1 Nid wusa siakim nimbane soꞌe teŋ la noya. Bozugo soꞌ pu mor paŋa, asee li yi Winaꞌam saꞌan na. Li ane Winaꞌam ke ka nimbane soꞌe teŋ la mor paŋ. 2 Ka on mekama zanꞌas nimbane soꞌe teŋ la noor, o zanꞌasne line ka Winaꞌam ziꞌel la. Ka on mekama niŋid ala, ba na kad o saria beꞌed. 3 Nimbane tum beꞌed na zo paŋdim, ka kaꞌ nimbane tum suꞌum laa. Ya yaꞌa pu bood ye ya zo nimbane mor paŋ la, yanam tum line nar, ka o pianꞌa ya, 4 bozugo o ane Winaꞌam nidi ya suŋir zug. Ya yaꞌa tum beꞌed yanam zom o; ka o sid mor paŋ kan na tisi ya saansug. O ane Winaꞌam tumtum, ka diꞌed Winaꞌam supeen n saansid nimbane tum beꞌed la. 5 Ka linzugo li nar ye ya siak nimbane mor paŋ la noor, ka kaꞌane ye ya luak Winaꞌam supeen maꞌanee, ka me ane ye ya miꞌ ye lin a suꞌum.

6 Ka li me ane din zug ka ya yiti yood lampo. Nimbane tuuma a ye ba soꞌe nidib la tumme Winaꞌam tuuma. 7 Tisimi ba wusa line nar ye ba diꞌe. Li yaꞌa nar ye ba diꞌe lampo bee arazaꞌas lampo, yanam yoom tisi ba. Ka li yaꞌa nar ye ba diꞌe naꞌasi, yanam naꞌasimi ba.

8 Da more soꞌ samme. Yaname na mor sam siꞌa ane ye ya noŋ taaba. On mekama noŋ o tiraan, siak Winaꞌam wada la wusa. 9 Winaꞌam noyelug sieba be, ka ane ye, “Da saꞌam poꞌaba, da ku nidaa, da zuudaa, da more fufumee.” Ka bedego len be ka laꞌas ne bama a yinni, “Noŋimi fu tiraan wuu fun noŋi fu meŋ siꞌem la.” 10 One noŋ o tiraan ku tum o tiraan beꞌede. Dinzugo ya yaꞌa noŋ taaba, ya siak wada la wusa.

11 Niŋimi ala yaname miꞌ saŋa a siꞌem la zug. Saŋa paa na ye ya due gbeemin. Ti faangir saŋa yue, ka pu lal wuu tinam daa nam pinꞌili niŋ Yesu Kiristo yadda siꞌem laa. 12 Yuꞌuŋ bood gaadug, ka beog bood nier. Dinzugo ti basim lik tuuma line a beꞌed la, ka nok Winaꞌam zaba laꞌad line a tuumsuma. 13 Keli ka ti tuuma niŋir a suꞌum wuu nimbane be nintaŋin ka ti da nu daam kool bee saꞌam poꞌaba, bee zabid ne nidiba bee mor fufume. 14 Doli ti Zugsob Yesu Kiristo ka niŋidi wuu on niŋ siꞌem la, ka bas ka da len tenꞌes yanam na niŋi ya niŋgbiŋ boodim siꞌem la yaꞌasa.