1 Weꞌe leꞌa Pilat cha unibeꞌe goꞌo be soldad Jesús len niꞌi wa, cha kin bexa Jesús. 2 No mbindeꞌe be soldad dub ta rued xos yagich usob gek Jesús cuent coron. No mgak bexa Jesús dub lad koꞌol, ta konch ugats. 3 Cha usalad mbinno be soldad Jesús, ugeꞌ ndab bexa:

—¡Siꞌil nak xa nibeꞌe ten bexa judio!

No utichyaꞌa bexa ndoꞌ Jesús.

4 Weꞌe leꞌa Pilat cha utoꞌogal stub biaj, cha ndab xa ndoꞌ be men wa:

—Bwiꞌi bega, leꞌa naꞌ ko xa sa ndee, ndontsa yakbeꞌena bega leꞌa naꞌ ni dub ke ten xa lá ngaizheal.

5 Leꞌa Jesús cha utoꞌo, nsob coron yagich wa gek xa, no lad konch ugats wa nak xa. Leꞌa Pilat cha ndab ndoꞌ be men:

—Nat bwiꞌi bega xa.

6 Leꞌa gor na uniꞌí be uleꞌay nibeꞌe no bexa nlaꞌach niꞌi ten Dios wa Jesús, cha ugeꞌ ndab bexa:

—¡Ikea xa ndoꞌ cruz! ¡Ikea xa ndoꞌ cruz!

Leꞌa Pilat cha ndab:

—Biꞌi bega xa, cha bkeꞌa bega xa ndoꞌ cruz, leꞌa naꞌ ni dub ke ten xa lá ngaizheal.

7 Leꞌa bexa wa cha ndabbe:

—Leꞌa ley ten besa ndab nsabndoꞌ gatka xa, leꞌa xa nkwiꞌin ndab xa leꞌa xa nak Xin Dios.

8 Leꞌa gor na mbiꞌín Pilat ta wa, leꞌa Pilat mas mzheb. 9 Cha myoꞌogal xa len lid xa, ndab xa ndoꞌ Jesús:

—¿Pa utoꞌo lu zha?

Parea leꞌa Jesús naꞌanpa ikaꞌab.

10 Leꞌa Pilat cha ndab:

—¿Naꞌanpa ikaꞌab lu ndoꞌ naꞌ ndee zha? ¿Lá iniꞌí lu zha leꞌa naꞌ sak inibeꞌe ikea lu ndoꞌ cruz, no sak ndi ula naꞌ lu?

11 Leꞌa Jesús cha ukaꞌab ndab:

—Leꞌa tal Dios lá usaꞌa diꞌizh li gun ga, leꞌa go naꞌan xtaꞌan gun gan gunno naꞌ. Ta weꞌe leꞌa xa na myun cuent naꞌ ndoꞌ ga mas uzheꞌeb ndap ke ndoꞌ lak ndap go.

12 Leꞌa gor weꞌe leꞌa Pilat nlad ulaꞌa Jesús, parea leꞌa bexa judio ugeꞌ ndab ndoꞌ Pilat:

—Leꞌa tal go ulaꞌa xa baꞌ, leꞌa go naꞌanpa nak amig ten César xa nibeꞌe. Leꞌa tal ton gab leꞌa nak xa nibeꞌe, leꞌa xa wa xela níꞌi ndoꞌ César.

13 Weꞌe leꞌa gor na mbiꞌín Pilat ta wa, cha mbiꞌi xa Jesús sa nsaleaꞌ Tale Geꞌ. Leꞌa sa wa nsaleaꞌ Gabata diꞌizh hebreo. Cha usob Pilat sa nibeꞌe xa sa wa, gab xa ná xteꞌe gunno xa Jesús. 14 Leꞌa ta wa gawizh dub wizh lak geꞌatsa gal ujest Pascua. Cha ndab Pilat ndoꞌ be men kwaꞌad wa:

—¡Bwiꞌi bega leꞌa xa ndee xa nibeꞌe ten bega!

