot. Ka pebisim daꞌae n nweꞌ yir la. Ka li wusa lu saꞌam.”

28 Ka Yesu n pianꞌ pianꞌad nwa naae la, ka o paꞌalug la lidig nidib bedego, 29 bozugo o paꞌali ba ne wenne one mor paŋ, ka kaꞌa wuu gbauŋmiꞌidib la paꞌan siꞌem laa.