1 মাবুদে মুছারে কইলা, 2 “তুমি বনি ইসরাইলরে কও, তারা ঘুরিয়া আইয়া ফামা-হিরোত নামর জাগার কান্দাত মিগদোল আর দরিয়ার মাজামাজি, বাল-ছাফোন এলাকার ছামনে দরিয়ার চরো তাম্বু গাড়িতা। 3 ইতা দেখলে ফেরাউনে মনো করবো, বনি ইসরাইলে কুনু বায় পথ না পাইয়া ঘুরা-ঘুরি করতে করতে মরুভুমিত আটকি গেছইন। 4 আমি ফেরাউনর দিলরে পাষান বানাইমু, হে তুমরার খরে খরে খেদানিত আইবো। তেউ ফেরাউন আর তার সিপাই অকলরেদি আমার নাম উজিলা অইবো; ইতা দেখিয়া মিসরি অকলেও বুজিলিবা, আমিউ মাবুদ।” মাবুদর হুকুম মাফিক বনি ইসরাইলে অউলা করলা।

5 হাছাউ মিসরর বাদশা ফেরাউনে যেবলা খবর পাইলো, বনি ইসরাইল অকল বাগি গেছইন, হুনিয়াউ ফেরাউন আর তার উজির-নাজিরর দিল ফিরিগেল। তারা কইলা, “হায়, হায়! আমরা ইতা কিতা করছি? ইতারে আমরার গুলামি থাকি কেনে ছাড়লাম?” 6 অখান কইয়াউ ফেরাউনে তার যুদ্ধর ঘোড়ার গাড়ি হাজানির হুকুম দিয়া, তার সিপাই অকলরে জুইত করাইলো। 7 হে তার খাছ শক্তিমান ছয়শ ঘোড়ার গাড়ি, মিসরর সব ঘোড়ার গাড়িন আর এরার চালকদার সিপাইরেও লগে লইলো। 8 মাবুদে মিসরর বাদশা ফেরাউনর দিলরে পাষান করিল্লা, হে বনি ইসরাইলর খরে খরে খেদানিত আইলো। এরা যেবলা হিম্মত করি আটিয়া যাইরা, অউ সময় হে এরারে ধরাত আইলো। 9 হে মিসর দেশর হকল ঘোড়-ছওয়ার সিপাই, ঘোড়ার গাড়ি আলা সিপাই সহ আস্তা আর্মি দল লইয়া এরারে ধরার লাগি এরার কান্দাত আইল্লো। অউ সময় বনি ইসরাইল অকল দরিয়ার পারো বাল-ছাফোনর ছামনে ফামা-হিরোতর কান্দাত আছলা।

10 তারা কান্দাত আইতেউ বনি ইসরাইলে চাইয়া দেখলা, তারার খরে অইয়া মিসরি সিপাই আইরা; দেখিয়াউ জানর ডরে মাবুদর দরবারো কান্দন লাগাইলা। 11 তারা মুছারে কইলা, “মিসরো কয়বর দিবার জাগা নাই দেখিয়া, আমরারে মারতায় করি অউ মরুভুমিত লইয়া আইছো নি? তুমি ইতা কিতা করলায়? কেনে আমরারে মিসর থাকি বার করলায়? 12 মিসরর ভিতরে আমরা তুমারে কইছি না নি, আমরারে অনো রইতে দেও, আমরা মিসরিন্তর গুলামি করি? ই মরুভুমিত মরার চাইতে মিসরিন্তর গুলামি করাউ তো আমরার লাগি ভালা আছিল।”

13 মুছায় তারারে কইলা, “তুমরা ডরাইও না। হকলে নিরাই অইয়া দেখো, মাবুদে আইজ কিলা বাচাইন। অউ যেতা মিসরিন্তরে অখন দেখরায়, ইতারে আর কুনু দিনউ দেখতায় নায়। 14 তুমরা অখন শান্তি অও, দেখো, মাবুদেউ তুমরার পক্ষ অইয়া যুদ্ধ করবা।”

15 বাদে মাবুদে মুছারে কইলা, “তুমি কেনে আমার গেছে কান্দিরায়? বনি ইসরাইলরে কও না ছামনেদি আগুয়াইতা। 16 আর তুমার আতর লাঠিরে বাড়াইয়া দরিয়ার উপরে উচা করি ধরো, দরিয়ারে দুই ভাগ করিলাও। তেউ তামাম বনি ইসরাইল হুকনা বায় আটিয়া দরিয়া পারইবা। 17 খিয়াল রাখিও, আমি মিসরি অকলর দিল অলা পাষান বানাইমু, তারা এরারে ধরার নিয়তে দরিয়াত হামাইবা। এরবাদে ফেরাউন, তার সিপাই, তার ঘোড়ার গাড়িন, তার ঘোড়-ছওয়ার অকলর মাজদি আমার জালাল-শান জাইর অইবো। 18 ফেরাউনর হাল-হকিকত দেখিয়া বাকি মিসরি অকলেও বুজিলিবা, আমিউ মাবুদ।”

