1 Endindi bahi̱ki̱li̱ja baanakyanje, haa bikwetʼo bisembo ebi Mwoyo Ahi̱ki̱li̱i̱ye akuhaagha, tambbali̱ye muukale mutabimani̱ye. 2 Mumani̱ye ngu obu mwanabaagha mutakabaaye bahi̱ki̱li̱ja, mwatwali̱li̱ji̱bu̱wagha kandi muhabi̱i̱si̱bu̱wa kulami̱ya bisasani̱ bya milingo yoona ebitali na bwomi̱i̱li̱. 3 Nahabweki nkubaghambila nti taaliyo muntu nʼomui oghu ali na Mwoyo wa Luhanga oghu akugubha ku̱bu̱ghʼo Yesu bintu bi̱bhi̱i̱hi̱ye, kandi taaliyo muntu nʼomui oghu akugubha kughila ati, “Yesu ni Mukama,” atali na Mwoyo Ahi̱ki̱li̱i̱ye.

4 Haliyo bisembo byambaghani̱ja, bhaatu Mwoyo Ahi̱ki̱li̱i̱ye omui enkaha niiye akubihaagha byona. 5 Haliyo milingo yambaghani̱ja eghi bantu bakugubha ku̱heeleli̱yamu, bhaatu baku̱heeleli̱yagha Mukama omui enkaha Yesu Ki̱li̱si̱to. 6 Haliyo milingo yambaghani̱ja ya bu̱heeleli̱ya, bhaatu Luhanga niiye akuhaagha bu̱li̱ muntu maani̱ haa bu̱heeleli̱ya buwe.

7 Luhanga akuhaagha bu̱li̱ mu̱hi̱ki̱li̱ja kuboneka ngoku ali na Mwoyo Ahi̱ki̱li̱i̱ye ku̱mu̱koleesi̱ya kukoonela bahi̱ki̱li̱ja baanakiye. 8 Bantu banji Mwoyo Ahi̱ki̱li̱i̱ye akubahaagha kisembo kya kughambila bantu ebilimu magheji, banji abaha kya kughambila bantu ebikuleka mbeetegheeleli̱ya. 9 Banji abaha kisembo kya ku̱hi̱ki̱li̱ja, na banji abaha kya ku̱ki̱li̱ya. 10 Banji abaha kya kukola byakuswekani̱ya, banji kya kulangilila butumuwa bwa Luhanga, banji kyakumanya bisembo bya Mwoyo Ahi̱ki̱li̱i̱ye nʼebitali bya Mwoyo Ahi̱ki̱li̱i̱ye, banji ku̱bu̱gha mu mi̱bu̱ghe eghi batamani̱ye, banji kyakuhindula mi̱bu̱ghe eghi. 11 Ebi byona ni bisembo ebi Mwoyo Ahi̱ki̱li̱i̱ye akuhaagha, kandi akubihaagha ngoku abbali̱ye eenini.

12 Ngoku mubili ghuli na bi̱twi̱ke bikani̱ye, byona bilungaane hamui, kandi ni mubili ghumui. Niikuwo naatu abahi̱ki̱li̱i̱je Ki̱li̱si̱to tuli na kulungana tutiyo. 13 Etu̱we boona Bayu̱daaya kedha batali Bayu̱daaya, basyana kedha abatali basyana, obu twabati̱i̱ji̱bu̱u̱we, Mwoyo Ahi̱ki̱li̱i̱ye akaasa kuukala mu bwomi̱i̱li̱ bwatu, kutufoola mubili ghumui.

