1 Ghoro Yoova isaav pa Mose ighaze: 2 “Ndaman to naghood, kaiyo to ivot muuŋ, ve ndag inim mata, ghoro upayoon mbeez patabuaŋ. Leso inim inag to nepooŋ, ve itiŋa taluplup ghiit tonowe pa savsaveeŋ. Ugham tovene: 3 Bokis to Saveeŋ Mbuaaŋ to tutuuŋ tiou ineep ila lolo, ughuri imuuŋ ilooŋ ila mbeez suruvu to muŋgaaŋ we. Tutuuŋ tonenen isavia ataam to ataghoni leso lupuuŋ toit ineep tuŋia. Ghoro undaad uli tiina ila mbeez lolo, leso ipoon bokis tonowen. Mbeez suruvu tiina to ineep potla, nene patabuaŋ. Ve suruvu kainaŋen to bokis tonenen ineep pani, nene patabuaŋ le patabuaŋ kat.

4 “Undaad uli le isob, ghoro ughur toŋ to mberet patabuaŋ ilooŋ ila mbeez suruvu tiina to ineep potla, ve ughur mberet patabuaŋ izala.

“Le isob, ghoro upayoon lam aia ilooŋ ila, ve ughur lam liim ve ru tila inadi.

5 “Ghoro ugham artaal gol kainaŋen to tunuuŋ mbeb to vuzidi popoia, ve ughuri ilooŋ ila mbeez suruvu tiina. Ve utoora le nagho iŋarua Bokis to Saveeŋ Mbuaaŋ. Uyou mburuguuŋ to mbeez lolo tilooŋ tila le isob, ghoro undaad uli tiina ite ipoon mbeez nagho.

6 “Ghoro ughur artaal tiina to watooŋrau ineep saguan ris pa mbeez nagho, 7 ve ughur oon tiina to ririwaaŋ ineep bodbodaaŋ pa mbeez nagho ve artaal tiina, ve uliŋ ya ila lolo. 8 Ghoro undaad uli mamala iluvut mbeez, ve undaad uli ariaŋa ila sirsiir avo inim ataam pani.

9 “Upasob uraat naol tonenen le isob, ghoro ugham ŋgoreeŋ, ve uliŋi izala mbeez toman mburuguuŋ to tineep ila lolo, leso ughur di tinim leg. Mbeb naol tonanan, patabuaŋ. 10-11 Le isob, ghoro uliŋ ŋgoreeŋ izala artaal tiina to watooŋrau, toman mburuguuŋ to artaal, ve oon to ririwaaŋ, toman toŋ to oon tonanan ineep izala pogho ne paam. Leso ughur di tinim leg. Artaal tonanan, patabuaŋ le patabuaŋ kat.

12 “Upasob uraat naol tonenen le isob, ghoro ugham Aron toman ndinatu nditamoot tila tigharau ataam avo to mbeez patabuaŋ, ve urughuuz di. 13 Urughuuz di le isob, ghoro undud Aron pa nonogiiŋa toni patabuaŋ to uraat, ve uliŋ ŋgoreeŋ izala daba pa ughuri inim leg. Leso inim ŋgeu to watooŋrau ve imbees payou. 14 Ghoro ugham ndinatu anadi tinim, ve undud di pa nonogiiŋa todi to uraat paam. 15 Ve uliŋ ŋgoreeŋ izala dabadi inimale ugham pa tamandi. Leso tinim ndiran to watooŋrau ve timbees payou. Yesŋa papaghu todi to muri pale tivot, pale tikis uraat tonene, itaghoni taghoni gha ila.”

16 Yoova isavsaav le isob, ghoro Mose ipamundigin uraat. Ye igham mbeb tisob tonowen uraata itaghon saveeŋ to Yoova isavia pani. 17 Tovenen sawa to yes Israela tivool pa ndaman paghu, kaiyo to ivot pa ndaman tonenen muuŋ, ve ndag inim mata, ghoro tipayoon mbeez patabuaŋ to Yoova. * Yes Israela tipul Isip, ve tilaagh tila le kaiyo inim tol pani, ghoro tivot izi lolooz Sinai. Tineep tonowe irau kaiyo liim ve paaŋ, ghoro tivool pa ndaman paghu. Sawa kat to ndaman paghu tonenen imundig, yes tipayoon mbeez patabuaŋ.

