1-2 Winaꞌam Siig Suŋ one tisidi ti vum, ka li yit Yesu Kiristo ni la na, soꞌe m, ka ke ka tuumbeꞌed ne kum pu len soꞌe ma. Dinzugo, nannanna nimbane a yinni ne Yesu Kiristo ku nye saria kadib beꞌede. 3 Winaꞌam tum o meŋ Biig, ka o lieb ninsaal, ka wenne ninsaalib bane a tuumbeꞌed dim, ka kpi ti tuumbeꞌed zug. Ka o kuꞌum poogin Winaꞌam kad tuumbeꞌed saria ka saꞌam li paŋ, line tum ti ninsaal boodim ni. Ti ninsaal boodim ket ka wada la kaꞌ paŋ la zug, wada la ku nyaŋe saꞌam tuumbeꞌed paŋa. 4 Winaꞌam niŋi li ye tinam bane belim dol Winaꞌam Siig Suŋ boodim la, ka li kaꞌ ti ninsaalib boodim la, na siaki niŋ wada la noyelug line a sida la suꞌuŋa.

5 Nimbane beilim doli ba ninsaalib boodim la, noki ba yaꞌam niŋ ninsaalib boodim ni. Ka nimbane beilim doli Winaꞌam Siig Suŋ boodim la, noki ba yaꞌam niŋ Siig Suŋ la boodim ni. 6 Fu yaꞌa noki fu yaꞌam niŋ ninsaalib boodim ni, li ane kuꞌum. Ka fu yaꞌa noki fu yaꞌam niŋ Siig Suŋ la boodim ni, li ane nyovur ne sumalisim. 7 Fu yaꞌa noki fu yaꞌam niŋ ninsaalib boodim ni, fu ane Winaꞌam dataa, ka pu siakid Winaꞌam wada laa, ka sid ku nyaŋe siaki lii. 8 Nimbane doli ba ninsaalib boodim la ku nyaŋe maꞌae Winaꞌam sunfo.

9 Winaꞌam Siig Suŋ sadigim bee ya saꞌan la, ya beilim pu doli ya ninsaalib boodim, ka lee doli Siig Suŋ la boodim. On mekama pu mor Kiristo Siig Suŋ la, kaꞌa Kiristo nida. 10 Ka Kiristo yaꞌa bee ya saꞌan, ya siis mor nyovur yaname lieb popielim dim Winaꞌam tuon la zug, hale ne ya niŋgbina na kpi tuumbeꞌed zug la. 11 Ka Winaꞌam one vuꞌug Yesu kumin la Siig Suŋ yaꞌa bee ya saꞌan, on one vuꞌug Yesu Kiristo kumin la, me na tisi ya ninsaalib niŋgbina nyovur paal, ka li yine o Siig Suŋ line bee ya saꞌan la.

12 Aa to, m baꞌabiise, ti di Winaꞌam sam, ka pu di ninsaalib boodim sam ye ti beilim doli lii. 13 Ya yaꞌa doli ninsaalib boodim ya na kpi. Ka ya yaꞌa kuu ya tuumbeꞌed tuuma ka basi li ne Siig Suŋ paŋ, ya na voe. 14 Nimbane dolisid Winaꞌam Siig Suŋ la ane Winaꞌam biis. 15 Siig Suŋ kane ka Winaꞌam tisi ya pu ke ka ya a yamis ka zot dabiem, ka lee ke ka ya a Winaꞌam biis ka buon Winaꞌam ye, “Ti Baꞌ.” 16 Winaꞌam Siig Suŋ meŋ ke ka ti meŋ siis miꞌ suꞌuŋa ye ti ane Winaꞌam biis. 17 Tiname sadigim aa o biis la, ti na diꞌe yelsum bane ka o digil ye o tis o nidib la, ka me na diꞌe li ne Kiristo. Tiname sadigim namis ne Kiristo la, ti me na diꞌe naꞌasi ne o arazana ni.

