1 Na, duwán kalimudan ka mga Judio, asta igsadun si Jesus tun ta Jerusalem. 2 Na, tun ta Jerusalem duwán ranó madani tun ta sállat ka mallayat koral na áglibut katô lunsud na ágngadanan Sállat ka Mga Karnero. Tô ranó ágngadanan Bitsata katô mga manubù na ágkagi ka Hebreo, asta duwán lima gállunganan tun ta ligad. 3 Marapung tô ibógókan mga manubù na ágdággà tun ta lima gállunganan, asta gangat dan ka kólian. Duwán mga bólóg, mga kapig, asta mga manubù na dì ágriyu é lawa. [Inalayun dan gangat ka makálláng tô wayig, 4 su duwán timpo na duwán panaligan katô Áglangngagán na ágsunnad tun ta ranó, asta áglénggó sikandin katô wayig. Atin ka makóna tô manubù suminugbu tun ta wayig, kólian sikandin.] 5 Duwán sábbad manubù na ibógókan dalám dán ka tállu pulù walu (38) ámmé. 6 Igkita si Jesus kandin na igdággà, asta isóddóran din na idugé dán ibógókan. Purisu iginsà si Jesus, na mà din, “Duwán kakalyag nu na kólian ka?”

7 Igtaba tô manubù, na mà din, “Sir, atin ka ágkalénggó tô wayig, ándà manubù na ágpasinugbu kanak tun ta wayig. Róggun ágsadunna, pakóna dán tô duma mga manubù tun ta wayig.”

8 Igkagi si Jesus, na mà din, “Tindág ka. Pid nu yan ágdággaan nu, asta ulì kad.”

9 Tigkô dád inólian sikandin. Igpid din tô igdággaan din, asta igulì sikandin.

Inému ni dalám ka álló ka kapaginawa. 10 Purisu tô mga pangulu ka Judio igkagi katô manubù na inólian, na mà dan, “Ni gó tô álló ka kapaginawa. Ikalapas ka katô sugù su igpid nu tô ágdággaan nu.”

11 Asal igtaba sikandin, na mà din, “Tô manubù na ikólì kanak, tô gó tô igsugù kanak na piddán ku ni ágdággaan ku, asta mulì ad.”

12 Iginsà sikandan, na mà dan, “Sadan manubui tô igsugù áknikó na piddán nu tô ágdággaan nu asta mulì kad?”

13 Asal ándà ikasóddór tô manubù na inólian ka sadan tô ikólì kandin, su igpanó dán si Jesus, asta marapung tô mga manubù na ilimud.

14 Ándà kadugé, igkita si Jesus kandin tun ta plasa ka templo. Igkagi si Jesus, na mà din, “Na, inólian kad! Yaka gabé áglumu ka salà ébô dì ka dungguan katô tuu pa madat.”

15 Na, igpanó tô manubù na inólian, asta igulit sikandin katô mga pangulu ka Judio na si Jesus tô ikólì kandin. 16 Purisu igirrayatan dan si Jesus, su ikólì sikandin katô manubù dalám ka álló ka kapaginawa. 17 Asal igkagi si Jesus kandan, na mà din, “Inalayun áglumu tô Ámmà ku agad ni álló ni. Purisu áglumuwa pagsik.”

18 Purisu igrayan dan igplano na matayan dan si Jesus, su agad dì sikandin ágbánnal katô ágkémun dan tingód katô álló ka kapaginawa, asal igkagi pagsik sikandin na Manama tô Ámmà din. Purisu magunawa sikandin asta tô Manama.

19 Na, igkagi si Jesus katô mga pangulu ka Judio, na mà din, “Paminág yu ni kagin ku ákniyu. Sakán na Batà ka Manama, ándà palang áglumun ku na tikud tun ta kanak kakalyag, asal áglumun ku dád tô igkita ku na áglumun katô Ámmà ku. Tô áglumun katô Ámmà ku, tô gó pagsik tô áglumun ku, 20 su ágginawaanna katô Ámmà ku, asta ágpakitanán din kanak tô langun ka áglumun din. Duwán pa lumun din na pakitanán din ukit kanak na tuu pa matulus ka tandingán katô iglumu ku kani manubù ni ébô kasalábbuan kó. 21 Gantén katô Ámmà ku tô mga inaté, asta ágbággayan din sikandan ka kantayan. Magunawa tô áglumun ku, su ágbággéya pagsik ka kantayan tun ta mga salinán ku. 22 Ánnà tô Ámmà ku tô rumuud ka mga manubù, asal igbággé din kanak tô karuud, 23 su kakalyag din na durungánna katô langun manubù na magunawa katô pagdurung dan kandin. Tô manubù na dì ágdurung kanak, dì sikandin ágdurung katô Ámmà ku na igpapid kanak.

