13
Yesu imen taghoniiŋa toni aghedi
1 Sawa to lupuuŋ tiina to Pasova igharau ighaze ivot. Yesu iwatag: Sawa toni to ipul taan, ve imuul izala pa Tama, nene inim igharau wa. Muuŋ ve inim, ye ighur lolo kat pa tamtoghon toni to tineep izi taan. Ŋgar tonowen, ye itaghoni ila ila le sawa to mateeŋ toni, ghoro ipatooŋa ivot ighazooŋ kat. 1Yo 3:16
2 Rabrab izi, ve Yesu toman taghoniiŋa toni tilup di pa ghanghaniiŋ. Yudas to Simon Iskariot natu, Ŋgeu Samia ipazaagh lolo wa, leso ighur Yesu ila koia nimadi. 3 Yesu iwatag: Tama Maaron ighur mbeb tisob tila nima wa. Ve ye ineep toni, to izi inim, ve pale imuul izala toni. Mt 28:18; Yo 3:35; 1Kor 15:27
4 Tovenen Yesu ipul ghaniiŋ, ve imundig ve iduduum nonogiiŋa toni to moŋeŋaaŋ izi, ve igham uli eez to musuuŋ, ve ipoosa ila ŋgali. 5 Ghoro iliŋ ya izila oon, ve ipamundigin uraat to menuuŋ taghoniiŋa toni aghedi. Sawa to imenmen aghedi, imus di paam pa uli to ipoosa ila ŋgali ne. Mt 20:28; Lu 22:27; Pil 2:7+
6 Imenmen aghedi ila ila le ivot to Simon Petrus. Ghoro Simon isaav pani ighaze: “Wai Tiina, yom ughaze umen agheg?”* Uraat to menuuŋ tamtoghon aghedi, nene uraat to yes mbesooŋa sorok. Ŋgar to Yesu ighami, nene ipatooŋ ghiit pa ŋgar to tatatan tauud izaad, ve tambees pa tamtoghon ve tauul di. Ve ipatooŋ ghiit ighaze mateeŋ toni pale ireu sosor to tamtoghon, ve igham di tiŋgalaaŋ ila Maaron mata.
7 Yesu ipamuul aliŋa ighaze: “Ŋgar to you naghami ne, aazne yom ughilaal pughu maau. Eemoghon muri pale ughazooŋ pani.”
8 Petrus izoora ighaze: “Aazne ve muri paam, yom irau umen agheg maau. Maau le maau kat!”
Yesu isaav pani muul: “Ighaze namen aghem maau, yom tamtoghon tiou maau.”
9 Simon Petrus isaav pani ighaze: “O Tiina, ighaze venen, ghoro umen agheg moghon malep. Umen nimag ve dabag paam!”
10 Yesu isaav pani ighaze: “Tamtoghon to ighaze iririu wa, ye le pughu eta to iririu muul maau. Pasa, anoŋa isob iŋgalaaŋ wa. Tovenen ye pale imen aghe moghon. Yam tonene aŋgalaaŋ wa. Eemoghon yam asob maau.”† Ighaze taghur ila to Krisi, mateeŋ toni ireu sosor toit, ve igham ghiit taŋgalaaŋ ila Maaron mata, tanimale ŋgeu to iririu pooi le anoŋa isob iŋgalaaŋ. Eemoghon, sawa pida, iit Kristen tatap ve tagham sosor. Ighaze tatap, iit irau tavotia sosor toit pa Krisi, ve taghasoni pa ireua pait. Leso taŋgalaaŋ ila ye mata muul. Ughita 1Yo 1:8-9. Yo 15:3, 1Yo 1:8-9
11 Yesu isavia saveeŋ tonene pasa, ŋgeu to ighaze ighuri ila koia nimadi, ye iwatagi wa. Tauto isaav padi ighaze: “Yam asob aŋgalaaŋ maau.”
