1 Dinzugo nidib bedego bane modig namisugin sadigim giligi ti la, keli ka ti me basi zetebisa ne tuumbeꞌed line gbanꞌe ti kiŋ kiŋ la, ka modigi zo zoos line be ti tuon la. 2 Ka gosid Yesu one a ti yiiga sob ti yadda niŋir yela ne one naadi li la. Sumalisim line digi gur o la zug ka o modig dapuudir la zug, ka pu zoo li nyane, ka yuꞌun zinꞌi Winaꞌam naꞌam gbauŋ datiuŋ.

3 Tenꞌesim o yela a siꞌem, tuumbeꞌed dim bedego daa kiꞌis o, ka on modigi n nyaŋ la, da geenn ka ya sunya buke. 4 Ya zabid tuumbeꞌed yela hale ka pu zot ne ban na kuu yaa. 5 Da tam saꞌalug line be Winaꞌam gbauŋin line kpemisidi ya wuu saamnami saꞌal ne ba biis siꞌem la ye,

7 Siakimi namisug wuu baꞌ mugusidi o biis siꞌem la, bozugo ya namisug la paꞌal ye Winaꞌam saꞌal ne ya wuu o biis ne. Biig be yaa ni, ka o saam pu saꞌan oo? 8 Ba yaꞌa basi ya ka pu saꞌani ya wuu ban saꞌan biis wusa siꞌem laa, ya kaꞌa o meŋ biise, ya ane tampiinb. 9 Ti ninsaalib baꞌanam saꞌali ti, ka ti tisi ba naꞌasi. Ka li nar ye ti siaki ti Baꞌ Winaꞌam noor hale bedego gaad ti baꞌanam noya la. Bee m maꞌanee? 10 Ba meŋ boodim ka ba saꞌali ti saŋa biꞌela. Amaa on saꞌani ti ne ti meŋ suŋid yela ye ti a popielim dim wuu on ne. 11 Ka saꞌalug saŋa la ka li zabidi ti ka pu malis tii. Li nyaꞌaŋ ka li nyood a sumalisim line yit popielim ni na n tisid bane ka o saꞌali ba la.

12 Dinzugo ugusimi ya nuꞌus bane a zela la, ka kpeꞌeŋi ya duma bane buk la, 13 ka maal popielim suere n dol, ka bane yadda niŋir pu zuꞌe la, ka nwaas wuu wabis la da ponꞌolim naae, ka lee nyene laafe. 14 Kpeꞌeŋimi ya meŋ n nye sumalisim ne nidib wusa, ne popielim. Ka popielim yaꞌa kaꞌasige, soꞌ ku nye Zugsob laa. 15 Baŋimi ka soꞌ da guꞌuŋ Winaꞌam popielim piini la diꞌere, ka soꞌ da mor putoog line daamid nidib bedego. 16 Ka soꞌ da tum dianꞌad tuuma bee pu dol Winaꞌam suere wuu Esau one da zaŋi o kpeenm faar n kuos diib yinni yela laa. 17 Ka ya baŋ ye lin nyaꞌaŋ ka o bood ye o diꞌe o kpeuŋ faar ka o saam zanꞌas o la, o pu nyaŋe tiak line ka o gbanꞌe laa, hale baa on zigi li ne nimmua la.

18 Ka ya pu kenne line ka ninsaal na tunꞌe siꞌis, wuu Israel dim da keŋ Sinai zuer baba la. Ba nye bugum titaꞌar ne lik ne zibisug ne sisiꞌem 19 ka wum naꞌatana vuud ne kukor kan ka nidibi wumi li ka belim ye li da lem pianꞌ labaar yaꞌasi n tisi baa. 20 Ka ba ku nyaŋe modig noyelug lin ka ba diꞌe laa ye, “Hale baa bunkonbug yaꞌa siꞌis zuer la, ban lom o ne kuga n ku o.” 21 Ban nye siꞌel la da toe hale, ka Moses yel ye, “M zot dabiem ka kirid.”

22 Amaa ya kenn Zion zuerin line a Winaꞌam one voe la teŋ, ka a Jerusalem ameŋa line be arazana ni na. Ka anina ka maleknam bane kaꞌ ben la, be, ka laꞌas n diꞌem diꞌema. 23 Ka bikpeenmnam bane mor kal arazana ni me laꞌased anina. Ka Winaꞌam one a siꞌel wusa sariakat ka soꞌe siꞌel mekama la, ne popielim dim siis bane ka ba maali ba suꞌum naae la me be anina. 24 Ka Yesu one a nonaar paal nuꞌunweꞌed la one ziim zuꞌas, ka li paꞌal line a suꞌum n gat Abel ziim a siꞌem la.

25 Baŋimi ka da zanꞌas one pianꞌad laa. Ka bane zanꞌas one saꞌali ba dunia ni la sadigim pu nyaŋe luak namisug la, ti na niŋ wala yuꞌun luak namisug ti yaꞌa zanꞌas one be arazana ni n saꞌani ti la? 26 O kukor la da ke ka teŋ miꞌim, ka nannanna o noziꞌel la kpelim be ye, “M na lem miꞌim dunia noor yinni yaꞌas, ka kaꞌane dunia maꞌanee, amaa laꞌam ne saazug.” 27 Pianꞌagiŋ kaŋa nwaa line ye, “Yinni yaꞌas la,” paꞌal ne ye line ka o maal la na naae. O yaꞌa miꞌim, ka line ku tunꞌe miꞌim la na kpelim.

28 Dinzugo keli ka ti sunya maꞌae ne o; ka tiname na diꞌe naꞌam soꞌolim line ku tunꞌe miꞌim la, keli ka ti puꞌus Winaꞌam bareka ne naꞌasi ne dabiem, 29 bozugo ti Winaꞌam ane bugum kane kanbid.