15 Ná leꞌa bexa wa ugeꞌ ndabbe:

—¡Gat xa! ¡Gat xa! ¡Ikea xa ndoꞌ cruz!

Leꞌa Pilat cha ndab:

—¿Ukeꞌa naꞌ xa nibeꞌe ten bega ndoꞌ cruz zha?

Leꞌa be uleꞌay nibeꞌe cha ndabbe:

—¡Nab César nak xa nibeꞌe ten besa!

16 Weꞌe leꞌa Pilat cha ndab ikea Jesús ndoꞌ cruz lak nlad bexa. Cha usen be soldad Jesús, cha mbiꞌi bexa xa.

17 Leꞌa Jesús cha nchaꞌano cruz ten na gast sa nsaleaꞌ Gólgota. Leꞌa ta wa dub diꞌizh hebreo gab‑a tit gek men. 18 Cha mkeꞌa bexa Jesús ndoꞌ cruz. No stop men mkeꞌa bexa ndoꞌ cruz dub lad gaꞌga wats Jesús. 19 No mkeꞌa Pilat dub letr ta ikea gek cruz ten Jesús. Leꞌa ta wa ndab: “JESÚS XA NAZARET, XA NIBEꞌE TEN BEXA JUDIO.” 20 Leꞌa ta wa nkeaniꞌi diꞌizh hebreo no diꞌizh griego no diꞌizh latín. Kwaꞌad bexa judio uniꞌí xteꞌe ndab letr wa, geal leꞌa sa nkea Jesús ndoꞌ cruz wa gax nde Jerusalén. 21 Ná leꞌa be uleꞌay nibeꞌe ten bexa judio ngwaꞌyab ndoꞌ Pilat:

—Lá nsabndoꞌ gab ta wa “Xa nibeꞌe ten bexa judio.” Ndi nsabndoꞌ gab‑a “Xa na ndab leꞌa nak xa nibeꞌe ten bexa judio.”

22 Ná leꞌa Pilat cha ukaꞌab ndab:

—Lak nkea‑yá, litsa yaꞌan‑a.

23 Leꞌa tsoꞌo na mkeꞌa dap be soldad Jesús ndoꞌ cruz, cha ukaꞌa kadga dub bexa wa dub xab Jesús. Cha usen bexa lad koꞌol ndak Jesús, leꞌa ná wa naꞌanpa ngeꞌal. 24 Cha ndab bexa ndoꞌ be ltsaꞌa xa:

—Naꞌanpa itsaw beuna ta ndee, ndi koꞌo beuna dub suert ndontsa iniꞌí beuna ná ton ikaꞌa‑yá.

Li ngok‑a lak nkeaniꞌi diꞌizh ten Dios, ndab‑a:

25 Leꞌa wats cruz ten Jesús wa nsoꞌ xnaꞌa Jesús no beal xa, no Marí xagots ten Cleofas, no Marí xa gezh Magdala. 26 Leꞌa gor na uniꞌí Jesús xnaꞌa na junt nsoꞌ wats dub xmen Jesús, xa na leꞌa Jesús uzheꞌeb nkweaꞌ ladna, cha ndab Jesús ndoꞌ xnaꞌa na:

—Naa, leꞌa xa baꞌ ulaꞌach ga cuent dub xin ga nat.

27 Cha no ndab Jesús ndoꞌ xmen xa wa:

—Nat ulaꞌach lu xa baꞌ cuent xnaꞌa lu.

Leꞌa idub ndoꞌ wa leꞌa xmen Jesús wa cha mlaꞌach xnaꞌa Jesús ta lidka na.

28 Ngol tsoꞌo wa leꞌa Jesús uniꞌíka leꞌa xa mbinla itea be ta nlad Dios gun xa. Cha ndab xa:

—Leꞌa naꞌ ndak ladna.