18 M tenꞌesid ye namisug line ka ti nyet nannanna la ane biꞌela, ka ti ku nyaŋe maki li ne naꞌasi line na ti nie ka ti nye laa. 19 Dunia bun wusa ka Winaꞌam maal la gur saŋkan ka Winaꞌam na ke ka o biis la nie na n boodi li bedego. 20 Winaꞌam da ke ka dunia ku nyaŋe niŋ lin ka o pun da maali li ye li niŋ laa, ka li kaꞌ dunia meŋ boodim ka lee ane Winaꞌam boodim ka li a ala. Hale ne ala, ka tiꞌir kaŋa da be, 21 ye, Winaꞌam na ke ka dunia meŋ soꞌe li meŋ li yaꞌa ti punꞌe. Winaꞌam biis na mor yolisim ne naꞌasi. Ka dunia me na diꞌe li ne ba.

22 Ti miꞌ ye saŋkan n ti paae zina, ka dunia wusa unsid ne toog wenne poꞌa yiti saꞌ bood duꞌab la. 23 Ka li kaꞌ dunia la maꞌanee, ka me ane tinam bane mor Winaꞌam Siig Suŋ line aa o piini yiiga la. Tinam me unsid ti sunya ni, n gur saŋkan ka Winaꞌam na nie paꞌal paalo ni ye ti aa o biis, ka ke ka ti niŋgbina nye yolisim li yaꞌa ti punꞌe. 24 Tiꞌir kaŋa ni ka ti nye faangir. Ka ti yaꞌa nye line ka ti mor li tiꞌir la, lin kaꞌa tiꞌire. Anoꞌon mor tiꞌir ne lin ka o pun nye? 25 Ka ti yaꞌa mor tiꞌir ne lin ka ti pu nyee, ti modigidne ka guri li.

26 Ala men, Winaꞌam Siig Suŋ la kena ye o suŋi ti, ti tadimis ni. Ti ziꞌ lin nar ye ti puꞌus Winaꞌam siꞌem. Winaꞌam Siig Suŋ meŋ sosid Winaꞌam tisidi ti ka ke ka ti unsid ka sosidi ti sunya ni ka ziꞌ tinam yet siꞌela. 27 Ka Winaꞌam one miꞌ ninsaalib sunya la, miꞌ Siig Suŋ la potenꞌer, on sosid Winaꞌam n tisid o nidib ka li doli Winaꞌam boodim la zug.

28 Ti miꞌ ye siꞌel mekama yaꞌa ti niŋ, Winaꞌam tumi li ni ka maan suꞌum n tit nimbane noŋ o ka o gaŋi ba ne o meŋ boodim la. 29 O da gaŋ nin sieba ka ba na aa o nidib, ka dunia nam pu maale ka o da gbanꞌe ye o na ke ka ba wenne o Biig, ye o Biig la na a kpeenm o pitib bedego saꞌan, 30 ka buol nimbane ka o da gbanꞌe ye o na ke ka ba wenne o Biig la o saꞌan, ka ke ka ba a popielim dim o tuon, ka me tisi ba naꞌasi.

31 Dinzugo, bo ka ti na yele? Winaꞌam yaꞌa be ne ti, anoꞌone na nyaŋe niŋe ti siꞌela? 32 Ka Winaꞌam yaꞌa pu ke ka o meŋ Biig la pons kuꞌum, ka zaŋ o Biig la ka o kpi ti wusa zugo, o me ku tisi ti siꞌel wusa zaalim bee? 33 Anoꞌon na nyaŋe pianꞌ nimbane ka Winaꞌam gaŋ la yela beꞌede? Li ane Winaꞌam meŋ n koos ye ba mor buod. 34 Anoꞌon na nyaŋe kadi ba saria ka koosi ba yela beꞌede? Li kaꞌa Yesu Kiristo one da kpi ka me vuꞌug kumin ka zinꞌi Winaꞌam datiuŋ, ka nweꞌed nuꞌug ti yela la, na koosi ti yela beꞌede. 35 Bo na nyaŋe baki ti Kiristo noŋilim ne? Daamug bee yelpakir bee namisug bee koꞌom bee noŋ bee yeltoog bee kuꞌum na nyaŋe baki ti bee? Ayei. 36 Li niŋne wuu lin da sob Winaꞌam gbauŋin siꞌem ye,