32
Ngaithoumnae hoi konawmnae
Kathutkung: Devit
1 Kâtapoenae ngaithoum lah kaawm e hoi
a yonnae ramuk pouh lah kaawm e teh a yawkahawi e doeh.
2 BAWIPA ni yonnae ka tawn hoeh e lah a pouk e hoi,
a muitha dawk dumyennae kaawm hoeh e teh,
tami a yawkahawi e doeh.
3 Yon pâpho laipalah ka o teh, kanîruirui ka cingou navah,
ka hrunaw teh koung a hmawn toe.
4 Bangkongtetpawiteh, kanîruirui nange kut ni ka van vah a ri teh,
ka thaonae teh kawmpoi kâan e patetlah rem a phui.
5 Ka yonnae hah nang koe ka pâpho.
Ka payonnae hai ka ramuk hoeh.
BAWIPA koe ka yonnae ka pâpho han ka ti.
Hahoi, nang ni, ka yonnae hah na ngaithoum.
6 Bangkongtetpawiteh, hmu thai lah na o navah,
Cathutlae tami pueng ni, nang koe ratoum naseh.
Tûili ka tho nakunghai, ahnimouh teh phat mahoeh.
7 Nang teh kai hanlah, kâhronae hmuen doeh.
Runae thung hoi na hlout sak han.
Hloutnae la hoi na kalup han. Selah.
8 Na cei nahane lamthung na patue han.
Na cangkhai vaiteh, ka mit hoi khet laihoi na hrawi han.
9 Thaipanueknae ka tawn hoeh e marang hoi la patetlah awm hanh.
Hotnaw teh nang koe a hnai awh hoeh dawkvah,
pahnimoum hoi sawn lah ao han.
10 Tamikathoutnaw teh lungreknae moi a khang awh.
Hatei, BAWIPA kâuep e naw teh a pahrennae ni a kalup han.
11 Tami kalannaw, BAWIPA dawk lunghawi awh nateh,
lannae dawk konawm awh.
Lungthin kalan e tami pueng,
lunghawi awh nateh hram awh haw.