1 Ka Yesu leŋ kpenꞌ aaruŋin la ka loꞌoŋ beuŋ la n lebi o meŋ teŋin na. 2 Ka ba zaŋ dau ka o a ponꞌor na ka o dig o debirin. Ka Yesu n nye ka ba niŋ o yadda la, o yel ponꞌor la ye, “M dakoonree, kpeꞌeŋimi fu sunf, m yiisi fu tuumbeꞌed la bas.”

3 Ka gbauŋmiꞌidib tenꞌesidi ba sunya ni ye, “Dau kaŋa tuꞌudne Winaꞌam.”

4 Ka Yesu baŋ ban tenꞌesid siꞌem la, ka yel ye, “Bo ka ya tenꞌesid potenꞌebeꞌednam ya sunya ni? 5 Bo a naꞌana ne man naan yelin dau la ye, ‘M yiisi fu tuumbeꞌed la bas’ bee man naan yelin dau la ye ‘Duom keŋe’?” 6 Ka yel ye, “M na ke ka ya baŋ ye Ninsaal Biig mor paŋ dunia ni ye o na tunꞌe yiis tuumbeꞌed n bas.” Ka yuꞌun yel ponꞌor la ye, “Duom, zaŋimi fu debir n kul.” 7 Ka o due kul. 8 Ka nidib bedego la nye line naam la ka dabiem kpenꞌ ba. Ka ba zunꞌod Winaꞌam one tis paŋ kaŋa ninsaal la.

9 Ka Yesu yi zinꞌikan ka nye dau kan ka ba buon Mateo ka o zinꞌi lampo doogin diꞌesid lampo, ka o yel o ye, “Duom doli m.” Ka Mateo due dol o.

10 Ka Yesu n be yin n dit la, ka lampodiꞌesidib ne ‘tuumbeꞌed dim’ kena laꞌase dit ne on ne o nyaꞌandolib la. 11 Ka Farisee dim sieba nyee li la, ka buꞌos o nyaꞌandolib la ye, “Bo ka ya paꞌan la dit ne lampodiꞌesidib ne ‘tuumbeꞌed dima’?”

12 Ka Yesu wumi li ka yeli ba ye, “Bane mor laafe la pu bood duꞌata, asee bane benꞌed la na bood duꞌata. 13 Kem zamisi li gbin, lin da sob Winaꞌam gbauŋin siꞌem la ye, ‘M boodne nimbaanlzoor n gaad maan.’ ” Ka Yesu lem yel ye, “M pu kena ye m buol popielim dima, asee tuumbeꞌed dim la.”

14 Ka Joon one suud nidib kuꞌom la nyaꞌandolib kenn Yesu saꞌan na n buꞌos o ye, “Bo ka tinam ne Farisee dim lood noor saŋa mekama, ka fu nyaꞌandolib la pu looda?”

15 Ka Yesu buꞌosi ba ye, “Poꞌapaal zuanam na maal susaꞌaŋ poꞌadaan nan be ba saꞌan laa? Amaa dabisir na kena ka ba na yiis poꞌadaan la ba saꞌan. Saŋkan la ka ba yuꞌun na lo noor.

16 “Soꞌ kaeꞌ na zaŋ pien paal lig fukudugo. O yaꞌa niŋ ala pien paal la na ke ka fukudug la aans ka li na tuenn bedego.

17 Soꞌ men pu lied danpaal waa kudug nii. O yaꞌa niŋ ala danpaal la na ke ka waa la tans ka daam la ne waa la wusa saꞌam. Asee ba zaŋ dapaaligi n kpaꞌae su waa paalisin, ka li wusa na kpelim a suꞌuŋa.”

18 Ka Yesu n da pianꞌadi ba la, ka kpeenm yinni keenn o saꞌan na igin o tuon ka yel ye, “M poꞌayuꞌa kpi ka m bood ye fu kena zaŋi fu nuꞌugo siꞌis o, ka o tilig.” 19 Ka Yesu ne o nyaꞌandolib due dol o.

20 Ka poꞌa soꞌ daa be anina n benꞌed ka ziim yuod o yuma piinayiŋa. Ka o kaae Yesu nyaꞌaŋ na n siꞌis o fuug noor, 21 ka tenꞌesid ye, “M yaꞌa kulum siꞌis o fuug, m na nye laafe.”

22 Ka Yesu fendigi gilig n nye o, ka yel o ye, “M poꞌayua, kpeꞌeŋimi fu suunr.” Fu yadda niŋir ke ka fu nye laafe. Ka toꞌoto yim ka o nye laafe.

23 Ka Yesu n keŋ kpenꞌ kpeenm la yin, ka nye googinam ne nidib la wusa ka ba maan tukpeedug. 24 Ka o yel ye, “Ya wusa yiimi. Bipuŋ la pu kpii, o gbisidne.” Ka ba wusa laꞌad o. 25 Ka on ke ka nidib la yi la, o kpenꞌ bipuŋ la doogin n gbanꞌ o nuꞌug, ka o due. 26 Ka labakaŋa nwa yadig teŋgbauŋ la wusa ni.

27 Ka Yesu yi zinꞌig kan la n ken, ka zunzoos ayi n dol o n tansid ye, “David yaaŋa, zomi ti nimbaanlig.”

28 Ka o kpenꞌ yin, ka zunzoos la keenn o saꞌan na, ka o buꞌosi ba ye, “Ya siak ye m na nyaŋe tum neꞌe?”

Ka ba lebis ye, “Eenn, Zugsoba.”

29 Ka o siꞌisi ba nini ka yel ye, “Kel ka li niŋ wuu ya yadda a siꞌem la.” 30 Ka ba nini la lak ka ba nyet. Ka o saꞌali ba ye, “Da yel soꞌ neꞌeŋaa.” 31 Amaa ba mool o labaar la teŋ kan wusa.

32 Ka ban da yit la, ninsieba da mor dau kan ka kikirig dol o ka o a gik ka o kenn Yesu saꞌan na. 33 Ka Yesu kad kikirig la yiis, ka dau gik la pinꞌil pianꞌad. Ka li lidig soꞌ kam zanꞌa, ka ba yel ye, “Ti nam pu nye neꞌeŋa nwa buudi Israel teŋinee.”

34 Amaa Farisee dim la yel ye, “Li ane kikiris kpeenm la tis o paŋ ka o kati ba yiisid.”

35 Ka o keŋ teŋpoodin ne teŋkpemisin wusa, ka paꞌan laꞌasug doodin ka moon Winaꞌam soꞌolim labasuŋ la, ka tiꞌebid nidib ba wiim buudi buudi wusa. 36 Ka o nye nidib bedego, ka zo ba nimbaanlig. Ka ba wenne peꞌes bane kaꞌ konbkemma, ka ba namisid hale ka kaꞌ soꞌ ka o na suŋi baa. 37 Ka o yel o nyaꞌandolib la ye, “Poog la zood zuꞌeya, amaa tumtumnib la pood. 38 Dinzugo sosim poog la sob ka o tum tumtumnib poogin la.”