14 Mubili taghuli na ki̱twi̱ke kimui kyonkaha bbaa, ghuli na bi̱twi̱ke bikani̱ye. 15 Kighanja nkyanaghi̱li̱ye kiti, “Nanga si̱ye tandi mukono, tandi ki̱twi̱ke kya mubili,” eki takikuleka kileke kuba ki̱twi̱ke kya mubili bbaa. 16 Kandi kaakuba kutui kughila kuti, “Nanga si̱ye tandi li̱i̱so, tandi ki̱twi̱ke kya mubili,” eki takikuleka kileke kuba ki̱twi̱ke kya mubili. 17 Nguli mubili ghwona lyabaaye li̱i̱so bantu bangu̱u̱ghwi̱lagha haa? Nguli mubili ghwona kwabaaye kutui, bantu bangu̱koleesi̱yagha ki ku̱nu̱nka haa kintu? 18 Bhaatu majima Luhanga akateekani̱ya bi̱twi̱ke bya mubili, aabiteekani̱ya bu̱li̱ kimui ngoku abbali̱ye ati bibe. 19 Buuye nguli byona byabaaye ki̱twi̱ke kimui, ghwangubaaye ghu̱ti̱ya mubili?

20 Majima ghali ngu haliyo bi̱twi̱ke bikani̱ye, bhaatu ghuli mubili ghumui. 21 Li̱i̱so talikugubha kughila mukono liti, “Tooli nʼeki okungasila!” Kandi mutuwe taghukubha kughila kighanja ghuti, “Tooli nʼeki okungasila!” 22 Mu ki̱i̱kalo kyʼeki bi̱twi̱ke bya mubili ebili nga biceke niibiyo bikwetaghisibuwa kwonini. 23 Ti̱ bi̱twi̱ke ebi tutaaku̱hu̱ti̱yagha bhyani, niibiyo tukuloleelelagha kwonini. Kandi na bi̱twi̱ke ebi tutaakubbalagha bantu babone, niibiyo tu̱ku̱lu̱wi̱kagha kwonini. 24 Bi̱twi̱ke bya mubili ebi bantu bakubonagha tatukwetaaghisibuwa kubiloleelela mu mulingo ghwa mbaghani̱ja bbaa. Bhaatu Luhanga akalungani̱ya hamui bi̱twi̱ke bya mubili, kandi aahu̱ti̱ya kwonini ebyali bitabhonganuuwe ku̱hu̱ti̱ya. 25 Akakola eki niikuwo bi̱twi̱ke ebi bitaba na kwebaghani̱jamu, bhaatu niikuwo bu̱li̱ ki̱twi̱ke kiloleelele kinakyakiyo mu bwengani̱ja. 26 Ki̱twi̱ke kimui kikaakulwalagha, na bi̱li̱ byona bikubaagha bilwaye, bhaatu kimui nkyaloleeleuwe bhyani, bi̱twi̱ke byona bikuukalagha byeghonji̱ye.

27 Endindi enu̱we boona bahi̱ki̱li̱ja ni̱i̱nu̱we mubili ghwa Ki̱li̱si̱to, kandi bu̱li̱ omui mu enu̱we ni ki̱twi̱ke kya mubili oghu. 28 Ti̱ mu bi̱bbu̱la bya bahi̱ki̱li̱ja Luhanga akukomaghamu kyoku̱du̱bha bakwenda, kyakabili balangi̱, kyakasatu beegheesi̱ya, ongelʼo abakukola byakuswekani̱ya. Atʼo abali na bisembo bya ku̱ki̱li̱ya, kukoonela, kuba bahi̱ki̱li̱, na banji ku̱bu̱gha mi̱bu̱ghe ya bateeghi̱ye. 29 Buuye bahi̱ki̱li̱ja boona bakubaagha bakwenda? Kandi boona baba balangi̱? Boona bakubaagha beegheesi̱ya? Ti̱ boona bakukolagha byakuswekani̱ya? 30 Boona bakubaagha na bisembo bya ku̱ki̱li̱ya baanakyabo? Boona bakubaagha na bisembo bya ku̱bu̱gha mi̱bu̱ghe eghi batamani̱ye? Boona bakuhindulagha? 31 Bhaatu mwekumbulile kimui kuba na bisembo ebili na mughaso byonini.

Ti̱i̱ni̱ ekisaai̱ye byona niikiyo nkubbala kubaghambilʼo endindi.