1 Nankabha mbu̱gha mi̱bu̱ghe ya bantu kandi ya baamalai̱ka, bhaatu ntali na kukunda, ndi nga kida kedha ntogholo ebikutoka kwonkaha. 2 Nankabha mba na kisembo kya bulangi̱, kandi nimanya nsi̱ta syona, kandi mba na magheji ghoona, kandi mba na ku̱hi̱ki̱li̱ja okukugubha kudhuula myena, bhaatu ntali na kukunda, tandi na mughaso. 3 Nankabha mpayo byona ebi ndi nabiyo, kandi neehayo ku̱njoki̱ya mu mulilo,* 13:3 Bihandiiko bya hambele bi̱ghi̱li̱ye biti niikuwo neepanke. bhaatu ntali na kukunda, takikungasila kantu.

4 Kukunda ku̱ku̱gu̱mi̱si̱li̱jagha kandi kuba na kisa. Kukunda takukubaagha na etima kedha myepanko, takuli na kwebhi̱mba-bhi̱mbi̱ya, 5 kedha kusaakala. Takukwebbalilagha ebyakuwo, takukwefuwaaghʼo kwonkaha kedha kusaaliluwa bwangu. 6 Takukudheedheluwagha ebitahi̱ki̱ye, bhaatu kukudheedheluwagha byamajima. 7 Kukunda kukugumilagha byona, ku̱ku̱hi̱ki̱li̱jagha byona, kukunihilagha byona, ku̱ku̱gu̱mi̱si̱li̱jagha byona.

8 Kukunda takukuhuwaaghʼo. Bulangi̱, buwo bulihuwʼo, na ku̱bu̱gha mu mi̱bu̱ghe enji, kulihuwʼo, kandi na kumanya, kulihuwʼo. Bhaatu kukunda takulihuwʼo. 9 Endindi tumani̱ye bikee, kandi tukulangagha bikee. 10 Bi̱hi̱ki̱ye obu biliisa, bitahi̱ki̱ye bilihuwʼo. 11 Obu naanabaagha mwana, naabu̱ghagha nga mwana, nteekeleja nga mwana, kandi ntu̱wamu nga mwana. Bhaatu obu naaku̱li̱ye, naaleka kwetwalikani̱ya nga mwana. 12 Endindi tuli nga bantu beeloleeye mu ndebelwamu tutaboone kulungi, ku̱hi̱ki̱ya mu bwile obuliisa obu tulibona bbeni̱-bbeni̱. Endindi nimani̱ye bikee; bwile obu ndimanya byona ngoku Luhanga aamaniiye kimui.

13 Nahabweki haliyo endindi bintu bisatu: ku̱hi̱ki̱li̱ja, kunihila, kandi kukunda. Bhaatu ekisaai̱ye byona ni kukunda.