20 Ghoro Mose igham yaam ru to tutuuŋ to Yoova ineep ila, ve ighur di tila Bokis to Saveeŋ Mbuaaŋ lolo. Yaam ru tonowen, nene pa ipalot yes Israela, leso matadi kisin saveeŋ mbuaaŋ todi toman Yoova ve titaghoni. Ve Mose izeev sig ru itaghon inadi to ineep Bokis To Saveeŋ Mbuaaŋ dige, leso timbaada. Ve ipakud bokis avo. Bokis avo tonowen, tiwaata tighaze ‘Ndug To Rewaaŋ Sosor.’ Hib 9:4

21 Ghoro Mose ighur Bokis to Saveeŋ Mbuaaŋ ilooŋ ila mbeez lolo, ve indaad uli tiina eez ve ipoona itaghon Yoova aliŋa.

22-23 Le isob, ghoro ighur toŋ to mberet patabuaŋ ilooŋ ila mbeez suruvu tiina to ineep potla. Ineep dige ila pa kagu. Ve ighur mberet patabuaŋ izala, leso ineep ila Yoova nagho, itaghon Yoova aliŋa to isavia pani.

24 Ghoro igham lam aia ilooŋ ila mbeez suruvu tiina, ve ipayoonda ila dige to ila pa daudau, ve itoora le nagho iŋarua toŋ to mberet patabuaŋ. 25 Ve ighur lam liim ve ru izala, leso tisul ila Yoova nagho, itaghon Yoova aliŋa to isavia pani.

26 Ghoro ighur artaal gol kainaŋen to tunuuŋ mbeb to vuzi popoia ne ila igharau uli tiina to irab motin mbeez lolo. 27 Ve itun mbeb to vuzi popoia izala, itaghon Yoova aliŋa to isavia pani.

28 Mose igharaat mbeez toman mbeb tisob to tineep ila lolo ne le isob, ghoro indaad uli tiina ila ipoon ataam avo, ve igham uraat to pumuri. 29 Ighur artaal igharau sirsiir to mbeez patabuaŋ ataama, ve igham watooŋrau pida itaghon Yoova aliŋa to isavia pani. Ye ighur ŋgai toman wit pida tizala artaal, ve yab ighan suvun di tinim watooŋrau. 30-32 Le isob, ghoro ighur oon tiina ineep bodbodaaŋ pa mbeez nagho ve artaal tiina, ve iliŋ ya ila lolo. Leso sawa to ye tau, ma Aron, ma Aron ndinatu tilooŋ tila mbeez lolo, ma tigharau artaal, ghoro timen nimadi ve aghedi pa ya tonowen. 33 Igham uraat tonenen le isob, ghoro indaad uli mamala tiluvut mbeez toman artaal tiina tinim sirsiir pani, ve indaad uli ariaŋa eez inim sirsiir ataama.

Tovenen uraat naol to Yoova isavia di, Mose igham di le tisob.

34-35 Ghoro yaghur tae to Yoova ineep ila, izi inim le itatab mbeez patabuaŋ, ve Yoova ŋguruba isul toman tapiri tiina irau mbeez lolo. Tovenen Mose irau ilooŋ ila maau. Yo 1:14; Syg 15:8

36-37 Sawa to yes Israela tilaghlaagh izi ndug balim, matadi ilala pa yaghur tae tonowen. Ighaze ipul mbeez patabuaŋ pogho ve induur ila, nene yes paam timundig, tiyouyou, ve tilaagh titaghoni. Ve ighaze ineep tuŋia izala mbeez pogho, nene irau tilaagh maau. Tineep ve tisasaŋan le tighita yaghur tae induur muul, ghoro timundig tilaagh.

38 Tovenen sawa to yes Israela tilaghlaagh izi ndug balim, matadi ilala pa yaghur tae tonowen ve titaghoni. Ighaze ndag, ghoro tisob tighita yaghur tae to Yoova ineep ila, inepneep izala mbeez patabuaŋ pogho. Ve ighaze mboŋ, ghoro tighita yaghur tae tonowen isul inimale yab iyaryaar. Igham 13:21; 1Kor 10:1