Leꞌa xa li ndab ndontsa gak‑a lak nkeaniꞌi diꞌizh ten Dios.

29 Leꞌa sa wa nsoꞌ dub vas ncho vin ulaꞌ len‑a. Cha mgazh bexa dub bleꞌa lad xiꞌil len‑a. Cha msob xa ta wa gek dub xos ya hisopo, cha uxits bexa ta wa toꞌo Jesús. 30 Leꞌa gor na ngu Jesús ta wa, cha ndab xa:

—Nat leꞌa itea be tiꞌin ndal naꞌ ngokla cumplir.

Cha ubixkea gen xa, cha myun xa cuent gealnaban ten xa ndoꞌ Dios, cha ngut xa.

31 Leꞌa ta wa wizh lak geꞌatsa gal ujest Pascua, ta weꞌe leꞌa bexa judio lá nlad litsa nkea be men wa ndoꞌ be cruz gal wizh uneꞌe bexa wa, leꞌa wizh wa uzhebpa dub wizh nsak. Ta weꞌe unab bexa ndoꞌ Pilat inibeꞌe Pilat kiꞌich be soldad xoꞌo bexa li nkea ndoꞌ cruz, ndontsa mas uxax gat bexa, cha igeꞌe bexa ndoꞌ cruz wizh wa. 32 Leꞌa be soldad wa cha ulenbe, cha utiꞌich bexa xoꞌo dub xa wa. Cha liga mbinno bexa stubga xa nkea ndoꞌ cruz wa. 33 Ná leꞌa gor ngol bexa sa nkea Jesús, leꞌa bexa mnaꞌla leꞌa Jesús ngutla. Cha naꞌanpa igiꞌich bexa xoꞌo Jesús.

34 Parea leꞌa dub soldad wa cha utib dub lanza wats len Jesús. Zha leꞌa sa wa ulen ten no nits. 35 Leꞌa naꞌ ndee uní ta wa no sbeꞌen gealngea ndadiꞌizh naꞌ. Ta weꞌe nkeꞌa naꞌ‑yá, ndontsa no bega gungea ladna Jesús. 36 Leꞌa be ta wa li uyoꞌo lak nkeaniꞌi diꞌizh ten Dios, ndab‑a: “Ni dub tit las xa lá ngach.” 37 No lak nkeaniꞌiga diꞌizh ten Dios: “Leꞌa be men iwiꞌi ndoꞌ xa na utib bexa lanza las na wa.”

38 Uyoꞌo dub xabgiꞌi nsaleaꞌ Kosé xa gezh Arimatea, dub xa xgaꞌachtsa ndangea ladna Jesús, geal leꞌa xa nzheb ndoꞌ bexa nibeꞌe ten bexa judio. Leꞌa tsoꞌo na ngut Jesús leꞌa Kosé wa ngwaꞌinab Jesús xa ngut wa ndoꞌ Pilat. Leꞌa Pilat cha ndab goꞌo Kosé Jesús, cha ngwaꞌ Kosé cha mbiꞌi xa Jesús. 39 No Nicodemo xa ngwaꞌinaꞌ Jesús dub gor teꞌal noꞌo xa pa dub galntiꞌi kil ta uxeꞌe, noch‑a mirra nsea áloe. 40 Cha uxeꞌe bexa Jesús ndoꞌ cruz, cha mtixko bexa xa wa be lad lino no be ta uxeꞌe wa, lak nkaꞌach bexa judio be ltsaꞌa na. 41 Leꞌa sa li ukea Jesús ndoꞌ cruz wa nde gax dub lenya, sa nde dub baꞌa cuent geꞌloꞌo. Leꞌa ta wa dub sa ni dub men gol gaꞌach. 42 Leꞌa gor wa yamer gal wizh ten ujest Pascua ten bexa judio, ta weꞌe baꞌa weꞌetsa mkaꞌach bexa Jesús, leꞌa ta wa gax nsob sa wa.