12 Yesu imen taghoniiŋa toni aghedi le isob, ghoro indudi pa nonogiiŋa toni muul, ve imuul ila pa ina ve mbole izi, ve ighason di ighaze: “Laak, ŋgar to ŋgaramus nagham payam ne, awatag pughu, ma maau? 13 Yam awatwaat ghou aghaze you patoŋaaŋ ve tiina tiam. Saveeŋ tiam tonanan onoon. Ighaze awaat ghou tovene, nene deŋia. 1Kor 8:6; Pil 2:11; Kol 2:6
14 Aghita. You Tiina ve patoŋaaŋ tiam. Eemoghon namen aghemim. Ighaze you nagham tovene, yam paam irau agham ŋgar raraate moghon pa taumim. Lu 22:25+; Ga 5:13; 1Pe 5:5
15 You nagham ŋgar tonene inim patoŋaaŋ payam, leso aghita ve ataghon ŋgar raraate inimale you nagham payam. Pil 2:5; 1Pe 2:21; 1Yo 2:6
16 You nasaav payam. Onoon kat, mbesooŋa eta irau ilib pa tiina toni ne maau. Ve mbaŋooŋa eta irau ilib pa ŋgeu to imbaaŋa ne maau. Mt 10:24+
17 Ŋgar to naghami ne, yam aghazooŋ pa pughu wa. Ighaze ataghoni, nene pale lolomim poia, ve poia to Maaron iza tiam. Mt 7:24; Yems 1:25
18 “Saveeŋ tonene, you nasavia iŋarua yam asob maau. Yam to nasia gham anim leg, you nawatag katin gham. Tamtoghon tiam eez, ye lolo ineep toman ghou maau. Pasa, Maaron aliŋa to timbooda, anoŋa pale ivot. Saveeŋ tovene:
‘Itag ite to yeru lupuuŋ tiei ee moghon ve niluplup ghei pa ghanghaniiŋ, tauto inim koiag.’ Mbo 41:9
19 Aghita. Mbeb tonene ivot sone, ve aazne you navotia payam pataghaaŋ. Leso sawa to ivot, yam aghur ila aghaze YOU TO IZAG NANEPNEEP.‡ Maaron iza Yoova pughu, nene YOU NANEPNEEP. Ughita Maaron Igham Mulin Tamtoghon Toni (o Eksodus) 3:14. Tovenen ŋgara katindi tighaze Yesu saveeŋ toni pughu, nene vene: “Yam aghur ila aghaze you Yoova.” Ve ŋgara pida tighaze saveeŋ toni pughu, nene vene: “Yam aghur ila aghaze you Mesia.” Igham 3:14; Yo 8:58
20 Onoon kat you nasaav payam: Yes to you nambaaŋ di tila pa uraat ne, ighaze tamtoghon eta igham di toman lolo poia, nene igham ghou. Ve ighaze tamtoghon eta igham ghou, nene igham Tamaŋ to imbaaŋ ghou nanim ne paam.” Mt 10:40; Lu 10:16
Yesu ivotia ŋgar to Yudas pale ighami
(Mt 26:20-25; Mk 14:17-21; Lu 22:21-23)
21 Yesu isavia saveeŋ tonene le isob, ghoro lolo ipataŋan kat, ve isaav ghazooŋa ighaze: “Onoon kat, you nasaav payam: Tamtoghon tiam eez pale ighur ghou nala koiagŋa nimadi.”
22 Taghoniiŋa toni tilooŋ saveeŋ tonene, ve tiwambatutun di. Pasa, tikankaan: Yesu isavia saveeŋ tonene iŋarua sei? 23 Sawa tonenen, taghoniiŋa to Yesu lolo pani kat ne, ineep Yesu dige. Yo 19:26, 20:2, 21:7
24 Tovenen Simon Petrus lua katia pani ighaze ighason Yesu pa saveeŋ to ye isavia ne. Iŋarua sei?
25 Tauto taghoniiŋa tonowen indaleel pa Yesu, ve ighasoni ighaze: “Tiina, yom usaav pa sei?”
26 Yesu ipamuul aliŋa ighaze: “You pale napazug mberet tonene ila sur, ve nagham pa tamtoghon toit eez. Ŋgeu tonene to you nasavia.” Ghoro igham mberet pida, ipazugi ila sur,§ Sawa to yes Yuda tighan aniiŋ to Pasova, tigharaat sur pa vaen suru, toman vaen anoŋa, ai fik ve ai det anoŋadi, ve mbeb papaidi pida. Leso tipazug mberet todi izila.
ve igham pa Yudas to Simon Iskariot natu. 27 Yudas ipaes mberet tonowen, ghoro Sadan izeeva. Tovenen Yesu isaav pani ighaze: “Ŋgar to yom ughaze ughami, nene ughami rikia moghon.”
28 Yes to tilup di pa ghanghaniiŋ, todi eta ighilaal pughu to Yesu isavia saveeŋ tonene pa Yudas ne maau. 29 Pida tigham ŋgar tighaze Yesu imbaaŋa pa gholiiŋ mbeb pida pa lupuuŋ tiina tonowen, ma imbaaŋa ila pa reiŋ mbeb pida pa yes mbolaaŋa. Pasa, Yudas iŋgin lugluug todi. 30 Tovenen Yudas igham mberet suruvu tonenen, ve rikia moghon imundig, ve ivot ila pumuri. Sawa tonenen, ndoroom izi wa.