19 এরমাজে আল্লার যে ফিরিস্তা বনি ইসরাইলর আগে অইয়া যাওয়াত আছলা, এইন জাগা বদলাইয়া বনি ইসরাইলর খরে গেলাগি। এন লগে অইয়া কুদরতি হউ মেঘর চাকাও ছামনে থাকি হরিয়া খরে আইল্লো। 20 খরে আইয়া মিসরি আর বনি ইসরাইলি দুইও দলর মাজখানো উবাইলো। এরলাগি অউ মেঘর চাকার আন্দাইরে মিসরি অকল আন্দারিত পড়িগেলা, তারা রাইতর বালা বনি ইসরাইলর কান্দা লইতা পারলা না। অইলে বনি ইসরাইলর ছামনে রাইতর বালাও মেঘর চাকার ফর্সা রইলো।

21 বাদে মুছায় দরিয়ার উপরে তান আত বাড়াইলা, আর মাবুদে হারা রাইত খুব জুরে পুবালি হাওয়া দিয়া দরিয়ার পানি হরাইয়া দুই বাট করিল্লা, দরিয়া হুকাইয়া মাজেদি হুকনা পথ বারইলো। 22 বনি ইসরাইল অকলে হুকনা পায়ে দরিয়ার মাজদি রওয়ানা দিলা, দরিয়ার পানি তারার ডাইনে-বাউয়ে ওয়ালর লাখান উবাই রইলো।

23 ইতা দেখিয়া মিসরি অকলে তারারে খেদাইয়া দরিয়ার হউ হুকনা পথেদি গেলা। ফেরাউনর হক্কল ঘোড়ার গাড়ি, ঘোড়া, আর ঘোড়-ছওয়ার অকল খেদাই খেদাই দরিয়ার হউ পথো গিয়া হামাইলা। 24 আর পতাবালা মাবুদে হউ কুদরতি আগুইন আর মেঘর চাকা থাকি মিসরি সিপাইর বায় লান্নতি নজরে চাইলা, তেউ তারা বেদিশা লাগি গেলা। 25 তাইন এরার ঘোড়ার গাড়ির চাক্কা নষ্ট করি দিলা, এরলাগি তারার খুব কষ্ট অইলেও গাড়ি চালানিত রইলো; এরমাজে তারা একে-অইন্যরে কইলো, “অইছে, আর বাদ দেও, আমরা বনি ইসরাইলর খর থনে হরি যাই। মাবুদে নিজে তারার পক্ষ অইয়া, আমরার লগে যুদ্ধ কররা।”

26 অউ সময় মাবুদে মুছারে কইলা, “তুমি দরিয়ার উপরে হিরবার আত বাড়াও। তুমার আত বাড়াইলে পানি হিরবার মিসরিন্তর উপরে, তারার ঘোড়ার গাড়ি আর ঘোড়-ছওয়ারর উপরে আইব্বো।” 27 মুছায় দরিয়ার উপরে আত বাড়াইলা, আর বিয়ান অওয়ার আগেউ দরিয়ার পানি হিরবার হমান অইগেল; মিসরিন্তে ডাইনে-বাউয়ে দৌড়া-দৌড়ি লাগাইলা, অইলে মাবুদে তারারে দরিয়ার পানিদি ভাওয়াই দিলা। 28 পানি হিরবার জাগাত আইল্লো, তারার ঘোড়ার গাড়িন, সিপাইন, আর ঘোড়-ছওয়ার অকল, মানি বনি ইসরাইলর খরে অইয়া খেদানিত আওরা হক্কলতা পানিয়ে বুড়ি গেল, এগুও জিতা রইলা না। 29 অইলে বনি ইসরাইল অকলে হুকনা পথে দরিয়ার মাজদি গেলা, তারার ডাইনে-বাউয়ে পানি ওয়ালর লাখান উবাই রইলো।

30 অউ নমুনায় মাবুদে হি দিন মিসরি অকলর আত থাকি বনি ইসরাইলরে বাচাইলা, তারা নিজর চউখে দেখলা, মিসরিন্তর মরা লাশ দরিয়ার চরো ভাসি রইছে। 31 মিসরিন্তর উপরে মাবুদর কুদরতি লিলা-খেলা দেখিয়া, বনি ইসরাইলেও মাবুদরে ডরাইগেলা। তারা মাবুদর উপরে আর তান গুলাম হজরত মুছার উপরে পুরাপুর ইমান আনলা।