1 Iesu misepin mi moletin nan xil bit, “Munanexo ti e munalonge ti nasa. Muneket e Hi e muneket e nou mun.✡ Sion 14:27 2 E rute xa Tata navan da en, vontoen holu ladi en. E inou niha tengan nisak mesen vonemim.* Iesu taviteni ti xa ihe ut nesao tengan vakili ni nim savsav xil tengan vahe na moletin nan xil. Di biteni xa ha imat tengan vapol ni suse tengan ngan xil xa laneket en lakila ha liti e ut nesao itela e itel Tamen. Ngan ak be reitin, vengan vahit nave reitin ti, ma ninaviteni ti mi xamim. 3 E vengan xa be reitin xa niha nisak mesen vonemim, reitin mak mu xa nitilomun e nileh xamim mumei visal inou. Isak ni, xamim muti e rute xa inou ha nita en.✡ Sion 12:26; 17:24 4 E xamim mukil suse ngamu xa be rute xa inou niha en.”

5 E Tomas biteni mini bit, “Suv, xamem matakil ti rute xa uha en. ?Misak ni, xamem mukil suse nen itep?”

6 Iesu biteni mi moletin nan xil bit, “Inou nabe suse, inou nabe reitinen, e inou nabe meulien.† Koute te sepinien ak be, “Inou nabe ngan xa di pisen suse tengan moletin xil lakila lave visal Hi Tata e ut nesao, nabe ngan xa di pisen reitinen usili, e inou nabe ngan xa di misa meulien sal mi moletin xil.” Moletin tovuol mikila vahe visal Hi Tata xosxa naxo inou ti.✡ Hib 10:20 7 Xosxa xamim mukila xa nabe visi, ma mukil Tata navan mun. Ma, xosali iha, mukil kuh Hi Tata ixoni ngan taxa mutepusi reitin.”✡ Sion 8:19

8 Ma Pilip biteni mini bit, “Suv, upisen Hi Tata mi xamem, e ngan ak iaxa ipin ni xamem.”

9 Iesu bit rilomun ni bit, “Pilip, natete visal xamim be nousav ngamu. ?Veneh ma otakil ti nou mu? Moletin xa pus inou, nggoni ngan xa di pus Tata mun. ?Veneh vari di osis nou tengan nipisen Tata mi xamim?✡ Sion 12:45; Kol 1:15; Hib 1:3 10 ?Be reitin iaxa otake reitin ti mu xa inou nabisti del Tata, e Tata bisti del nou? Sepinien xil xa di nabiteni mi xamim tastal ti vaxo inou tasok. Tata xa di nabisti dela iaxa di misa ni minou, e xi misak ni nou di napol ni polien nan xil.✡ Sion 10:38; 14:20; 17:21; 12:49; 14:24 11 Muke reitin xa inou nabisti del Tata, e Tata di bisti del inou. E neta sav xa musakras muke reitin e rin ak, muneket e nou tang ve polien xil xa di napol ni.✡ Sion 10:37-38 12 Reitin li nabiteni mi xamim, ngan xil xa laneket e nou ti lipol ni holesok xil xa tellep ixoni nou. Reitin, xil lipol ni holesok xil xa ihe eilep mak mu ili ngan xa inou di napol ni, vengan xa inou ha nite visal Tata.✡ Sion 7:33; 13:1; 14:28 13 Ma melele xa musis ve neta e hisok, inou nipol ni tengan inou, Nat Hi, nikila nisak ni his Tata navan ihe nesao mak mu.✡ Sion 15:16; 16:23; 13:31-32; 17:1 14 Reitin, xosxa musis ve neta tova e hisok, inou nipol ni.”

