1 गो सोइश्‍शो ब्रेत्‍चा पुंइसीशो पावल नङ। आं शेंतीके लोव़ मुर आन लोव़ ममाइ। मुरपुकीम सोइश्‍शो यो मनङ। येसु ख्रीस्‍त कली बेक्‍शो रे सेंब इं आफ परमप्रभु यावे नु येसु ख्रीस्‍त आस सोइश्‍शो नङ। गलाती १:११-१२ 2 गो नु काथा बाक्‍ब थमा सुइक्‍ब लोक्‍बपुकीमी गलातीया रागीम बाक्‍ब येसु ख्रीस्‍त आ नेंमी देल्‍ब इन कली एको चिठी सोइक्‍ताक्‍क। 3 इं आफ परमप्रभु यावे नु प्रभु येसु ख्रीस्‍तम इन कली शिशी पा इन थुं नाइश्‍शा बाक्‍चा गेम्‍सेक्‍ल। 4 प्रभु येसु ख्रीस्‍तमी इं पाप क्‍याम्‍चा नु रागीम ग्रूशो मरिम्‍शो पतीके रे प्रोंइचा कली आ गिंम गेप्‍तु। आ मोदेंशो पशो चहिं इं आफ परमप्रभु यावे आ दाक्‍शो बाक्‍त। गलाती २:२०; १तिमोथी २:६; तीतस २:१४; १यूहन्‍ना ५:१९ 5 इं आफ परमप्रभु यावे कली ठेयब सेल्‍चा गेनायो मप्रोंइय। आमेन।

6 इन कली तशा, गो छक लाक्‍ती। मारदे हना इन कली येसु ख्रीस्‍त रे पा शिशी पा आ गे ब्रेप्‍ब कली प्रोंइशा, अर्को आन ग्‍येरपाइक्‍ब लोव़ नेंतीनी। 7 थमा लोव़ चहिं का ला बाक्‍ब, दे रुपीन। ख्रीस्‍त आ ग्‍येरपाइक्‍ब लोव़ दूली पा शेंबपुकी जाक्‍शा, आन दूली शेंशोमी इन थुं क्‍याल्‍पाइक्‍तेक्‍म। प्रेरित १५:१,२४ 8 मिनु गोपुकी ङोंइती आंइ शेंशो ग्‍येरपाइक्‍ब लोव़ क्‍येङा अर्को ग्‍येरपाइक्‍ब लोव़ शेंताक्‍क हना, गोपुकी सराप रकल। परमप्रभु यावे आ स्‍वर्ग ङा गेय पाइबमी मोपा अर्को ग्‍येरपाइक्‍ब लोव़ शेंताक्‍व हना मेको यो सराप रल। 9 गो इन कली “सु सुमी अर्को ग्‍येरपाइक्‍ब लोव़ शेंनीमी, मेको सराप रमल” दे लेंशा देंनुङ। १तिमोथी ६:३ 10 मार, गो मुर आन थुं नुपाइक्‍चा माल्‍नुङा ङा? गो परमप्रभु यावे आ थुं कका नुपाइक्‍चा माल्‍नुङ। गो मुर आन थुं नुपाइक्‍तीके लोव़ पाता हना, ख्रीस्‍त आ गेय पाइब माइक्‍चा मपुंइसीनुङ। १थिस्‍सलोनिकी २:४-६

11 आं लोक्‍बपुकी, गोमी इन कली शेंशो ग्‍येरपाइक्‍तीक लोव़ मुर आन लोव़ मबाक्‍ब। 12 गो मेको मुरुमी शेंशा नेंपाइश्‍शो मनङ। येसु ख्रीस्‍तमी तपांइसीशा, शेंताक्‍यी। प्रेरित ९:१-१५ 13 साइ गो दोपा यहूदी धर्म ब्रङा, मेको नेंशा तुइश्‍शो बाक्‍नीनी। मेना गो येसु ख्रीस्‍त आ नेंमी देल्‍ब आन कली खेदा पपाइश्‍शा ग्‍याइक्‍पाइश्‍शा चोक्‍पाइश्‍शा, श्‍येत गेतामी। मेको आन कली साम्‍चा, दे शुश गेय पाता। 14 आं पालामी नेल्‍ल आन क्‍येङा शुश धर्म पा आंइ यहूदी आन रिती थिती पाता। अरु आन कली यो आंइ किकी पिपीम पशो रिती थिती पपाइक्‍नुङमी, दे आं थुं फ्रेंशा बाक्‍शो नङ। प्रेरित २३:६; प्रेरित २६:५ 15 परमप्रभु यावेमी चहिं काबु आं मोदेंशो पचा तेक्‍ती। मारदे हना आ दाक्‍शो पा आं जरमेचा ङोंइती रे योव़शा, आ लोव़ शेंब सेल्‍ने थुम्‍शो बाक्‍माक्‍त। येरमीया १:५; रोमी १:१ 16 मोपतीके आ तौ येसु ख्रीस्‍त कली तपाइक्‍ती। मिनु शुश अर्को रागी ङा मुर आन कली आ तौ आ पर्बम शेंथ सोइक्‍ताक्‍यी। मेको शेंचा आ पर्बम गो सुइ नु लोव़सी मपङ। अर्को मुर आन अर्ती यो मनेंनु। मत्ती १६:१७; गलाती २:७ 17 गो यरूसलेमम बाक्‍ब आं ङोंइती ब्रेत्‍चा पुंइसीशा शेंथ सोइश्‍शो आन कली ग्रुम्‍थ यो मलङ। अराब रागी लशा हिरशा, दमस्‍कस सहर जाक्‍दीश्‍शा बाक्‍ती। 18 मिनु बर्स सां नोले केफास ग्रुम्‍थ यरूसलेम लती। मिनु केफास नु १५ नाक्‍ती सम्‍म बाक्‍ती। यूहन्‍ना १:४२; प्रेरित ९:२६-२७ 19 मेना ख्रीस्‍त आ सोइश्‍शो सुइ आन कली मग्रुमुमी। प्रभु आ लोक्‍ब याकूब चहिं ग्रुम्‍ता। मत्ती १३:५५ 20 गोम इन कली ब्रेक्‍शो लोव़ थमान बाक्‍ब, देंनुङ। जोल ममाइ, दे परमप्रभु यावेमी तुइक्‍ब। 21 नोले यरूसलेम रे गाक्‍शा, सिरीया नु सिलीसीया रागी हिरथ लती। प्रेरित ९:३० 22 यहूदीया रागीम बाक्‍ब ख्रीस्‍त कली थमा सुइक्‍ब आन ग्रुम्‍तीकेमी आं कली गेनायो मतशो बाक्‍मा बाक्‍त। 23 मेकोपुकीमी आं पर्बमी “साइ इं कली खेदा पा एको लोव़ साम्‍चा देंबमी मुल एको लोव़न शेंना शेंन ब्रपाइक्‍बाक्‍त” दे नेंशो बाक्‍तेक्‍म ने। 24 मेको नेंशा परमप्रभु यावे कली ठेयब सेल्‍तेक्‍म ने।