Ⅰ Yesu Kɩrɩsɩto na ɩ a Nãaŋmɩn Bie 'yɛr nʊ̃ɔ pielfʊ.

Ⅱ 'Yɛ'yɛrɛ kɔ̃ɔ yuor na di Isaiya sɛb naa, “Nyɛ, ɩn tʊ̃ naa a n tʊ̃tʊ̃nɔ̃ ka wʊ de nie tɩ chɔɔr a sɔr kʊ fʊ.” (Malakaɩ 3:1) Ⅲ “Kɔkɔr tãna naa a dãlpʊɔ ju, ‘Chɔɔr a sɔr kʊ a sɩ Soro na fʊ maal a wʊ sɔr ka wʊ tor.’ ” (Isaiya 40:3)

Ⅳ Lɛ lɛ a Jɔɔn wa, na wʊ wa suoro a nɩbɛ a Nãaŋmɩn kʊ̃ɔ be a dãlpʊɔ ju, na wʊ mʊɔl 'yɛr, “Yɩ lɩɛb yi a yɩ tɩɛr dɛɛr pɔ so a Nãaŋmɩn kʊ̃ɔ, ka wʊ vɛ̃ a yelbebe kʊ yɩ.” Ⅴ Ka a nɩbɛ yire a tẽn ala a jaa na be a Judiya wɛr pɔ, ka a bamɩne mɩ yire a Jerusalɛm. Ba chire naa a ba pʊʊr 'yɛrɛ a ba yelbebe kʊrɔ wʊ tɩchɛ ka wʊ suoro ba jaa a Nãaŋmɩn kʊ̃ɔ a Jordan man pɔ. Ⅵ Nyɔɔma kɔɔlʊ fuu lɛ Jɔɔn ma su tɩ de gãn lũn a sɩɛ. Soor nɩ sɩkãa lɛ ɩ a wʊ bʊ̃diir. Ⅶ Wʊ 'yɛr naa, “N puor sʊɔ ben be, na wʊ gar ma. A wʊ nafɔɔr mibe gba n ba sɛɛ ɩka n guun for ɛ. Ⅷ Maa suoro yɩ naa nɩ a Nãaŋmɩn kʊ̃ɔ tɩchɛ 'lɔ na so yɩ naa nɩ a Nãaŋmɩn Sɩɛ.”

Ⅸ A sɔ̃ɔ 'lɔ Yesu yi naa Najaretɩ na be a Galilee wɛr pɔ wa, ka a Jɔɔn so wʊ a Nãaŋmɩn kʊ̃ɔ a Jordan man pɔ. Ⅹ A Yesu na wa yire a kʊ̃ɔ pɔ, wʊ nyɛ naa a saaju na tɔɔ yuo ka a Nãaŋmɩn Sɩɛ wa suro fɩka papa wa kpɛ a Yesu pɔ. Ⅺ Tɩ a kɔkɔr yi a Nãaŋmɩn sɛ̃ 'yɛrɛ, “Fʊ̃ʊ lɛ ɩ a n binʊ̃nãa, ka a n 'yɔ̃ɔ ma 'maa nɩ fʊ.”

Ⅻ Ka a Nãaŋmɩn Sɩɛ de wʊ fɔɔ jaa chiin a dãlpʊɔ ju, ⅩⅢ ka wʊ tɩ be be ber lɩjaayi ka a Satan bɛɛr wʊ kaa. 'Lɔ nɩ a mɔdʊ̃n lɛ dɔ̃ɔ be be, ka a malakasɩ wa sʊ̃nɔ̃ wʊ.

ⅩⅣ Jɔɔn ban wa nyɔɔ pɔɔ baar, Yesu chen naa a Galilee na wʊ tɩ mʊɔlɔ 'yɛrɛ a Nãaŋmɩn 'yɛr nʊ̃ɔ. ⅩⅤ Wʊ 'yɛr naa, “A sɔ̃ɔ ta naa ka a Nãaŋmɩn di a wʊ nãalʊ̃ʊ. Yɩ lɩɛb yi a tɩɛr dɛɛr pɔ na yɩ sɔɔ de a 'yɛr nʊ̃ɔ.”

