1 Per Jesús zégacny láani dany Olivos. 2 Chiyru chi bragueel biecquiny yudoroo xte Jerusalén stuby ne zieny de bniety bdxasaa rut zuguaany. Chiyru guzubny ax guzulo caseedny laadeb. 3 Chiy de maistrɨ ni nán ley cun de fariseu güenédeb tuby gunaa ni bgané tuby nguiu, ax bsuguaadeb laab glay de bnietqui. 4 Chiy raipdeb Jesús:

—Maistrɨ, gunaaré bganéb tuby nguiu lo hechpac. 5 Ne ley ni bsanné Moisés dunnɨ rnii dec saa de gunaac ná par gatybɨ cun guia. Laabiu, ¿xi rniibiu?

6 Laadeb gunabdiidxdeb laany ziy par dún xi iniiny par chalee chúu nez xi icuaquiadebny. Per Jesús bsabquiagacny ax guzulo cacuaany lo yiu cun xcuanaany. 7 Per cun laadeb güelaaru gunabdiidxdebny ax guzubzaacny, chiy raipny laadeb:

—Tutix tubytɨ ni gady gúnti duld, nidoote laab ícuaab guia gunaac.

8 Ax gubíi bsabquiany stuby ne güelaaru bcuaany lo yiu. 9 De bɨny ni güené gunaaqui nez lo Jesús, chi bindiagdeb ni guniiny ax guzulo zégac tubyga pur tubygadeb desdɨ mazru bɨngul axtquɨ brateecdeb. Bsáanacdeb gunaaizqui cun Jesús nez lo de bniety ni zuguanény ruy. 10 Chiyru guzubzaacny ax raipny gunaaqui:

—¿Cún de ni bedné liú? ¿Ta nic tubydeb quɨt xi bannéti liú?

11 Laab ax cuaibbɨ:

—Ruteete, Dad.

Chiy raipy Jesús laab:

—Niclɨza nare quɨt xi gunnétia liú. Anre quegüe ne quɨtru chalaa gúnu duld.

12 Chiyru gubíi caniné Jesús de bniety ni zuguanény ruy raipny laadeb:

—Nare naa bieeny par bniety guɨchliu. Ne ni icuadiag xtiidxa zapbɨ guelrieny xa gaadbɨ guelnabány nez lo Dios, ne quɨt chúuti dxi icay xquelrienbɨ.

13 De fariseu ax raipy laany:

—Liú lagac pur liú rniiu ax quɨt xi sacti xtiidxu.

14 Chiy raipy Jesús laadeb:

—Sac xtiidxa masquɨ lagac nare caniia pur naa. Te pur nánna calí nez zelda ne calíza nez cháa. Per laat nic rsontɨ calí nez zelda ne calí nez cháa. 15 Laat rniit pur bniety zec ni ná xgabtɨ. Per nare quɨt tu purti rniia. 16 Ne belza iniia pur bniety, ni iniia ná didxldí. Te pur quɨt iniitia zec ni ná xgaba sino que néza Xtada ni bxiaald nare nán dec didxldí ná ni iniia. 17 Ne lo ley xtentɨ rniiza dec chi nuu tiop testigu ni rnii tubylote ax didxldíc ná ni rniideb. 18 Anre, lagac nare naa tuby testigu xtena, chiy Xtada ni bxiaald nare laany nány stuby testigu.

19 Laadeb ax gunabdiidxdeb laany:

—¿Cúnllɨ xtadu dxa?

Jesús cuaibny:

—Laat quɨt rumbeetit naa, niclɨza Xtada. Te pur belrulati rumbeet nare ziyza rumbeet Xtada.

20 Ziy xquel gunii Jesús lalzi ni caseedny laadeb laniudoroo xte Jerusalén nez rut zu de alcancía ni ruu gun. Per quɨt tu ninaazti laany, pur ni gady idzɨny horti ni igáany.

21 Ne ziyza raipny laadeb:

—Deni azaa, laat sguíilytɨ nare, per zatynét de xtuldtɨ. Te pur rut cháa, laat quɨt xo gueedtit.

22 Chiy gunii de bniety Israelqui:

—¿Ladxa lagac laab quinxúb laab, ningui rniib dec quɨt xo chootin rut chiab?

23 Chiyru raipy Jesús laadeb:

—Laat bɨny niguétquɨ laat, per nare nez yaa zelda. Ne bɨnguɨchliuza laat, per nare gati lo guɨchliutic zaa. 24 Pur ningui guniia laat dec zatytɨ cun de xtuldtɨ. Te pur belati quɨt reldilaaztɨ dec nareniy naa ni naa ax zatynét de xtuldtɨ.

25 Laadeb ax gunabdiidxdeb laany:

—¿Túza liú dxa?

Chiy cuaby Jesús lodeb:

—¿Xill guniia laat desde gulo? 26 Zienzi ni napa iseeda laat ne ni iniizaca pur laat. Per anre ni cayapia bɨnguɨchliu ná ni rindiaga rnii ni bxiaald nare, ne ni rniiny ná didxldí.

27 Per laadeb quɨt gucbeetideb dec pur Diosɨy rniiny. 28 Pur ningui raipny laadeb:

—Chi abaantɨ zec ni rcaaztɨ cun Bniety ni bxiaald Dios, chiyru gacbeet dec nareniy naa ni naa. Ne xíteete quɨt runtia pur xgabzia sino que nare rniia ni abliuu Dios naa. 29 Te pur ni bxiaald nare any zuguané naa. Ne gady chúuti dxi cuelaazny naa pur ni runa púrzi de ni rdxalaazny.