15 Iesu biteni mun mi moletin nan xil bit, “Xosxa eheien namim di e nou, ma mulong xat rae navan xil.✡ Sion 15:10; 1Sion 5:3; 2Sion 1:6 16 Imak, ma nisis Tata navan, e xi isa xoles teimun tesav tengan mei isa tutouen mi xamim e iti mi xamim vehakut.✡ Sion 14:26; 15:26; 16:7 17 Di nasep usil Ninin xa di pisen reitinen na Hi mi moletin xil. E nara ti mi ngan xil xa labe te ut etan tang vengan xa lasakras lapus kila e latakil ti xi. E xamim mupus kila vengan xa xi di bisti del xamim e iti mi xamim.✡ Sion 15:26; 16:13

18 “Melele xa niha, ninastokovein xamim ti naxoni ngan xa mube timaru xil. Vengan xa nitilomun nimei visal xamim.✡ Sion 14:3,28 19 Nave nousav ti, ngan xil xa labe te ut etan tang linapus ti mun inou, e xamim mupus inou e melele xa nimeul rilomun. E vengan xa nimeul rilomun, mukila xa xamim mun mumeul rilomun.✡ Sion 16:16; 7:33-34,36; 6:57 20 E melele nen ak, xamim mukila xa inou nabisti del Tata navan, e xamim mubisti del inou, e inou nabisti del xamim.✡ Sion 10:38; 14:10-11; 17:21-23 21 Ngan xil xa langgur rae navan xil e lalong xati, di lapisen ni xa eheien nae de nou. E ngan xil xa eheien nae de nou, eheien na Tata navan ite xil, e eheien navan mun ite xil e nipisen inou mi xil.”✡ Sion 15:10; 1Sion 5:3; 2Sion 1:6; Sion 16:27

22 Sudas,‡ Hisen teimun tehe Tatios xa latesep usili e Mat 10:3 e Mak 3:18. xa tave Sudas Eskariot ti, bemei visal Iesu e misisi bit, “?Suv, itep vari iaxa ti upisen xouk mi xamem e nave mi ngan tesav xil te ut etan?”✡ Pol 10:40-41

23 Iesu biteni mini bit, “Ngan xil xa eheien nae di e inou lilong xat neta xa nabiteni. Imak, ma eheien nan Tata navan iti mi xil. Xamel malimei maliti visal xil. 24 E ngan xil xa eheien nae tara ti e nou, latalong xat ti neta xa di nabiteni. E naha xa di mulong inou di nabiteni taxo ti e nou tasok, di nggo visal Tata xa tesil nou namei.✡ Sion 7:16; 14:10

25 “Di natehit holesok xil ak melele xa nateta tamu visal xamim. 26 E hisok, Tata isil Ninin Eo xa imei ihe ngan te tutouen. Xi imei ipispisi mi xamim ni holesok xil vus e isak ni xamim munem xat holesok xil vus xa di natehiteni mi xamim.✡ Sion 14:16; 15:26; 16:7 27 Reitin xa nihe reling xamim, e di nasa tomat navan ite tinemim. Tomat xa nasa ni mi xamim taxoni ti naha xa ngan xil te ut etan di lasa ni. Ma, munanexo ti e ulimim nakan ti.✡ Sion 16:33; 14:1

28 “Xamim di mulong nou nabiteni xa nihe reling xamim, e ivus, nitilomun nimei visal xamim. Xosxa eheien namim de nou reitin, ma muhesi xamim ihe holu xa nihe visal Tata navan. Vengan xi be eilep mak mu mili nou.✡ Sion 14:3; 16:16,17; 13:1; 14:12; 16:10,17,28; 20:17 29 Di nabit holesok xil ak mi xamim taxeak tengan, e melele xa mei istal ihe reitin, xamim mupus kila e muke reitin e naha xa natehiteni.✡ Sion 13:19 30 Ninasepin ti mun nave holu mi xamim vengan xa Temat, ngan xa be vat na moletin xil holu te ut etan, di bemei. Xi taxur ti xeihen vali nou,✡ Sion 12:31; 16:11 31 e niha nihe hen ixoni ngan xa Tata tesemae ni nou tengan ti nipol ni. Imak, ma moletin xil te ut etan lipus kila xa eheien navan de Tata navan.✡ Sion 12:49; 15:10; Mat 26:46; Mak 14:42

“E taxeak, mumea, rave reling rute ak.”