ⅩⅥ A lɛ a Yesu na wa de a Galilee man lana, wʊ nyɛ naa Simon nɩ a wʊ yɛbile Andiru ka ba lɔɔrɔ lɔyaar, jãnyɔɔrbɔ lɛ ba ɩ, ⅩⅦ ka wʊ bʊɔl ba, “Yɩ wa turo ma, ka n lɩɛb yɩ ka yɩ nyɔɔrɔ nɩbɛ 'yɔ̃ɔnɔ̃ Nãaŋmɩn nãalʊ̃ʊ pɔ.” ⅩⅧ Ka ba tɔ̃ɔ tɩɛ a jãmɛ nyɔɔrfʊ bar tɩ turo wʊ.

ⅩⅨ Wʊn wa chen a niem bãlãa, wʊ nyɛ naa Jemesɩ nɩ Jɔɔn, Jebedee bibiir, a ba be a gboro pɔ chɔɔrɔ a lɔyaarsɩ. ⅩⅩ Wʊn wa nyɛ ba, wʊ bʊɔl ba naa, ka ba bar a ba sãa nɩ a gboro nɩ a bala ban yara tɩ turo a Yesu.

ⅩⅪ Be lɛ ba wa chen a Kapenahum ka a Pɛ̃nfʊ Bɩbir wa ta, ka a Yesu chen tɩ kpɛ a lɔ̃ɔfʊ jie tɩ piel wile. ⅩⅫ A nɩbɛ nɛɛr 'maa naa nɩ a wʊ wiilfʊ, bojũu wʊ wile ba naa nɩ Nãaŋmɩn sɔr. Waa ɩ fɩka a Mosesɩ Nɛɛ wiwiilbe ɛ. ⅩⅩⅢ A sɩdɛɛr sʊɔ kɔ̃ɔ mɩ chen tɩ kpɛ a ba lɔ̃ɔfʊ jie tãna 'yɛrɛ nɩ, ⅩⅩⅣ “Bãa lɛ a fʊ̃ʊ Yesu na yi a Najaretɩ bʊɔrɔ a sɩ sɛ̃? Fʊ wa naa ɩka fʊ wa sɔ̃ɔ sɩ bar bɩɩ? N bɔ̃ɔ naa a nɩrɛ 'lɔ fʊn ɩ, fʊ ɩ naa a chɛchɛ 'lɔ na yi a Nãaŋmɩn sɛ̃!”

ⅩⅩⅤ Ka a Yesu tãn wʊ, “Pɔɔ a fʊ nɛɛ tɩ wa yi a daba pɔ!” ⅩⅩⅥ Ka a sɩdɛɛr daa a daba lɔb tẽe nɩtãa kpũgul loro tɩ ŋme chɛlma tɩ wa yi a daba pɔ.

ⅩⅩⅦ Ka a nɛɛr 'maa a nɩbɛ ka ba lɩɛb sʊrɔ taa, “Bo lɛ? Wiil paal bo mɩ nɩ nyã, na tara kpɛ̃ɔ lɛ! Wʊ ma 'yɛr 'yɛr, ka a sɩdɛbɛ ma tu a wʊ nɛɛ.” ⅩⅩⅧ Ka a wʊ yele yaar a Galilee wɛr wʊ jaa.

ⅩⅩⅨ Ban wa yi a lɔ̃ɔfʊ jie, 'lɔ nɩ Jemesɩ nɩ Jɔɔn chen naa a Simon nɩ Andiru yir, ⅩⅩⅩ ka a ãgãn tɔ a Simon dãɛ pɔɔ ka ba 'yɛr kʊ a Yesu. ⅩⅩⅪ Yesu kpɛ naa a wʊ sɛ̃ tɩ nyɔɔ a wʊ nũu sʊ̃ʊ wʊ ka wʊ ir. A ãgãn tʊl baar wʊ, ka wʊ ir maal bʊ̃diir kʊ ba.