Tutuuŋ paghu to Krisi
31-32 Yudas ipul di, ve ivot ila pumuri, ghoro Yesu isaav padi ighaze: “Sawa to Tamtoghon Natu ipatooŋ iza tiina toman tapiri ve poia toni ivot ighazooŋ, tauto ivot wa. Ve mbeb to pale ivot pani, nene pale ipaghazoŋan Tama Maaron iza tiina toman tapiri ve poia toni paam. Leso tamtoghon tipait Tama Maaron iza. Ve Tama Maaron tovene paam. Pale ipaghazoŋan Natu iza tiina toman tapiri ve poia toni. Leso tamtoghon tipait Natu iza. Mala maau pale mbeb tonene ivot. Yo 12:23, 17:5; 2Kor 4:6
33 “Aa ndipain tiou, you pale naneep toman gham ris moghon, ghoro aghita ghou muul maau. Pale napul gham, ve akaal naghog. Tovenen saveeŋ to muuŋ nasavia pa yes Yuda, tauto aazne nasavia payam paam. Saveeŋ tovene: ‘Ndug to you naghaze nala pani, nene yam irau ala pani maau.’ 34 Alooŋ. Aazne, you nasavia tutuuŋ paghu payam tovene: Lolomim pa taumim ve agham poian gham. Lolomim pa taumim kat, inimale you lolog payam kat. Mk 12:31; Yo 15:12+; 1Pe 1:22; 1Yo 2:3, 3:11
35 Ighaze lolomim pa taumim kat, nene pale tamtoghon tighilaal gham tighaze yam taghoniiŋa tiou.”
Yesu isaav ighaze Petrus pale ipesamuni
(Mt 26:31-35; Mk 14:27-31; Lu 22:31-34)
36 Yesu isavia saveeŋ tonene le isob, ghoro Petrus ighasoni ighaze: “Tiina, ndug sine to yom ughaze ula pani?”
Yesu ipamuul aliŋa ighaze: “Ndug to you pale nala pani, yom irau utaghon ghou unum to aazne ne maau. Eemoghon muri, yom pale utaghon ghou unum.” Yo 21:18+; 2Pe 1:14
37 Tovenen Petrus ighasoni muul ighaze: “Tiina, pughu vena to yom ughaze you irau nataghon ghom to aazne maau? You irau napul taug namaat payom.”
38 Yesu isaav pani muul ighaze: “Aliŋam tonanan, pale onoon wa? Yom irau upul taum umaat payou? You nasaav payom: Onoon kat, mboŋ aazne, yom pale upesamun izag pae tol le isob, ghoro tatareek itaŋ.”
*13:6: Uraat to menuuŋ tamtoghon aghedi, nene uraat to yes mbesooŋa sorok. Ŋgar to Yesu ighami, nene ipatooŋ ghiit pa ŋgar to tatatan tauud izaad, ve tambees pa tamtoghon ve tauul di. Ve ipatooŋ ghiit ighaze mateeŋ toni pale ireu sosor to tamtoghon, ve igham di tiŋgalaaŋ ila Maaron mata.
†13:10: Ighaze taghur ila to Krisi, mateeŋ toni ireu sosor toit, ve igham ghiit taŋgalaaŋ ila Maaron mata, tanimale ŋgeu to iririu pooi le anoŋa isob iŋgalaaŋ. Eemoghon, sawa pida, iit Kristen tatap ve tagham sosor. Ighaze tatap, iit irau tavotia sosor toit pa Krisi, ve taghasoni pa ireua pait. Leso taŋgalaaŋ ila ye mata muul. Ughita 1Yo 1:8-9.
‡13:19: Maaron iza Yoova pughu, nene YOU NANEPNEEP. Ughita Maaron Igham Mulin Tamtoghon Toni (o Eksodus) 3:14. Tovenen ŋgara katindi tighaze Yesu saveeŋ toni pughu, nene vene: “Yam aghur ila aghaze you Yoova.” Ve ŋgara pida tighaze saveeŋ toni pughu, nene vene: “Yam aghur ila aghaze you Mesia.”
§13:26: Sawa to yes Yuda tighan aniiŋ to Pasova, tigharaat sur pa vaen suru, toman vaen anoŋa, ai fik ve ai det anoŋadi, ve mbeb papaidi pida. Leso tipazug mberet todi izila.