30 Chi gulull gunii Jesús ziy, zieny bniety güeldilaaz laany.

31 Ax raipy Jesús de bniety Israel ni agüeldilaaz laany:

—Belati laat chalaa gúntɨ cuend ne icuadiagtɨ xtiidxa ax xpɨncaa laat. 32 Ne zumbeezactɨ cún ni ná didxldí, chiy pur didxldíqui ax quɨt nátit esclav.

33 Laadeb cuaibdeb:

—Dunnɨ ziopnɨ lo xfamily to Abraham, ne gady chúuti dxi gacnɨ esclav. ¿Xínii rniibiu dunnɨ dec aquɨtru gactin esclav?

34 Chiy raipy Jesús laadeb:

—Nare rguixteldía lot dec irate de ni run duld, laadeb nádeb esclav xte duld. 35 Ne tuby esclav quɨt chaleeti inabeeb liz xlámbɨ, per llingaan xlámbɨ zelee inabee. 36 Pur ningui belati llingaanbɨ ílda laat, chiyru aquɨtru nátit esclav. 37 Nánca dec lo xfamily to Abraham zéedtɨ. Per laat rcaaztɨ quinxút naa pur ni quɨt rdxalaaztɨ xtiidxa. 38 Nare rniia laat ni abliuu Xtada naa, per laat runactɨ zec ni rnii xtadtɨ gúntɨ.

39 Laadeb ax cuaibdeb:

—Xtadnɨ rac to Abraham.

Chiy raipy Jesús laadeb:

—Belrulati lliin to Abraham laat, zuntɨ zec ni baanbɨ. 40 Per ziy masquɨ aguniia laat didxldí zec ni abliuu Diosni naa, laat rcaaztɨ quinxút nare. Ne to Abraham quɨt níiuti dxi niunbɨ zeec. 41 Per laat runtɨ zecac ni run xtadtɨ.

Laadeb ax raipdeb laany:

—Dunnɨ quɨtru tu lliinti dunnɨ. Tubyzi Dios rac xtadnɨ.

42 Chiy cuaby Jesús lodeb:

—Belrulati guldít Dios rac xtadtɨ, scaaztɨ nare te pur laany zelda lo guɨchliu. Quɨt zeldtia pur lagac nare sino que Dios bxiaald naa. 43 Ne quɨt racbeetit ni rniia laat, pur ni quɨt rcaaztɨ icuadiagtɨ xtiidxa. 44 Ni rac xtadtɨ ná bɨndxab. Ax runtɨ zec ni rcaaz bɨndxab gúntɨ. Ne desdɨ gulo rdxalaaz bɨndxab quinxusaa bniety. Gady chúuti dxi sutipnéb didxldí pur ni quɨt rueetib ni ná didxldí. Chi rueeb dixú niclɨ quɨt xi rziienbɨ te pur laabɨy bɨndixú ne laazacbɨy xtad dixú. 45 Per cun nare rniia laat púrzi didxldí, ax laat quɨt reldilaaztit naa. 46 ¿Tú laat zelee inii dec nare nuu xi duld abaania? Ne belati didxldí ná ni caniia, ¿xínii quɨt reldilaaztɨ naa? 47 Bniety ni ná xpɨny Dios, rcuadiagbɨ xtiidx Dios. Per laat gati xpɨny Diosti laat, niyla quɨt rcuadiagtɨ xtiidxa.

48 Chiyru raipy de bɨny Israelqui laany:

—Didxldíquɨy ni rniin dec bɨndxab nuu láaniu ne bɨny Samaritanza liú.

49 Jesús cuaibny:

—Gatllɨ bɨndxabti nuu láania sino que nare cazuuba xtiidx Xtada, per laat púrzi mal diidx rniit pur naa. 50 Nare quɨt rguíilytia gap bniety didxdoo naa masquɨ nuu ni rcaaz dec gap bniety didxdoo nare ne laany ná ni runny guelgurtisy. 51 Rguixteldía lot dec tutix ni icuadiag xtiidxa, quɨt chúuti dxi gatybɨ.

52 Chiy raipy de bɨny Israel laany:

—Anru agucbeldín dec bɨndxabquɨpac nuu láaniu. Abraham ne irate de profet gutydeb. Ne liú rniilesacu: “Tutix ni icuadiag xtiidxa quɨt chúuti dxi gatybɨ.” 53 ¿Tatix mazru sacu que to xpɨngulnɨ Abraham? Laab gutybɨ ne ziyza guty de profet. Ne liú, ¿xálesa rliloo liú?

54 Jesús ax cuaibny lodeb:

—Belati lagac nare izubyaa naa, xíteete sacti ni rniia pur naa. Per ni rzubyaa nare ná Xtada, lagac Dios ni rniit ná Xtiostɨ. 55 Laat quɨt rumbeetitny, per nare rumbiiany. Ne belati iniia laat dec quɨt rumbeetiany, ax anágaca tuby bɨndixú zecac laat. Per nare rumbiiany ne rcuadiagzaca xtiidxny. 56 To xpɨngultɨ Abraham guzaclaazbɨ pur ni iniáb dxi ni guelda. Ne chi gunábni ax mastecru guzaclaazbɨ.

57 Chiy raipy de bɨny Israelqui laany:

—Niclɨ gady chúu cincuent iz, ne rniilesacu dec gunóo Abraham.

58 Jesús ax guniiny:

—Rguixtiia lot dec nare agac nabánia desde anste ni chúu Abraham.

59 Chiy bldesdeb guia par nicuaadeb Jesús. Per laany gulaazgacny glay bniety ax gudeedny glaydeb bdiiany laniudoo, chiyru zégacny.