1 মুছায় তান হউর মাদিয়ানী ইমাম ছাব শোয়াইবর ছাগল-মেড়া রাখতা। একদিন তান ছাগলর পাল লইয়া মরুভুমির হেশ গালাত আল্লার পাড় তুরর কাছাত গেলা। 2 হনো এক জংলার মাজে মাবুদর ফিরিস্তায় আগুনির লাখান নুরর মাজ থাকি তানরে দেখা দিলা। মুছায় দেখলা, জংলার মাজে আগুইন জলের অথচ জংলা জলের না। 3 অউ তাইন তাইজ্জুব অইয়া কইলা, “জংলা যে জলেরনা এর কারন কিতা? তে আরো কাছাত গিয়া দেখিছাইন।”

4 মাবুদে যেবলা দেখলা এইন দেখার লাগি কাছাত যাইরাগি, অউ সময় তাইন জংলার মাজ থাকি ডাকিয়া কইলা, “মুছা, ও মুছা!” মুছায় কইলা, “অউনু আমি।” 5 আল্লায় কইলা, “আর ছামনে আগুয়াইও না। তুমার পাও থাকি জুতা খুলিলাও। জানো নি, তুমি অখন যে জাগাত উবাইছো ইখান পাক জাগা। 6 হুনো, আমি তুমার বাফর আল্লা, ইব্রাহিমর আল্লা, ইসহাকর আল্লা আর ইয়াকুবর আল্লা।” ইখান হুনিয়াউ মুছায় তান মুখ লুকাইল্লা। আল্লার বায় চাইতে তান দিলো ডর হামাইগেল।

7 মাবুদে ফরমাইলা, “আমি মিসর দেশো আমার বন্দা অকলর দুখ-মছিবত দেখিয়ার। মিসরি সর্দার অকলর লাগি তারার কান্দন হুনিয়ার। তারার দুখ-কষ্ট হকলতা আমি দেখছি। 8 দেখিয়া মিসরি অকলর জুলুম থাকি তারারে বাচাইতাম করি আমি নিজে লামিয়া আইছি। তে আমি তারারে মিসর থাকি হরাইয়া নিমুগি। নিয়া রসাইল জমির বউত বড় সুন্দর এক দেশ দিমু। ইখান দুধ আর মউর ভান্ডার আলা দেশ। অউ দেশ অইলো অখনকুর কেনানী, হিট্টী, আমোরী, ফারিজী, হিব্বী আর যিবুজী অকলর দেশ। 9 বনি ইসরাইলর ফরিয়াদ আমার দরবারো আইছে, মিসরি অকলে তারারে যেলা ছাতাইরা, ইতা আমি দেখিয়ার। 10 এরলাগি আমি তুমারে ফেরাউনর গেছে পাঠাইয়ার। তুমি যাও, গিয়া আমার বন্দা বনি ইসরাইলরে মিসর থাকি বার করিয়া আনো।”

11 মুছায় জুয়াপ দিলা, “আমি আরক জন কে, যেইন ফেরাউনর ছামনে গিয়া মিসর দেশ থাকি তারারে হরাইতাম পারমু?”

12 আল্লায় কইলা, “আমি তো তুমার লগে লগে রইমু। তুমি মিসর থাকি মানষরে হরাইয়া আনিয়া, তারারে লইয়া অউ পাড়ো আমার এবাদত করবায়। তেউ বুজবায় আমিউ তুমারে পাঠাইছি।”

13 মুছায় আরজ করলা, “দেখউক্কা, আমি যেবলা বনি ইসরাইলরে গিয়া কইমু, তুমরার বাফ-দাদার আল্লায় আমারে বেজিছইন, অউ সময় তারা যুদি জিকাইন তান নাম কিতা, তে তারারে কিতা জুয়াপ দিতাম?”

14 আল্লায় কইলা, “আমি যেইন আছি, আছিউ। বনি ইসরাইলরে অউলা কইও, যেন নাম ‘আমি আছি’ তাইন আমারে তুমরার গেছে বেজিছইন। 15 তুমি গিয়া তারারে কইও, ‘মাবুদ’ যেইন হর-হামেশা আছইন, এইন তুমরার বাফ-দাদার আল্লা, ইব্রাহিমর আল্লা, ইসহাক আর ইয়াকুবর আল্লা, এইনউ আমারে তুমরার গেছে বেজিছইন। আমার হর-হামেশাকুর নাম ‘মাবুদ, যেইন আছইন’। যুগে যুগে, পুরুষে পুরুষে অউ নাম কাইম রইবো। 16 তুমি যাও, গিয়া বনি ইসরাইলর মুরব্বি অকলরে এখানো দলা করিয়া কও, মাবুদ, যেইন তারার বাফ-দাদার আল্লা, ইব্রাহিমর আল্লা, ইসহাক আর ইয়াকুবর আল্লা, তাইন তুমারে দিদার দিয়া কইছইন, আমি তুমরার বায় খিয়াল করছি, তুমরার উপরর জুলুম-মছিবত দেখছি, মিসরো তুমরার বায় যেতা করা অর এওতা খিয়াল করছি। 17 ইতা দেখিয়া আমি কইয়ার, আমি মিসরর গুলামি থাকি তুমরারে বাচাইয়া কেনানী, হিট্টী, আমোরী, ফারিজী, হিব্বী আর যিবুজী অকলর দুধ আর মউর ভান্ডার আলা দেশো নিমুগি।

18 “ইসরাইলর মুরব্বি অকলে তুমার কথা হুনবা, তুমি তারারে লগে লইয়া মিসরর বাদশার গেছে যাইও। গিয়া কইও, ‘মাবুদ, যেইন ইবরানি অকলর আল্লা, তাইন আমারে দরশন দিছইন। এরলাগি আমরা তান নামে এখান কুরবানি করতাম চাইয়ার, আমরা মরুভুমির বায় তিন দিনর পথ গিয়া কুরবানি দিমু, তে আমরারে যাওয়ার অনুমতি দেউক্কা।’ 19 অইলে আমি জানি মিসরর বাদশায় তুমরারে যাইতে দিতো নায়, জুর-জবরদস্তি করলেও দিতো নায়। 20 তেউ আমি আমার কুদরতি আত লাগাইমু আর অউলা আচানক গজব নাজিল করমু, যাতে হে তুমরারে যাইতে দেয়। 21 আর আমি মিসরি অকলর দিলর মাজে বনি ইসরাইলর বায় এমন এক দয়ার ভাব পয়দা করাইমু, এরা যানু মিসর থাকি খালি আতে না যাইন। 22 হকল ইসরাইলি বেটিন্তে তারার আরি-ফরি বা যেরার বাড়িত তারা রইন, অউলা মিসরি বেটিন্তর গেছ থাকি তারার সোনা-রুপার গয়না-গাটি আর ভালা কাপড়-চুপড় খুজিয়া নিও। অতা দিয়া তুমরার পুয়া-পুড়িনরেও হাজাইও, অউ নমুনায় তুমরা মিসরিন্তর ধন-ছামানা দখল করবায়।”