ⅩⅩⅫ A jãanʊɔr 'lɔ̃nɔ̃ a mɔ̃tɔ̃ɔ na wa mʊr, a nɩbɛ waan na baalsɩ nɩ a bala a sɩdɛbɛ na tara a Yesu sɛ̃. ⅩⅩⅩⅢ Ka a tẽe nɩbɛ ba jaa wa lɔ̃ɔ a dɔ̃dɔ̃rʊ, ⅩⅩⅩⅣ ka a Yesu sãa nɩyɔɔ na tara baal jaa bʊrɔ. Wʊ mɩ dii naa a sɩdɛbɛ yɔɔ ka a yi, tɩ maa sɔɔ ka a sɩdɛbɛ 'yɛr 'yɛr ɛ, bojũu ba bɔ̃ɔ naa a nɩrɛ 'lɔ wʊn ɩ.

ⅩⅩⅩⅤ A wɛr na chaara a bibio pipi tɩ chɛnɛ sɔb, Yesu ir na wʊ yi a yir na wʊ chen a jie ãsʊɔ ɩka wʊ tɩ sʊɔr Nãaŋmɩn. ⅩⅩⅩⅥ Simon nɩ a wʊ taaba mɩ yin bʊɔrɔ wʊ na ba wa nyɛ wʊ, ⅩⅩⅩⅦ na ba 'yɛr, “Nɩbɛ ba jaa yʊɔrɔ na bʊɔrɔ fʊ!”

ⅩⅩⅩⅧ Ka a Yesu 'yɛr, “Yɩ ɩ ka sɩ chen jiyuo, a tẽn anyã na gbʊr, ka n tɩ mʊɔl 'yɛr a Nãaŋmɩn 'yɛr a be, ala 'yɔ̃ɔ lɛ n wa.” ⅩⅩⅩⅨ Wʊ yɔ naa a Galilee wɛr wʊ jaa na wʊ 'yɛrɛ a Nãaŋmɩn 'yɛr a ba lɔ̃ɔfʊ yie pɔ tɩ na wʊ dire a sɩdɛbɛ mɩ ka a yire.

ⅩⅬ Ka a daba ãsʊɔ mɩ na ɩ kɔ̃kɔ̃mɔ̃ wa gbur dumo sʊɔr wʊ, “Fʊ̃ʊ sɔɔ, sãa ma.”

ⅩⅬⅠ Ka nɩbaal kpɛ a Yesu ka wʊ tur a wʊ nũu sɩɩr a daba tɩ 'yɛr, “N sɔɔ naa. Sa!” ⅩⅬⅡ Ajienaa ka a kɔ̃kɔ̃mɔ̃ sa.

ⅩⅬⅢ Yesu kpãa wʊ naa kpãkpãan wʊ ɩka, ⅩⅬⅣ “Taa ɩrɛ wa 'yɛrɛ kʊrɔ nɩrɛ ɛ. Chen tɩ wiil a fʊ mãɛ kʊ a Juu nɩbɛ bɔɔrloro tɩ ir a nɛɛ 'lɔ a Mosesɩ na 'yɛr ka a ɩ dãasɩɛ.” ⅩⅬⅤ Tɩchɛ a daba na wa yi wʊ piel naa na wʊ ŋme a Yesu yele yaar, ka a lɛ jũu Yesu ba lɛ tʊ̃ɔ yʊɔrɔ chãa pɔ a tẽe pɔ ɛ. Wʊ ma be naa a tẽe kõkoor, a nɩbɛ chɛnɛ yire jiir jaa waara a wʊ sɛ̃.