4
1 Nyini ti, am ma ya si ya ŋu sa, na má be fun nyini ŋumiyi n bo Nyɛmɛ ase ka i fá ma ya na atin toko wo bɛrɛ ka ya nya i ni. 2 Dama yɛrɛ mmɔɔ ati labari kpa n kabo bɛrɛ mmɔɔ yo tiiri i ni, ama, bɛrɛ ayo má i yarada, nyini dɛɛ ti, ye wɔ kun má kpɛrɛ ama má bu n a.
3 Ama, yɛrɛ bo ya yo Yesu yarada ni, ya nya nyini ŋumiyi n bo Nyɛmɛ seeri ka i fá ma i minɛm ni. I ti kabo Nyɛmɛ seeri n wɔ, i ŋa,
“Na yaa ati m, na ma tan ndiɛ ka,
bu nyá má atin wura má asiɛn n bo má m ma bu nya ŋumiyi n nu ni.”
Fite saŋga bo Nyɛmɛ yiiri durunya n kɛrɛ wieeri ni, i juma awieeri lɛɛ. 4 Dama ba kɛrɛ leso cɛɛn n jɔrɛ, Nyɛmɛ Jɔrɛ Kadasi n awɔrɛ be nu, ka, “Nyɛmɛ yo yiiri i ŋumi, i jumayoowa kɛrɛ nu wɔ leso cɛɛn ni.” 5 Ya kaaki aŋu ka wɔ jɔjɔ nyini jɔrɛ n sɔ ka, bu nya má atin wura má asiɛn n bo m ma bu nya ŋumiyi n nu. 6 Bo bu du mɔ tiiri labari kpa n ni, ba wura má nyini ŋumiyi n nu, dama ba yo má Nyɛmɛ yarada. Ama, atin toko wo bɛrɛ bo nbem nya nyini ŋumiyi ni. 7 Nyini dɛɛ ti, na Nyɛmɛ ma wɔ cɛ ka, na wɔ kpama cɛɛn fɔfɔrɛ be, na wɔ fere i ka nyuma, na wɔ ma Fɛmɛ Davidi ajɔjɔ nyini cɛɛn n jɔrɛ, kabo ba kɛrɛ i Nyɛmɛ Jɔrɛ Kadasi n nu ka,
“Nyuma, nzɛn am tiiri kabo Nyɛmɛ suse,
má am ma am sui yo tantanantan.”
8 Nzɛn má Yosuwa koro maari Yisarelifɔm nyaari atin wuraari asiɛn n bo Nyɛmɛ ma bu nya ŋumiyi n nu, má Nyɛmɛ ayo akaaki ase má ka cɛɛn n be wo bɛrɛ bo i ma i minɛm nya ŋumiyi kun. 9 Ama, kabo i ti ni, ŋumiyi cɛɛn wo bɛrɛ bo Nyɛmɛ bá fa ma i minɛm. 10 Dama sɔnɔ kɛrɛ bo i nya ŋumiyi Nyɛmɛ dɔ, i mi yi i ŋumi fa kɔ i juma su, kabo Nyɛmɛ yo yoori i juma wieeri na i yiiri i ŋumi n wɔ. 11 Nyini dɛɛ ti, am ma ya boro ya nyi, na ya nya ŋumiyi n bo Nyɛmɛ bá fa ma ya ni. Ama, má am ma ya be kete Nyɛmɛ nɔaniɛ ni, adena má ya fun ŋumiyi ni, kabo Yisarelifɔm nbem yo keteeri na bu fuunri i ni.
12 Nyɛmɛ nɔaniɛ n la ŋgɔɔ na i la faŋga. I kaaki wo na tara takobe, i kpiɛ wura sɔnɔ ahorembaa su wɔ, ni i ŋumi, ni i awiɛwiɛ nu, na i kpiɛ kpaaki buwe sasuubiri, na i kɔ kpura bɔrɔkɔ nu, na i fiiti sɔnɔ sunsunni nu, na i si deke bo i ahorembaa koro, deke bo i ti kpa, ni bo i ti má kpa. 13 Deke be wo má bɛrɛ bo i koro fiɛ Nyɛmɛ, dama deke be wo má bɛrɛ bo Nyɛmɛ ayi i na i nyumbaa ŋu má i. Yiri ye ya kɛrɛ bá kan ya sayoowa kere i a.
Yesu ti Nyɛmɛ sayoowa dɔŋguyofɔm kɛrɛ kpiɛn n a
14 Kisa, na ya la Nyɛmɛ sayoowa dɔŋguyofɔ kpiɛn bo i la má aŋusu, na wɔ kɔ aŋgoro, na wɔ wura Nyɛmɛ dika n nu ni, yiri la Nyɛmɛ Wa Yesu, nyini dɛɛ ti, ye am ma ya bita i dɛɛ atin n bo ya ŋa ya yo i yarada n kenken. 15 Ya dɛɛ Nyɛmɛ sayoowa dɔŋguyofɔ kpiɛn n ti má be bo i koro si má ya aŋunfɔ ɔ. I koro si ya aŋunfɔ fa kɔ saŋga bo ya faŋga akpiɛ su, ni i dɛɛ atin su, dama ŋgɛɛ barasu barasu kɛrɛ bo bu fa sɔ ya ni, bu yo fa sɔɔri yiri mmɔɔ sɔ ɔ, ama, haari ni nyini n kɛrɛ ni, wɔ yo má satiɛ be. 16 Nyini dɛɛ ti, am ma ya fa ahoresi, na ya cin dodo Nyɛmɛ fɛmɛya tanaabiri ni, yiri ti ahɔrɔmafɔ a, adena i si ya aŋunfɔ, na saŋga kɛrɛ bo ya ba koro buka, na i buka ya.