2
Selxatien usil melele xa moletin xil mei limot mi Hi
1 Timoti, ieok bei pupu tengan xamim musa sisen xil mi Hi ve tutouen, ve memesien, e musis mun ve moletin xil vus, ✡ Efes 6:18; Plp 4:6 2 ve ngan xil xa labe suv toto, e ve ngan xil mun xa labe eilep xil xa di lalaxat xir. Isak ni xir rikila riti e hosien e tomat itel mosav xil; e rikila rimot mi Hi e ripisen merereen mi mosav xil. 3 Hisit sisen xil ak bos e momal pe met Hi. ✡ 1Tim 1:1; 4:10 4 Xi ien bei vateh meulien na moletin xil vus e vapol ni xil mei lakil pispisien nan xil te reitinen xa mak: ✡ Esek 18:23; 2Pit 3:9
5 Hi be tei takes;
e moletin tei takes misoh pe met Hi e rin na moletin xil te ut etan,
xi be Iesu Kristo.✡ Rom 3:29-30; 10:12; Hib 12:24
6 Xi maen xoteh meulien nan mei mat tengan vaxal rat meulien na moletin xil vus ra maten. ✡ Kal 1:4; 2:20; Taet 2:14
E melele xa temat ve xir, xi tepisen ni xa melengien momal tengan Hi vateh meulien na moletin xil. 7 Ve rin ak, Hi tepol ni nou mei natehe eloheoh nan e tesil nou tengan niha nihithiten longeongen hos nan mi ngan xil xa latave Siu ti, e nipispisi mi xil usil suse te neketen xa be reitin. !Ngan ak be reitin, nataluvos ni ti! ✡ Pol 9:15; Kal 2:7-8; 1Tim 1:11
8 Misak ni, e melele xil ngasen xa ti mumei vituei tengan mumot mi Hi, ieok bei xa tiramue xil liling tesaen, ngongoren e ekaten nae xil, e mei lisis mi Hi. 9 Usil rin nen tak, atou xil linanem ti nahe holu usil eising nae xil. Linapilas ni hilixil ti, vurangexil ti, mu hiraexil ti e linavut xil ti natel eising xil xa mani nen nggeih. !E‑e! Ieok bei tengan lising xol xil ni sexien xil xa ipisen merouen e merereen nae mi mosav xil. ✡ 1Pit 3:3-5 10 Ihos mak mu xosxa atou xil lipilas ni xil itel polien hos xil xa ipin ni atou xil xa labiteni labit di lamerere ni Hi. ✡ 1Tim 5:10 11 Melele xa tiramue xil di lapispisi, atou xil linatangal ti. Xil ti lihur pispisien xil ak e ti lilong xati itel nenemien te merouen. ✡ 1Kor 14:34 12 Inou natamaen atou xil ti tengan ti lipispisi mi tiramue xil mu lave vat na tiramue xil. Atou xil litit votei itel merereen e melele te pispisien. 13 Vengan xa Hi tepol ni Adam mu tetiamu, e Iv, tetutou tang. ✡ Sen 1:27; 2:7,22; 1Kor 11:8-9 14 E tenave Adam ti iaxa temot e luvosen. Tehe atou vari tang iaxa temot e luvosen e tehur xoteh rae na Hi. ✡ Sen 3:6,13; 2Kor 11:3 15 E Hi iteh meulien e atou xil melele xa ti lileh horamue xil, xosxa meulien nae di pisen neketen, eheien, merouen, e sexien xil xa momal pe meten.