24 “Paminág yu ni kagin ku ákniyu. Tô manubù na ágpaminág ka kagi ku, asta ágbánnal katô Ámmà ku na igpapid kanak, duwán kantayan din na ándà ágtamanán. Dì sikandin ágkaruudan su ikaluwà dán sikandin tikud tun ta kamatayan, asta duwán dán kantayan din na ándà ágtamanán. 25 Paminág yu ni kagin ku ákniyu. Duwán álló na dumunggù, agad igdunggù dán yan, na tô mga manubù na ándà kantayan makadinág ka kagi ku na Batà ka Manama, asta tô maminág bággayan ka kantayan. 26 Su tô Ámmà ku na Manama tô ágtikudan katô kantayan, igimuwa pagsik ikandin na ágtikudan ka kantayan. 27 Igbággé din kanak tô karuud ka mga manubù, su sakán tô Igpamanubù. 28 Yakó ágkasalábbuan kani kagi ku, su duwán álló na dumunggù na tô langun manubù na inaté maminág katô pagtawar ku kandan, 29 asta manté dan puman tun ta tapuri álló. Tô manubù na iglumu ka madigár, tô gó tô antén puman ébô dì dán maté. Asal tô manubù na iglumu ka madat, tô gó tô antén puman ébô ruudan.”

30 “Ánnà tikud dini kanak tô áglumun ku. Tô karuud ku igtinurù katô Ámmà ku kanak. Purisu nángngà tô karuud ku, su ánnà kanak kakalyag tô ágtumanán ku, asal ágtumanán ku tô kakalyag katô Ámmà ku na igpapid kanak.

31 “Atin ka sábbad ku dád tô mulit-ulit ákniyu tingód kanak, dì kó mánnal ka kagi ku. 32 Asal duwán duma na makólit tingód kanak, asta isóddóran ku na ágkasarigan tô gulitán din. 33 Duwán mga manubù na igpapid yu ébô minsà ki Juan na Tarabunyag tingód kanak, asta igulit si Juan ka kabánnalan tingód kanak. 34 Ándà kailangan na duwán manubù na mulit ka kabánnalan tingód kanak. Asal igkagiyan ku sikiyu tingód katô igkagi i Juan na Tarabunyag ébô matábbus kó. 35 Si Juan na Tarabunyag iring na sulù na inalayun giló, asta idayawan kó tingód katô igtinurù din ákniyu tun ta mabbabà dád timpo. 36 Asal duwán pa duma na ágpasóddór ka kabánnalan tingód kanak na tuu pa ágkasarigan ka tandingán ki Juan, su tikud tun ta Ámmà ku tô langun kasalábbuan na áglumun ku, asta tô gó tô ágpasóddór na igpapidda gó katô Ámmà ku. 37 Ámmà ku na igpapid kanak tô igulit ka kabánnalan tingód kanak, asal ándà yu gó dinággi tô kagi din. Ándà yu kakitayi tô báttuk din. 38 Dì yu ágtaguán tô kagi din tun ta pusung yu, su agad igpapidda ikandin, asal dì kó ágpamaké kanak. 39 Marag kó ágbasa katô kagi ka Manama na igsulat sayyan, su tun ta panámdám yu, ukit katô kabasa yu kabággayan kó ka kantayan na ándà ágtamanán. Kagi ka Manama na igsulat tô gulit katô kabánnalan tingód kanak, 40 asal géllé kó kanak. Purisu dì kó kabággayan katô kantayan na ándà ágtamanán. 41 Ándà kakalyag ku na durungánna katô mga manubù, 42 asal isóddóran ku na dì kó ágginawa katô Manama. 43 Agad igpapidda katô Ámmà ku, ándà kó tanggap kanak. Asal atin ka duwán manubù na ágtinurù agad ándà sikandin papiddi ka Manama, tô gó tô ágtanggapán yu. 44 Kakalyag yu na durungán kó ka duma mga manubù, asal ándà kakalyag yu na durungán kó katô sábbad dád Manama. Purisu dì kó ágpamaké. 45 Tun ta tapuri álló, ánnà sakán tô dumimanda tun ta Manama tingód ákniyu, su tô kamónaan yu na si Moises na ágsarigan yu, sikandin tô dumimanda tingód ákniyu tun ta tapuri álló. 46 Atin ka igbánnal kó pád katô kagi i Moises, igbánnal kó pád katô kagi ku, su igsulat si Moises tingód kanak. 47 Asal atin ka dì kó ágbánnal katô igsulat i Moises, dì kó pagsik mánnal katô ágkagin ku ákniyu.”