1 Jon
One Towe Tutawe Jon lai Lese Ausawi.
1 Jon Peri Tutawe
Meni ape Jon one towe eite lu taune werese ma'e, Jisas ne tote tawesi umasiteye ape, omo pani Esia sahe iroteye ape, lese ausawi. Jon ya'ariyei meni naihe a'i ne. Le omo Efesus sahe iroteye su, le one towe eite leseye.
Jon peri hesi a'i lowe ma'e au te'e atuatuteye. Jisas yo seni luwaru a'i nomo lo au ta'ane sasari pamoweye su, nowe Owane Sitewi ne tei kairefiyenamite. Sosu aiwawe a'i nomo meni eime lo, Jisas ne tei kairefiyenamite. Jon lo peri tere'e apou au te'eteye. Lu tamo peri afofo a'i ta au te'eteye. Lowe apou au te'eteye, “Tahe pa'are nomo lo luwaru a'i ne. Serai Jisas tahe pa'are ta iro te ta'ame.” Lu ape mo marepi towafi lowe lo ei ani aroweteye. Lowe tote wawesiyeyei lu taune ma'e hi ani araroteye. Serai Jon marepi lowe lo peri wiyeme a'i se au fareraiyeteye.
1
Marepi hepene he'i a'i lo peri.
1 Meni ta tu naifa weriyei ironamiteye. Nomo peri lo wanuteye ape, sosu nomo le ma'e nihe nomo lo se siyeteye. Sosu nomo le ma'e siye etinamiteye ape, sosu nomo le ma'e ereti nomo lo se isawe hetesiyeteye. Meni ape apou wou a'i marepi he'i a'i lo peri ne nomo fene ma'e au te'e areiyesiya. [Jo 1:1] 2 Marepi he'i a'i tu naifa henerai. Nomo le ma'e siyeteye. Sosu nomo le ne au te'e areiyesiya. Serai nomo marepi he'i a'i mi mi pasi pasi ironamirowa ape, fene ma'e au te'e areiyesiya. Marepi he'i a'i ape Tai wiyeme mase ironamiteye. Sosu le nomo ma'e henerai. [Jo 1:14] 3 Etiri ape mo, nomo lai siyenamiteye ape, sosu etiri ape mo nomo lai wanunamiteye. Nomo fene ma'e au te'e areiyesiya. Piyene awere? Apou a'i fene nomo mase sewiyenamisiya. Sosu nomo Tai wiyeme, meni eime lo Jisas Krais aiwawe a'i, lowesi mase sewiyenamisiya. 4 Serai nomo fene ma'e one towe eite se lese ausawisiya. Piyene awere? Apou a'i marepi nomo lo wisere a'i teme'eriye ironamisiya. [Jo 16:24]
Mitaiyeyei sahe uweisiya.
5 Peri heneruwe wisereye a'i ape, nomo Krais lo ahi ma'e fai ape, wanuwe. Serai nomo fene ma'e au te'e fiyariyei apou a'i Owane Sitewi a'i lai mitaiyeyei pefine a'i ne. Le papu sahe nowe pasi po'uteye. [1 Ti 6:16; Je 1:17] 6 Nomo fene ma'e au te'esiya su, “Nomo Owane Sitewi mase marepi ta'i a'i irosiya.” Serai nomo nowe pasi a'i uweisiya. Apou a'i nomo yo seni luwaru a'i irosiya. Peri nomo lo wawero a'i ne. Sosu nomo peri pefine a'i iro ta'ame. [1 Jo 2:4] 7 Sosu nomo mitaiyeyei pefine a'i se uweisiya su, apou a'i Krais pefine a'i iroteye. Nomo lu taune ta'i ta'i a'i mase marepi ta'i irosiya. Sosu Owane Sitewi lo meni eime lo fisa'i yo seni luwaru a'i nomo lo werese aseyaro a'i au irowei.
8 Nomo peri au te'e fiyariyei su, apou a'i te'esiya, “Nomo yo seni luwaru a'i irorowata.” Nomo ta'u peri wawero a'i au te'esiya. Sosu Owane Sitewi lo peri pefine a'i marepi nomo lo sahe iro ta'ame. 9 Serai nomo Owane Sitewi ma'e yo seni luwaru werese a'i au te'eyei su, le a'i lai mi mi pasi pasi weriyei, sosu marepi pefine a'i lo se, le yo seni luwaru a'i nomo lo werese au ani sasari pamoweyei. Sosu le etiri luwaru a'i werese nomo lo aseyaro a'i au irowei. [Sng 32:5; Snd 28:13] 10 Nomo peri ta apou au te'esiya su, “Nomo yo seni luwaru a'i iro ta'ame.” Nomo Owane Sitewi ma'e apou te'esiya, “Ne peri wawero a'i au te'esiya.” Sosu Owane Sitewi lo peri pefine a'i marepi nomo lo sahe iro ta'ame.